ނިއު ނޯމަލްގައި ވެސް ވީޒާ ފީ ބަލައިގަތުމަށް ހަމަޖެހިފައިވަނީ އޮންލައިންކޮށް ކަމަށް މޯލްޑިވްސް އިމިގްރޭޝަނުން ބުނެފިއެވެ.
އިމިގްރޭޝަނުން ބުނީ އެ މުއައްސަސާއަކީ ވީޒާއާ ގުޅުންހުރި އެކިއެކި ކަންކަމުގައި، ކޮންމެ ދުވަހަކު ވެސް ގިނަ އަދަދެއްގެ އާންމު ރައްޔިތުން ޚިދުމަތް ހޯދުމަށް އަންނަ ތަނެއް ކަމަށެވެ. އަދި ކޮވިޑް-19އާ ގުޅިގެން އައު އާންމު ހާލަތަށް ރުޖޫއަވެ ޚިދުމަތް ފޯރުކޮށްދިނުމަށާއި، މި ބަލި ފެތުރުން މަދުކުރުމަށްޓަކައި ރައްކާތެރިކަމުގެ ގޮތުން އަޅަންޖެހޭ އެންމެހާ ފިޔަވަޅުތައް އެމުއައްސަސާއިން އަޅަމުންދާ ކަމަށެވެ.
އެގޮތުން އޮންލައިންކޮށް ފޯރުކޮށްދެވެން ހުރި ޚިދުމަތްތަށް، އޮންލައިންކޮށް ދިނުމަށް ވަނީ ނިންމާފައިވާ ކަމަށް އިމިގްރޭޝަނުން ބުނެއެވެ. އަދި 5 ޖުލައިވާ އާދިއްތަ ދުވަހުން ފެށިގެން ވީޒާފީ ބަލައިގަތުމަށް ހަމަޖެހިފައިވަނީ އޮންލައިންކޮށް ކަމަށް އިމިގްރޭޝަނުން ބުނެއެވެ.
މީގެ ކުރިން ރާއްޖެޓީވީއަށް ދެއްވި ބަސްތީގަތުމެއްގައި އިމިގްރޭޝަން ކޮންޓްރޯލަރ މުހައްމަދު އަހުމަދު ހުސައިން ވިދާޅުވީ، ފުރަބަންދަށް ފަހު ވެސް އޮންލައިންކޮށް ދެވެން ހުރި ހިދުމަތްތައް އޮންލައިންކޮށް ދޭން ވިސްނާފައިވާ ކަމަށެވެ.
