އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ޕޮޒިޓިވްވި ސްޓާފުންނާއި ބަލި މީހުން ދަރުމަވަންތަ ހޮސްޕިޓަލުގެ ޑީއެޗް11 އަށް ބަދަލު ކުރުމަށް ނިންމާފައިވާ ކަމަށް އެ ހޮސްޕިޓަލުން ބުނެފިއެވެ.

ހޮނިހިރު ދުވަހު އައިޖީއެމްއެޗްގެ މީޑިއާ އޮފިޝަލް "ރާއްޖެއެމްވީ"އަށް ވިދާޅުވީ، އައިޖީއެމްއެޗްގައި ކެންސަރަށް ފަރުވާ ހޯދަމުންދިޔަ އުމުރުން 39 އަހަރުގެ މީހަކު ކޮވިޑް-19 އަށް ޕޮޒިޓިވްވުމާ ގުޅިގެން، އައިސީޔޫގައި ތިބި ބަލި މީހުންނާއި، އައިޖީއެމްއެޗްގެ ބައެއް މުވައްޒަފުންގެ ޓެސްޓުތައް ހެދިފައިވާ ކަމަށެވެ.

އެގޮތުން ހެދިފައިވާ ޓެސްޓުތަކުން އައިޖީއެމްއެޗްގެ އައިސީޔޫގައި ފަރުވާ ހޯދަމުން ދިޔަ 2 މީހަކާއި، މުވައްޒަފުންގެ ތެރެއިން 4 މީހަކު ޕޮޒިޓިވްވެފައިވާ ކަމަށް އައިޖީއެމްއެޗުން މައުލޫމާތުދެއެވެ. އަދި އެހެން ސާމްޕަލްތަކުގެ ނަތީޖާ ނެގެޓިވް ވެފައިވާއިރު، ޕޮޒިޓިވްވި އެންމެންވެސް ޑީއެޗް11 އަށް ބަދަލު ކުރުމަށް ވަނީ ނިންމާފައެވެ.

އައިޖީއެމްއެޗުން ބުނީ، ޕޮޒިޓިވްވި އެންމެންގެ ޙާލުވެސް ރަނގަޅު ކަމަށެވެ.

އޭގެ އިތުރުން، ރައްކާތެރި ކަމުގެ ފިޔަވަޅެއްގެ ގޮތުން މިވަގުތު އައިސީޔޫގައި އިތުރު ބަލި މީހުން އެޑްމިޓް ނުކުރުމަށް ނިންމާފައިވާ ކަމަށާއި، އެ ޚިދުމަތް ހޮސްޕިޓަލުގެ އެހެން ތަނެއްގައި ހަމަޖައްސާފައިވާ ކަމަށް އައިޖީއެމްއެޗްއިން މައުލޫމާތުދެއެވެ.