ބްރެޒިލް މިޑްފީލްޑަރު އާތޫރް މެލޯ ޔުވެންޓަސްއަށް ސޮއިކުރިއިރު، ބޮސްނިއާ މިޑްފީލްޑަރު މިރަލެމް ޕިޔަނިޗް ބާސެލޯނާއަށް ސޮއިކޮށްފިއެވެ.

ހޯމަ ދުވަހުގެ ވަގުތެއްގައި އާތޫރް ވިއްކާލައި ޕިޔަނިޗްގެ ސޮއި ހޯދިކަން ބާސާއިން ހާމަކުރިއިރު، މި ދެ ކުޅުންތެރިން ކްލަބު ބަދަލުކުރާނީ މި ސީޒަން ނިމުމުންނެވެ.

ބާސާގެ މެދުތެރެއަށް ކުޅެމުން އަންނަ އާތޫރް ޔުވެންޓަސްއަށް ވިއްކާލީ 72 މިލިއަން ޔޫރޯއަށެވެ. ޔުވެންޓަސްއާއެކު ފަސް އަހަރު ދުވަހުގެ އެއްބަސްވުމެއް އާތޫރް ހެދިއިރު، ބޯނަހުގެ ގޮތުގައި އިތުރު 10 މިލިއަން ޔޫރޯ ޔުވެންޓަސްއިން ބާސާއަށް ދައްކާނެ ކަމަށްވެސް ވަނީ ރިޕޯޓުކޮށްފައެވެ.

2018 ވަނަ އަހަރު ގްރެމިއޯއިން ބާސާއަށް ބަދަލުވި އާތޫރް ޔުވެންޓަސްއަށް ވިއްކާލުމުން ބާސާގެ ގިނަ ސަޕޯޓަރުން ވަނީ އެކަމާ ނުރުހުން ފާޅުކޮށްފައެވެ.

ބާސާގެ މެދުތެރޭގައި މޮޅު ކުޅުމެއް ދައްކަމުން އަންނަ އާތޫރް ވަނީ މިހާތަނަށް ބާސާއަށް ކުޅެދިން 72 މެޗުގައި ހަތަރު ލަނޑު ޖަހާފައެވެ. އަދި އޭނާ ވަނީ ބާސާއާއެކު މިދިޔަ ސީޒަނުގެ ސްޕެނިޝް ލީގުވެސް ކާމިޔާބުކޮށްފައެވެ.

މީގެ އިތުރުން ބާސާއާ އަލަށް ގުޅުނު ޕިޔަނިޗް އެ ކްލަބަށް ބަދަލުވާން އެއްބަސްވީ ހަތަރު އަހަރުގެ އެއްބަސްވުމެއް ދަށުންނެވެ. ބާސާއިން ޕިޔަނިޗް ހޯދުމަށް 60 މިލިއަން ޔޫރޯ ޔުވެންޓަސްއަށް ދައްކާއިރު، ބޯނަހުގެ ގޮތުގައި އިތުރު ފަސް މިލިއަން ޔޫރޯ ދައްކަން ޖެހޭނެއެވެ.

2016 ވަނަ އަހަރު ރޯމާ ދޫކޮށް ޔުވެންޓަސްއާ ގުޅުނު ޕިޔަނިޗް އަންނަނީ އެޓީމުގެ މެދުތެރޭގައި މުހިންމު ދައުރެއް އަދާކުރަމުންނެވެ. އެގޮތުން މިހާތަނަށް އެޓީމަށް ކުޅެދިން 171 މެޗުގައި 22 ލަނޑު ކާމިޔާބުކޮށްފައިވާއިރު، އޭނާ ވަނީ ޔުވެންޓަސް އާއެކު ގިނަ ކާމިޔާބީތަކެއް ހޯދާފައެވެ. އެގޮތުން އިޓާލިއަން ލީގު ތިން ފަހަރު ހޯދުމުގެ އިތުރަށް ޕިޔަނިޗް ވަނީ ޔުވެންޓަސް އާއެކު އިޓާލިއަން ކަޕްގެ އިތުރުން އިޓާލިއަން ސުޕަ ކަޕްވެސް ކާމިޔާބުކޮށްފައެވެ.