ސްކޫލްތަކާއި ކޮލެޖް ޔުނިވަރސިޓީތައް ހުޅުވައި ކިޔަވައިދޭން ފަށައިފި

ރާއްޖެއިން ކޮވިޑް-19 ގެ ކޭސްތަކެއް ފެނުމާއި ގުޅިގެން ރާއްޖޭގެ ހުރިހާ ސްކޫލްތަކާއި ކޮލެޖް ޔުނިވަރސިޓީގެ ކިޔެވުން މެނދުކެނޑުމަށްފަހު ބުދަ ދުވަހުން ފެށިގެން ސްކޫލް އަދި ކޮލެޖް ޔުނިވަރސިޓީތަކުގައި ކިޔަވައިދޭން ފަށައިފިއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިންތަކާއެކު ބުދަ ދުވަހުން ފެށިގެން ސްކޫލްތަކުގައި ކިޔަވައިދޭން ފަށާފައިވާއިރު ކޮވިޑް-19 ފެނިފައިވާ ރަށްރަށުގައި ކިޔެވައި ދިނުން ހަމަޖެހިފައިވަނީ ކީ ސްޓޭޖް 4 އަދި 5 (ގްރޭޑް 9-12) ގެ ދަރިވަރުންނަށް ސްކޫލްތައް ހުޅުވާލައިގެންނެވެ. އެގޮތުން ސްކޫލްތައް ހިންގާނެ ގޮތް ކަނޑައަޅާނީ އެޑިއުކޭޝަން މިނިސްޓްރީ އާއި ސްކޫލްތަކާ ގުޅިގެންނެވެ.

މި ކީ ސްޓޭޖްތަކުގެ ދަރިވަރުން ސްކޫލަށް ހާޒިރުވި ކަމުގައިވިޔަސް ޓެލިކްލާހާއި، އޮންލައިން ގޫގްލް ކްލާސް ވެސް ކުރިއަށް ގެންދިޔުމަށް އެޗްޕީއޭ އިން ވަނީ އިރުޝާދު ދީފައެވެ. އަދި ކޮންމެ ސެޝަނެއް ކުރިޔަށް ގެންދެވޭނީ 4 ގަޑިއިރަށް ކަމަށާއި، ދަރިވަރުން ސްކޫލަށް ހާޒިރުވެގެން ކިޔަވަން ޖެހޭނީ ހަފްތާއަކު 4 ދުވަހު ކަމަށް ވެސް ވަނީ ކަނޑައަޅާފައެވެ.

މީގެ އިތުރުން ދަރިވަރުން އަދި ސްކޫލްގައި މަސައްކަތް ކުރާ އެންމެހާ މުވައްޒަފުން ވެސް މާސްކް އެޅުމާއި، ސްކޫލަށް ވަންނަން ހުންނަ ޕޮއިންޓްތަކުގައި ޓެމްޕަރޭޗަރ ބަލައި ސްކްރީން ކުރުން އަދި ސްކޫލް އެސެމްބްލީތަކާއި، އިތުރު ޙަރަކާތްތައް ހިންގުން ވަނީ މަނާކޮށްފައެވެ. އަދި މަދުވެގެން އެކަކު އަނެކަކާ ދެމެދުގައި 3 ފޫޓުގެ ގައިދުރުމިން ފަރިތަކުރުމަށް ވެސް ވަނީ އަންގާފައެވެ.

މީގެ އިތުރުން ސްކޫލްގައި އަތް ދޮވެވޭނެ ނުވަތަ ސެނިޓައިޒް ކުރެވޭނެ އިންތިޒާމް ހަމަޖެހިފައި ހުރުމާއި، ކޮންމެ ސެޝަންއެއް ނިންމާލުމަށްފަހު ޤަވާއިދުން ކްލާސް ރޫމްތައް ޑިސްއިންފެކްޓްކޮށް ކޮންމެ ދުވަހަކު އެއްފަހަރު ކްލާސްރޫމްތައް ސާފުކުރުމަށް ވަނީ އަންގާފައެވެ. އަދި ހަފްތާ ބަންދުގައި ކްލާސްރޫމްތައް 'ޑީޕް ކްލީން' ކުރުމަށްފަހު ޑިސްއިންފެކްޓް ކުރުމަށް އެޗްޕީއޭއިން ވަނީ އަންގާފައެވެ.

މީގެ އިތުރުން ފައުންޑޭޝަން ސްޓޭޖުން ފެށިގެން ކީ ސްޓޭޖް 3 (ޕްރީ ސްކޫލުން ފެށިގެން ގްރޭޑް 8 ގެ ދަރިވަރުން) ސްކޫލަށް ހާޒިރުނުވި ކަމުގައިވިޔަސް ޓެލިކްލާހާއި، އޮންލައިން ގޫގްލް ކްލާހުގައި ބައިވެރިވުމާއި، އައިސޮލޭޝަން، ކަރަންޓީން، އަދި އިތުރު ސަބަބަކާއި ހުރެ ސްކޫލަށް ހާޒިރުވާން އުޒުރުވެރިވާ ނަމަ ޓެލިކްލާހާއި، އޮންލައިން ގޫގްލް ކްލާހުގައި ބައިވެރިވުމަށް ވަނީ އަންގާފައެވެ.

އަދި އެޑިއުކޭޝަން މިނިސްޓްރީން ކަނޑައަޅާ އުޞޫލާ އެއްގޮތަށް ސެން ކްލާހުގައި ދަރިވަރުންނަށް ކިޔަވާ ދިނުމާއެކު ކޮވިޑް-19 ފެނިފައިނުވާ ރަށްރަށުގައި ކިޔެވުން ހަމަޖެހިފައިވަނީ ކީ ސްޓޭޖް 1ން ފެށިގެން 5ށް (ގްރޭޑް 1-12) ގެ ދަރިވަރުންނަށެވެ. އަދި ސްކޫލްތައް ހިންގާނެ ގޮތް ކަނޑައަޅާނީ އެޑިއުކޭޝަން މިނިސްޓްރީއާއި ސްކޫލްތަކުން ގުޅިގެންނެވެ.

މަތީ ތަޢުލީމާއި ތަމްރީން ދޭ ތަންތަނުން މިނިސްޓްރީ އޮފް ހަޔަރ އެޑިޔުކޭޝަނުން ކަނޑައަޅާ އުޞޫލާ އެއްގޮތަކަށް ކިޔެވުން ކުރިއަށް ގެންދިއުމަށް ވަނީ އަންގާފައެވެ. އަދި މަރުކަޒަށް ކިޔަވައިދޭ ޓީޗަރުން، މުވައްޒަފުން އަދި ދަރިވަރުން ޙާޒިރުވާނަމަ، މާސްކް ބޭނުން ކުރުމުގައި ހެލްތް ޕްރޮޓެކްޝަން އެޖެންސީގެ 'މާސްކް އެޅުމުގައި ޢަމަލު ކުރާނެ ގޮތުގެ އެޞޫލާ' އެއްގޮތަށް ޢަމަލު ކުރުމަށް ވަނީ އިލްތިމާސްކޮށްފައެވެ.