އަންނަ އަހަރު ބާސެލޯނާ ދޫކޮށްލަން އެ ޓީމުގެ ކެޕްޓަން ލިއޮނަލް މެސީ ނިންމާފައިވާ ކަމަށް މީޑިއާތަކުން ރިޕޯޓުކޮށްފިއެވެ.

ބާސާއާއެކު 2017 ވަނަ އަހަރު އުމުރުން 33 އަހަރުގެ މެސީ ހަދާފައިވާ އެއްބަސްވުން ހަމަވާނީ އަންނަ އަހަރުގެ ހޫނު މޫސުމުގައެވެ. މި އެއްބަސްވުމުގެ ދަށުން ކޮންމެ ސީޒަނެއް ނިމުމުން ވެސް މެސީއަށް ހިލޭ ޓްރާންސްފާއެއްގެ ދަށުން ކްލަބު ދޫކޮށްލުމުގެ ފުރުސަތު ލިބޭ ނަމަވެސް، ކްލަބު ބަދަލުކުރަން މެސީއަށް ލިބުނު ފުރުސަތު ފަހަނައަޅައި ގޮސްފައިވާތީ، މި ސީޒަނުގައި މެސީ ބާސާ ދޫކޮށްނުލާނެކަން ވަނީ ކަށަވަރުވެފައެވެ.

އެކަމަކު ރިޕޯޓުތައް ބުނާގޮތުން މެސީ ބޭނުންވަނީ އަންނަ ސީޒަނުގައި އެއްބަސްވުން ހަމަވުމުން ކްލަބު ދޫކޮށްލާށެވެ. އެގޮތުން ބާސާގެ ނިންމުންތަކުގައި މެސީގެ ނުފޫޒު އޮންނަ ކަމަށް މީޑިއާގައި ދެކެވޭ ވާހަކަތަށް ހުއްޓުވަން އެ ކްލަބުގެ ބޯޑުން މަސައްކަތް ނުކުރާތީ އާއި، ބާސާގެ ބައެއް ބޯޑު މެމްބަރުން އިސްވެ އެ ޓީމުގެ ކުރީގެ ތަރިންނާއި މިހާރުގެ ބައެއް ކުޅުންތެރިންގެ އަގު ވައްޓާލަން ސޯޝަލް މީޑިއާގައި މަސައްކަތް ކުރާތީ މެސީ ބާސާގައި މަޑުކުރަން ބޭނުން ނުވާ ކަމަށް ވަނީ ރިޕޯޓުކޮށްފައެވެ.

އަންނަ އަހަރު މެސީގެ އެއްބަސްވުން ހަމަވާއިރު، އޭނާގެ އެއްބަސްވުން އިތުރު ދެ އަހަރަށް އާކުރަން ބާސާއިން އަންނަނީ މަސައްކަތް ކުރަމުންނެވެ. މީގެ ކުރިން ބައެއް މީޑިއާތަކުން ވަނީ މެސީގެ ބައްޕަ ޖޯޖް މެސީއާ އެކު ބާސާގެ ރައީސް ޖޯސެފް މާރިއާ ބާޓޮމެއޫ މަޝްވަރާކުރި ކަމަށާއި، އިތުރު ދެ އަހަރަށް ބާސާގެ އެއްބަސްވުން އާކުރަން މެސީ އެއްބަސްވެފައިވާ ކަމަށް ރިޕޯޓުކޮށްފައެވެ.

މެސީ ބާސާ ދޫކޮށްލާނެ ކަމަށް ރިޕޯޓުކުރިއިރު، އޭނާ ހޯދުމަށް އިންޓަ މިލާނުން އަންނަނީ މަސައްކަތް ކުރަމުންނެވެ. އެގޮތުން މި ސީޒަން ނިމުމުން އިންޓައަށް މެސީ ބަދަލުވާން އުޅޭ ކަމަށް ސްޕެއިންގެ މީޑިއާތަކުން މީގެ ކުރިން ރިޕޯޓުކުރި ނަމަވެސް، އެފަހަރު މެސީ ވަނީ އެކަން ދޮގު ކޮށްފައެވެ.

މީގެ ކުރިން ބާސާގެ ކޯޗު ކިކޭ ސެޓިއެން ވަނީ މެސީ ބާސާ ދޫކޮށް ނުދާނެ ކަމަށް ބުނެފައެވެ. އަދި މެސީ އާއި ބާސާ އަބަދުވެސް އޮންނާނީ އެކުގައި ކަމަށް ސެޓިއެން ވަނީ ބުނެފައެވެ. މެސީ ބާސާ ދޫކޮށްލާނެ ކަމަށް އެންމެ ފުރަތަމަ އަޑުފެތުރުނީ، ބާސާގެ ސްޕޯޓިން ޑިރެކްޓަރު އެރިކް އަބިދާލާއި މެސީއާ ދެމެދު މައްސަލަ ޖެހުމުންނެވެ.

ބާސާގެ ސީނިއާ ޓީމުން 2004 ވަނަ އަހަރު ކެރިއަރު ފެށި މެސީ ވަނީ މިހާތަނަށް ބާސާއާއެކު ސްޕެނިޝް ލީގު 10 ފަހަރު ހޯދާފައެވެ. އަދި ޔުއެފާ ޗެމްޕިއަންސް ލީގު 4 ފަހަރު ހޯދާފައި ވާއިރު، މެސީ ވަނީ މިހާތަނަށް ދުނިޔޭގެ އެންމެ މޮޅު ކުޅުންތެރިޔާއަށްދޭ ބަލޮންޑޯ އެވޯޑް 6 ފަހަރު ހޯދާފައެވެ. މެސީ އަކީ މި އެވޯޑު އެންމެ ގިނައިން ހޯދި ކުޅުންތެރިޔާއެވެ.