ސަންޗޭޒްގެ އެއްބަސްވުން އިންޓައިން ދާއިމީ ކުރަނީ

ޗިލީގެ ފޯވާޑް އެލެކްސިސް ސަންޗޭޒްގެ އެއްބަސްވުން ދާއިމީ ކުރަން އިންޓަ މިލާނުން މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.

މިދިޔަ އަހަރުގެ އޮގަސްޓް މަހު ސަންޗޭޒް އިންޓަ އަށް ބަދަލުވީ ޖޫން މަހުގެ ނިޔަލަށް ލޯނު އެއްބަސްވުމެއްގެ ދަށުންނެވެ. އެކަމަކު ކޮރޯނާވައިރަސް (ކޮވިޑް-19) އާ ގުޅިގެން ސީޒަން ދިގުލައިގެން ދާނެތީ ސަންޗޭޒް ވަނީ މި ސީޒަން ނިމެންދެން އިންޓަގައި މަޑުކުރަން ނިންމާ ލޯނު އެއްބަސްވުން އާކޮށްފައެވެ.

މެންޗެސްޓާ ޔުނައިޓެޑްގެ ލޯނު އެއްބަސްވުމެއްގެ ދަށުން ސަންޗޭޒް އިންޓައަށް ކުޅެމުން އަންނައިރު، އޭނާގެ އެއްބަސްވުން ދާއިމީ ކުރަން މިހާރު އިންޓައިން މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ. އެގޮތުން ސަންޗޭޒްގެ އެއްބަސްވުން ދާއިމީކުރަން އިންޓައިން ޔުނައިޓެޑަށް 20 މިލިއަން ޔޫރޯ ދައްކަން ތައްޔާރަށް އޮތް ކަމަށްވެސް ވަނީ ރިޕޯޓުކޮށްފައެވެ.

2018 ވަނަ އަހަރުގެ ޖެނުއަރީ މަހު ސަންޗޭޒް ޔުނައިޓެޑަށް ބަދަލުވީ ހަތަރު އަހަރުގެ އެއްބަސްވުމެއްގެ ދަށުން އަހަރަކު 14 މިލިއަން ޕައުންޑު މުސާރައިގެ ގޮތުގައި ލިބޭ ގޮތަށެވެ. އެގޮތުން އޭނާ ޔުނައިޓެޑާއެކު ހަދާފައިވާ އެއްބަސްވުން ހަމަވާނީ 2022 ވަނަ އަހަރެވެ.

މީގެ ކުރިން ބާސާއަށް ވެސް ކުޅެފައިވާ ސަންޗޭޒް ވަނީ އެ ކްލަބާއެކު ވެސް ގިނަ ކާމިޔާބީތައް ހޯދާފައެވެ. އާސެނަލްގައިވެސް ސަންޗޭޒް މޮޅު ކުޅުމެއް ދެއްކި ނަމަވެސް، ޔުނައިޓެޑްގައި އޭނާއަށް އެންމެ އެދެވޭ ކުޅުމެއް ދެއްކިފައެއް ނުވެއެވެ.

މި ސީޒަނުގައި އިންޓައަށް ބަދަލުވި ސަންޗޭޒް މިހާތަނަށް އެޓީމަށް 20 މެޗު ކުޅެދީފައި ވާއިރު، އޭނާއަށް ކާމިޔާބުކުރެވިފައިވަނީ އެންމެ ދެ ލަނޑެވެ.