ސަފާރީ ކޭސްގެ ތަހުޤީޤު ކުރިއަށްދޭ، ޝަރީއަތާ ހިސާބަށް ގެންދާނަން: ފުލުހުން
1 ޖުލައި 2020 | ބުދަ 12:39ފުލުހުން ޢަމަލު ކޮށްފައިވާ ގޮތް ތަފްސީލުކޮށް ދެނެގަންނަން ޖެހޭ
ބުދަ ދުވަހު މަޖިލިސް އިދާރާގައި ބޭއްވި ހިއުމަންރައިޓްސް އެންޑް ޖެންޑަރ ކޮމިޓީގެ ބައްދަލުވުން
ހުޅުމާލެ ކައިރީ އަޅާފައި އޮތް ސަފާރީއަކަށް ދިޔަ ބިދޭސީ އަންހެނަކަށް ޖިންސީ ގޯނާކުރި މައްސަލައިގެ ތަހުޤީޤު ކުރިއަށްދާ ކަމަށާއި، މި މައްސަލަ ޝަަރީއަތާ ހިސާބަށް ދާނެ ކަމަށް ބެލެވޭކަމަށް ފުލުހުން ބުނެފިއެވެ.
ބުދަ ދުވަހު މަޖިލިސް އިދާރާގައި ބޭއްވި ކޮމިޓީ ބައްދަލުވުމުގައި ޑެޕިއުޓީ ކޮމިޝަނަރ އޮފް ޕޮލިސް އަބްދުލް މަންނާން ޔޫސުފްގެ އިތުރުން، ޗީފް ސުޕްރިންޓެންޑެންޓް އޮފް ޕޮލިސް މުޙައްމަދު ބަޝީރު ވެސް ބައިވެރިވެ ވަޑައިގެންފައިވާއިރު، އޭނާއަކީ ފުލުހުންގެ ޗައިލްޑް ޕްރޮޓެކްޝަން ޑިޕާޓްމަންޓްގައި މައްސަލަތައް ބެއްލެވުމުގައި އިސްކޮށް އުޅުއްވާ ފަރާތެވެ. އަދި އޭނާއަކީ މި ވަގުތު ފުލުހުންގެ ކްރައިމް އިންވެސްޓިގޭޝަން ކޮމާންޑަރު ވެސް މެއެވެ.
އޭގެ އިތުރުން، ޗީފް ސުޕްރިންޓެންޑެންޓް އޮފް ޕޮލިސް މުޙައްމަދު ރަޝީދު (ހުޅުމާލޭ ފުލުހުންގެ ހެޑް) އަދި މި މައްސަލަ ތަހުޤީޤު ކުރެއްވުމުގައި މިހާރު ހަވާލުވެވަޑައިގެން ހުންނެވި ޗީފް އިންސްޕެކްޓަރ އޮފް ޕޮލިސް މަރިޔަމް އަޒްމާ ވެސް ބައިވެރިވެ ވަޑައިގެންނެވިއެވެ.
ކޮމިޓީގައި ވާހަކަ ދައްކަވަމުން މަންނާން ވިދާޅުވީ، ހުޅުމާލޭ ފަޅުގައި އޮތް ސަފާރީގައި ހިނގި ހާދިސާގެ މައްސަލައިގެ ތަހުޤީޤު މިހާރު ވެސް ކުރިއަށްދާ ކަމަށާއި، އެކަމުގެ ޝަރީއަތުގެ މަރުޙަލާއަށް ވެސް ދާނެ ކަމަށް ބެލެވޭ ކަމަށެވެ. އެހެން ނަމަވެސް ތަހުޤީޤުގެ މައުލޫމާތު މިވަގުތު މީޑިއާތަކާ ހިއްސާ ކުރެވެން ނެތްކަން އޭނާ ފާހަގަ ކުރެއްވިއެވެ.
މަންނާން އިތުރަށް ވިދާޅުވީ، މައްސަލަ ހުށައެޅުމުން ފުލުހުން އެ މައްސަލައާ ގުޅޭގޮތުން ވިކްޓިމް އާ ސުވާލުކޮށް، އެއީ ދެމިގެން ދިޔަ "ކްރައިމް ސީން" އަކަށް ވުމާއެކު، ވިކްޓިމް ޑޮކްޓަރަށްވެސް ދައްކާފައިވާނެ ކަމަށެވެ. އަދި މައްސަލައިގައި ފުލުހުންގެ ބެލުމުގެ ދަށަށް ގެންދެވުނު މީހުންނާ ސުވާލުކޮށް ބަޔާންވެސް ނަގާފައިވާނެ ކަަމަށް ވިދާޅުވިއެވެ.
