މެންޗެސްޓާ ސިޓީއަށް ކުޅެމުން އައި ޖަރުމަންގެ ފޯވާޑް ލެރޯއި ސާނޭ ބަޔާން މިއުނިކަށް ބަދަލުވެއްޖެއެވެ.

އުމުރުން 24 އަހަރުގެ ސާނޭ ހޯދުމަށް ބަޔާން މިއުނިކުން މީގެ ކުރިން ވެސް މަސައްކަތް ކޮށްފައިވާއިރު، ސިޓީން ސާނޭ ދޫކޮށްލީ 49 މިލިއަން ޔޫރޯ ބަޔާނުން ދެއްކުމުންނެވެ. އަދި ބޯނަހާއެކު ސާނޭއަށް ބަޔާނުން ޖުމްލަ 60 މިލިއަން ޔޫރޯ ޚަރަދުކުރާނެ ކަމަށް ރިޕޯޓުތައް ބުނެއެވެ.

ސާނޭ ބަޔާނަށް ބަދަލުވިކަން އެ ކްލަބުން ހާމަކޮށްފައިވާއިރު، ޒުވާން ފޯވާޑް ބަޔާނާ ގުޅުނީ ފަސް އަހަރުގެ އެއްބަސްވުމެއްގެ ދަށުންނެވެ.

ބަޔާނުގެ ޗެއާމަން ކާލް-ހެއިންޒް ރުމެނިގާ ވިދާޅުވީ ސާނޭއަކީ އެ ކްލަބުން އެންމެ ބޮޑަށް ފާރަލުމުން އައި ކުޅުންތެރިޔާ ކަމަށާއި ސާނޭއަށް އެ ކްލަބުން މަރުހަބާ ކިޔާ ކަމަށެވެ.

ޝާލްކާއިން 2013 ވަނަ އަހަރުގެ ސީޒަނުގައި ކެރިއަރު ފެށި ސާނޭ ވަނީ، އެ ކްލަބަށް ކުޅުނު 57 މެޗުގައި 13 ލަނޑު ކާމިޔާބު ކޮށްފައެވެ. އޭނާ އެ ކްލަބު ދޫކޮށް ސިޓީއަށް ބަދަލުވީ 2016 ވަނަ އަހަރުގެ ސީޒަނުގައެވެ.

އެގޮތުން ސާނޭ ވަނީ ސިޓީއަށް ކުޅެދިން 135 މެޗުގައި 39 ލަނޑު ކާމިޔާބު ކޮށްފައެވެ. އަދި އޭނާ ވަނީ އެ ކްލަބާއެކު އިނގިރޭސި ޕްރިމިއާ ލީގު ދެ ފަހަރު، އިނގިރޭސި ލީގު ކަޕް ދެ ފަހަރު، އެފްއޭ ކޮމިއުނިޓީ ޝީލްޑު ދެ ފަހަރު އަދި އެފްއޭ ކަޕް އެއް ފަހަރު ވަނީ ކާމިޔާބުކޮށްފައެވެ.