އިންސާފު ހޯދައިދީ އަދި އިންސާފު ލިބިދޭނެ ނިޒާމެއް އެންމެ ފުރިހަމަ ގޮތުގައި އުފެއްދުމަކީ ހަމައެކަނި ސުޕްރީމް ކޯޓުގެ ބެންޗު ބަދަލުކޮށްގެން ކުރެވޭނެ ކަމެއް ނޫން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

އެމްޑީޕީގެ 15 ވަނަ އަހަރީ ދުވަހާ ގުޅުވައިގެން "ޚަބަރު ސިޓީ" އަލުން ނެރެން ފަށާފައިވާއިރު، އޭގައި ރައީސް ލިޔުއްވާފައިވާ ހަބަރެއްގައި ވިދާޅުވެފައިވަނީ އިންސާފު ހޯދައިދީ އަދި އިންސާފު ލިބިދޭނެ ނިޒާމެއް އެންމެ ފުރިހަމަ ގޮތުގައި އުފެއްދުމަކީ ހަމައެކަނި ސުޕްރީމް ކޯޓުގެ ބެންޗު ބަދަލުކޮށްގެން ކުރެވޭނެ ކަމެއް ނޫންކަން އެމަނިކުފާނަށް އެނގިވަޑައިގަންނަވާ ކަމަށެވެ. އަދި މި ބިޔަބޮޑު ކަމަކީ އެކަމަށް ބޭނުންވާ ހުރިހާ ކަމެއް ވަށާ ޖެހުނީމާ ލިބޭ ނަތީޖާ ކަމަށެވެ.

އަދި ޤާނޫނުތައް އިޞްލާޙްކުރުމާއި، އެކަމަށް ބޭނުންވާ މީހުން އުފެއްދުމާއި، ވަސީލަތްތައް ޤާއިމުކުރުމާއި، ތަމްރީންގެ ފުރުޞަތު ލިބުން ފަދަ ކަންކަމަކީ އެކު އެކީގައި ހިނގަންޖެހޭ ކަންކަން ކަމަށް ރައީސް ވިދާޅުވިއެވެ. މީގެ އިތުރުން މި ކަމާ ގުޅުން ހުރި އެހެނިހެން މުއައްސަސާތައްވެސް އެކު އެކީގައި އިޞްލާޙްކުރެވެން ޖެހޭނެ ކަމަށް ރައީސް ވިދާޅުވިއެވެ.

އެމްޑީޕީ ވުޖޫދުވިތާ 15 އަހަރު ވީއިރު، ހަނދާނުން ފޮހެލަން ދަތި ވަރަށް ގިނަ ކަންކަން އެބަހުންނެވި ކަމަށް ރައީސް ވިދާޅުވިއެވެ. އަދި ހުރިހާ ކަމެއް ހިނގައިދިޔައީ އަދި ދަނީވެސް ހިތްވަރުގަދަ މެންބަރުންގެ ލޯތަކުގެ ކުރިމަތީގައި ކަމަށެވެ. ބިރުވެރި، ދަތީ އެތައް އުނދަގޫ ދުވަސްތަކެއް ކަޑައްތު ކުރުމަށްފަހު، ޕާޓީ ރަޖިސްޓަރީ ކުރެވުނީ އަދި މާ ފަހުން ކަމަށާއި، އެމަނިކުފާނުގެ ގަބޫލުފުޅުކުރައްވާ ގޮތުގައި އެމްޑީޕީއަކީ 15 އަހަރަށްވުރެ މާ ދޮށީ ޕާޓީއެކެވެ.

ރައީސް ވިދާޅުވީ އެމްޑީޕީގެ ސިޔާސީ މަސައްކަތްތައް ފެށިގެން އައީ ވަރަށް ގިނަ ބައެއް އޭރު ތަޙައްމަލްކުރަމުން އައި ބޭއިންސާފާއި އަނިޔާވެރިކަމުން މި ޤައުމު މިންޖުކުރުމުގެ ނިޔަތާއި، އުންމީދާއެކުގައި ކަމަށެވެ. އަދި 1990 ގެ އަހަރުތަކުގައި ފެށި މި މަސައްކަތުގެ ނަތީޖާ މާނަވީ ގޮތެއްގައި ރައްޔިތުންނަށް އިޙްސާސްކުރެވެން ފެށީ، މި އަހަރު ސުޕްރީމް ކޯޓުގެ ބެންޗަށް ގެނެވުނު މުހިއްމު ބަދަލުތަކާ އެކުގައި ކަމަށް އެމަނިކުފާނު ގަބޫލުފުޅުކުރައްވާ ކަމަށެވެ.

އަދި އެތައް އަހަރުތަކެއް އެމްޑީޕީގެ މެންބަރުން ހޭދަކުރީ ބުރަ މަސައްކަތުގައި މިފަދަ ބަދަލުތައް ދިވެހިރާއްޖޭގެ ވެރިކަމުގެ ނިޒާމާއި، ޤާނޫނު އަސާސީ އާއި، ތިން ބާރުގެ ހިންގުމަށް ބޮޑެތި ބަދަލުތައް އައިއިރު، ރައްޔިތުންގެ އުންމީދުތަކާ އެއްމިންވަރަކަށް ބަދަލުތައް އެންމެ ފަހުން ފެށުނީވެސް އިންސާފު ޤާއިމުކުރުމުގެ ދާއިރާއިމް ކަމަސް ރައީސް ވިދާޅުވެފައިވެއެވެ. އަދި ތަފާތު އެތައް ތަޖުރިބާތަކަކަށްފަހު މި ބަދަލުތައް މިހާރު ފެންނަން ފަށާފައިވާކަމީ، އެމަނިކުފާނަށް ވެސް ލިބޭ ވަރަށް ބޮޑު ހިތްހަމަ ޖެހުމެއް ކަމަށެވެ.

ރައީސް ވިދާޅުވީ މީގެ ވިއްސަކަށް އަހަރު ކުރިން ކުރަން ފެށި މި ދަތުރު ނިންމާލުމާ ގާތަށް ވެސް އަދި ވަޑައިނުގެންނެވޭ ކަމަށެވެ. އަދި އެމަނިކުފާނާއި ބައިވެރިން އަދިވެސް މި ތިއްބެވީ މި ދަތުރުފުޅު މަތީގައި ކަމަށާއި، މިކަން ކުރުމުގައި އިތުރު ވަކި އެހެން ނިޔަތެއް ނެތި މަސައްކަތް ކުރާނެ ބަޔަކީ ވެސް އެމްޑީޕީގެ މެންބަރުން ކަމަށެވެ.

ރައީސް ވިދާޅުވީ އެމަނިކުފާނު އެދިވަޑައިގަންނަވަނީ ހަމަ އެންމެ ކަމަކަށް ކަމަށެވެ. އެއީ މި މަސައްކަތް ކުރަން ފެށި ސަބަބު އެންމެ ހިނދުކޮޅަކަށް ނަމަވެސް ހަނދާން ނައްތާނުލެއްވުމަށާއި، އެމްޑީޕީއާއެކު ދެމި ތިއްބެވުމަށެވެ. ރައީސް ނިންމަވާލައްވަމުން ވިދާޅުވީ އިރާދަކުރެއްވިއްޔާ މިކަން ކުރައްވާނީ ތިބޭފުޅުންނާއެކުގައި ކަމަށާއި، އެމްޑީޕީއާއެކު ކަމަށެވެ.