ހދ. ކުމުންދޫގައި ކުޅިވަރާ ބެހޭ ވުޒާރާގެ ފަރާތުން އެޅި ފުޓްސަލް ދަނޑުގެ މަސައްކަތް ނިންމާލައިފިއެވެ.
މިކަން އިއުލާނު ކުރައްވަމުން ކުޅިވަރާ ބެހޭ ވަޒީރު އަޙްމަދު މަޙްލޫފް ކުރެއްވި ޓްވީޓެއްގައި ވިދާޅުވީ މިއީ ކުމުންދޫގެ ޒުވާނުންގެ އެންމެ ބޮޑަށް ނިންމާލަން ބޭނުންވި މަސައްކަތް ކަމަށާއި މި ދަނޑަކީ ވެސް ދުޅަހެޔޮ ހަށިހެޔޮ ދިރިއުޅުމަކަށް މަގުފަހި ކުރުމަށް އެރަށުގެ ރައްޔިތުން ބޭނުންކުރާނެ ތަނަކަށް ވާނެ ކަމަށް އުންމީދު ކުރައްވާ ކަމަށެވެ.
މަޙްލޫފް ވަނީ މި ދަނޑުގެ މަސައްކަތް ކުރިއަށް ގެންދިޔުމުގައި ކުމުންދޫ ކައުންސިލާއި ކުމުންދޫ ނިސްބަތްވާ މަކުނުދޫ ދާއިރާގެ މަޖިލިސް މެމްބަރު މުޙައްމަދު ރާޢީ ވެދެއްވި އެހީތެރިކަމަށް ޝުކުރު އަދާކުރައްވާފައެވެ.
ކުމުންދޫގެ ފުޓްސަލަ ދަނޑުގެ މަސައްކަތް ނިންމާލާފައިވާއިރު، އެރަށުގެ ކައުންސިލުން ވަނީ ވަރަށް އަވަހަށް ދަނޑު ބޭނުންކުރަން ފެށޭނެ ކަމަށް ވިދާޅުވެފައެވެ.
މި ދަނޑުގެ މަސައްކަތް އިއުލާން ކޮށްގެން ކުރިއަށް ގެންދިޔުމުގެ ހުއްދަ ކުމުންދޫ ކައުންސިލަށް ދިނުމާއެކު، އެ މަސައްކަތް ކޮށްފައިވަނީ ޓްރިޕަލް އެއިޓް ކުންފުނިންނެވެ. މި ދަނޑުގައި ރޭގަނޑު ކުޅެވޭ ގޮތަށް ލައިޓުވެސް ހަރުކުރެވިފައިވާ ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެޗެ.
ކުޅިވަރާ ބެހޭ ވުޒާރާގެ ފަރާތުން ރާއްޖޭގެ އެކި ކަންކޮޅުތަކުގައި މިހާރު ކުރިއަށްގެންދާ ގިނަ މަޝްރޫއުތައް ވަނީ ނިމުމަކާ ހަމަޔަށް އައިސްފައެވެ. އެގޮތުން ކުރިއަށް އޮތް ދުވަސްތަކުގައި ވެސް ގިނަ މަޝްރޫއުތަކެއް ނިމިގެންދާނެ ކަމަށް އެ ވުޒާރާއިން މައުލޫމާތުދެއެވެ.
