ވައިރަހުގެ ބިރު އޮތް ނަމަވެސް ޕާކިސްތާން ކްރިކެޓް ޓީމު އިންގްލެންޑަށް ފުރަނީ

ކްރިކެޓް ޓީމުގެ 10 ކުޅުންތެރިއަކު ކޮރޯނާވައިރަސް (ކޮވިޑް-19) ށް ޕޮޒިޓިވްވި ނަމަވެސް، އާދީއްތަ ދުވަހު އިންގްލެންޑަށް ފުރަން ޕާކިސްތާން ގައުމީ ކްރިކެޓް ޓީމުން ތައްޔާރުވެއްޖެއެވެ.

ޕާކިސްތާން ކްރިކެޓް ޓީމުގެ 10 ކުޅުންތެރިއަކު ކޮވިޑް-19ށް ޕޮޒިޓިވްވި ނަމަވެސް، އޮގަސްޓް މަހު އިންގްލަންޑުގައި ކުޅުމަށް ހަމަޖެހިފައިވާ ތިން ޓެސްޓު މެޗާއި، ޓީ20 ތިން މެޗުގައި ޕާކިސްތާން ކްރިކެޓް ޓީމު ވާދަކުރާނެއެވެ. މި މެޗުތައް ކުޅުމަށް ޕާކިސްތާން ޓީމު އިންގްލެންޑަށް ފުރާނީ އާދީއްތަ ދުވަހެވެ.

ޕާކިސްތާން ކްރިކެޓް ޓީމުގެ 10 ކުޅުންތެރިއަކު ކޮވިޑް-19ށް ޕޮޒިޓިވް ވިކަން ހާމަކުރި ފަހުން، އެ ޓީމުގެ އޯލް-ރައުންޑާ މުހައްމަދު ހަފީޒް ވަނީ އޭނާ ފަހުން ވައިރަހަށް ނެގެޓިވްވި ކަމަށް ބުނެފައެވެ. ކޮވިޑް-19ށް ޕޮޒިޓިވްވި ޕާކިސްތާން ކްރިކެޓް ޓީމުގެ ކުޅުންތެރިން އައިސޮލޭޝަނަށް ބަދަލުކޮށްފައިވާއިރު، އެއިން އެއްވެސް ކުޅުންތެރިއެއްގެ ގައިން ވައިރަހުގެ އެއްވެސް އަލާމާތެއް ނުފެންނަ ކަމަށް ރިޕޯޓުތައް ބުނެއެވެ.

އިންގްލެންޑާއި ވޭލްސްގެ ކްރިކެޓް ބޯޑުން ބުނީ ޓެސްޓު ޓުއާއަށް ކުޅުންތެރިން އިންގްލެންޑަށް އަންނައިރު، ހުރިހާ ކުޅުންތެރިން ކޮވިޑް-19ށް ޓެސްޓު ކުރުމުގެ އިންތިޒާމު މިހާރު ހަމަޖައްސާފައިވާ ކަމަށެވެ.

މީގެ ކުރިން ޕާކިސްތާން ކްރިކެޓް ބޯޑުގެ ޗީފް އެގްޒެކުޓިވް ވާސިމް ޚާން ވިދާޅުވީ ކްރިކެޓް ޓީމުގެ ގިނަ ކުޅުންތެރިންތަކެއް ކޮވިޑް-19ށް ޕޮޒިޓިވްވި ނަމަވެސް، އިންގްލެންޑުގައި ކުޅުމަށް ހަމަޖެހިފައިވާ މެޗުތަކުގައި ޕާކިސްތާން ކްރިކެޓް ޓީމު ވާދަކުރާނެ ކަމަށެވެ. އެގޮތުން އިންގްލެންޑަށް ފުރާނީ ދެ ފަހަރުގެ މަތިން ކޮވިޑް-19ށް ޓެސްޓު ކޮށް، ނެގެޓިވްވާ ކުޅުންތެރިން ކަމަށްވެސް އޭނާ ވިދާޅުވި އެވެ.

ޕާކިސްތާންގައި ކޮވިޑް-19 ހަލުވިކަމާއެކު ފެތުރެމުން އަންނައިރު، މީގެ ކުރިން ޕާކިސްތާންގެ ކުރީގެ ކުޅަދާނަ އޯލްރައުންޑާ ޝާހިދު އަފްރީދީވެސް ވަނީ ކޮވިޑް-19ށް ޕޮޒިޓިވް ވެފައެވެ.

އަދި އެ ގައުމުން މިހާތަނަށް 198،800 ށްވުރެ ގިނަ މީހުން ކޮވިޑް-19ށް ޕޮޒިޓިވް ވިއިރު، މި ވައިރަސް ޖެހިގެން އެ ގައުމުން 4،000 ށްވުރެ ގިނަ މީހުން ވަނީ މަރުވެފައެވެ.