ޑި ހެވިލެންޑްގެ އެއަރލައިން ރިލަޔަބިލިޓީ އެވޯޑް މޯލްޑިވިއަނަށް

ކެނެޑާގެ މަޝްހޫރު އެއަކްރާފްޓް އުފައްދާ ކުންފުނި, ޑި ހަވިލެންޑް އެއާކްރާފްޓް އޮފް ކެނެޑާ ލިމިޓެޑުންދޭ ''2019 އެއާލައިން ރިލައިބިލިޓީ އެވޯޑް'' ރާއްޖޭގެ ގައުމީ އެއާލައިން، މޯލްޑިވިއަންއަށް ލިބިއްޖެއެވެ.

މި އެވޯޑަކީ އެއާލައިންތައް ފުރުމަށް ދީފައިވާ ޝެޑިއުލް ގަޑިތަކާއި އެއްގޮތަށް ލަސްކަމެއްނެތި ފުރާ އެއާލައިންތަކުގެ ތެރެއިން ޑި ހެވިލެންޑުން އެއްކުރާ ޑޭޓާގެ މައްޗަށް ބިނާކޮށް އެންމެ ހޮވާލެވޭ އެއާލައިނަކަށް ދެވޭ އެވޯޑެކެވެ.

މޯލްޑިވިއަންއަށް ވަނީ މީގެ ކުރިންވެސް މި އެވޯޑް ލިބިފައެވެ. މޯލްޑިވިއަންގައި މިހާރު ބޭނުންކުރަމުން އަންނަ މަތިންދާ ބޯޓުތަކުގެ ތެރެއިން 10 މަތިންދާ ބޯޓަކީ ޑި ހެވިލެންޑުން ފަރުމާކޮށްފައިވާ މަތިންދާ ބޯޓުތަކެވެ.

މޯލްޑިވިއަންއަށް ރިލައިބިލިޓީ އެވޯޑް ލިބިފައިވަނީ ޑޭޝް-8 ގެ 100/200/300 އެއާކްރާފްޓް ކެޓަގަރީން އޯޝޭނިޔާ ސަރަހައްދުންނެވެ. އިތުރު ދެ އެއާލައިންކަށް ވެސް ވަނީ އެ އެވޯޑް ދީފައެވެ.

އެވޯޑް ދިނުމަށް އޮންލައިންކޮށް ކުރިޔަށް ގެންދިޔަ ރަސްމިއްޔާތުގައި ޑި ހެވިލެންޑްގެ ޗީފް އޮޕަރޭޓިން އޮފިސަރު ޓޮޑް ޔަންގް ވިދާޅުވީ، ކޮވިޑުގެ ހާލަތުގައި ޑޭޝް-8 ގެ މަތިންދާ ބޯޓުތަކުން ޒަރޫރީ ގޮތުން ބޭނުންވާ ތަކެތި ފޯރުކޮށް ދިނުމުގައި, މެދު ކެނޑުމެއްނެތި ދަތުރުތައް ކުރަމުން އަންނަ ކަމަށެވެ.