3 ރަށެއްގައި ގަވާއިދާއި ހިލާފަށް އުޅެމުން ދިޔަ 22 ބިދޭސީން އިމިގްރޭޝަންގެ ބެލުމެގު ދަށަށް ގެނެސްފި
އެ މީހުން ގެނެސްފައިވަނީ ކ އަތޮޅު ހިންމަފުއްޓާއި އދ. ދަނގެތި އަދި މާމިގިލިން
ގަވާއިދާއި ހިލާފަށް އުޅޭ ބިދޭސީން މާލެ ގެނައުން
ތިން ރަށެއްގައި ގަވާއިދާއި ހިލާފަށް އުޅެމުން ގެންދިޔަ 22 ބިދޭސީން އިމިގްރޭޝަންގެ ބެލުމެގު ދަށަށް ގެނެސްފިއެވެ.
މިކަމާއި ގުޅޭ މައުލޫމާތު ހިއްސާކޮށް އިމިގްރޭޝަނުން ބުނެފައިވަނީ، ގަވާއިދާއި ހިލާފަށް އުޅޭ ބިދޭސީން މަދުކުރުމުގެ ގޮތުންނާއި ރަށްރަށުގެ އިޖްތިމާއީ ވެއްޓަށް ގެއްލުން ލިބޭ ގޮތަށް އުޅެމުންދާ ބިދޭސީން މަދުކުރުމަށްޓަކައި، ފުލުހުންނާއި އިމިގްރޭޝަން އަދި ރަށު ކައުންސިލްތަކާއި ގުޅިގެން މަސައްކަތް ކުރަމުންދާ ކަމަށެވެ.
އެގޮތުން، ކ. އަތޮޅު ހިންމަފުއްޓާއި އދ. ދަނގެތި އަދި އދ. މާމިގިލިން ޖުމްލަ 22 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފައިވާކަން ވަނީ ހާމަކޮށްފައެވެ.
ރާއްޖޭގައި މަސައްކަތްކުރާ ބަންގްލަދޭޝް ރައްޔިތުންގެ ތެރޭގައި ހަލުވިކަމާއި އެކު ކޮވިޑް-19 ފެތުރެން ފެށުމުން ދިވެހި ސަރުކާރުން ވަނީ ރާއްޖޭގައި ގަވާއިދާއި ހިލާފަށް އުޅޭ ބިދޭސީން ދެނެގަނެ އަނބުރާ ގައުމަށް ފޮނުވާލުމައްޓަކައި ގިނަ މަސައްކަތްތަކެއް ކޮށްފައެވެ. އެގޮތުން ގަވާއިދާއި ހިލާފަށް އުޅޭ 2500ށް ވުރެ ގިނަ ބިދޭސީން ވަނީ އަނބުރާ ގައުމަށް ފޮނުވާލާފައެވެ.
މީގެ އިތުރުން ލޯކަލް ގަވަރމަންޓް އޮތޯރިޓީ އާއި ކައުންސިލްތަކާއި އަދި އިމިގްރޭޝަން ގުޅިގެން އަންނަނީ ރަށްރަށުގައި އުޅޭ ބިދޭސީންގެ ދަފްތަރެއް އެކުލަވާލައި އޭގެތެރެއިން ގަވާއިދާއި ހިލާފަށް އުޅޭ ބިދޭސީން އަނބުރާ ގައުމަށް ފޮނުވާލުމުގެ މަސައްކަތް ވެސް ކުރަމުންނެވެ.
