އިޖުތިމާއީ ގައިދުރުކުރުމުގެ ފާހަގަތަކާއެކު މަސް މާރުކޭޓް، ޖުލައި 1 ގައި އަލުން ހުޅުވަނީ!
މިހާރުވެސް މަސްމާރުކޭޓުން ހިދްމަތް ލިބޭ، އެކަމަކު އަލުން ހުޅުވާއިރު އެތެރެއަށް ވަދެ މަސްގަތުމާއި މަސް ކަނޑައިދިނުމުގެ ހިދްމަތް ލިބޭނެ
މާލޭގެ މަސް މާރުކޭޓް: މިއީ ވަރަށް ގިނަ ބަޔަކު ހިދްމަތް ހޯދަން ދާތަނެއް، އެހެންކަމުން، އާންމު ސިއްހަތުގެ ރައްކާތެރިކަމަށް ވަރަށް ބޮޑަށް ސަމާލުކަން ދިނުމަށް މާލެ ސިޓީ ކައުންސިލުން ވަނީ ހިދްމަތް ފޯރުކޮށް
މާލޭގެ ރޯމަސް މާރުކޭޓްގައި އިޖުތިމާއި ގައިދުރުކަމަށް ސަމާލުކަން ދީގެން، ހިދްމަތް ދިނުމަށް ނިންމައި، އެ މާރުކޭޓް އަލުން ހުޅުވުމުގެ މަސައްކަތް މާލެ ސިޓީ ކައުންސިލުން ފަށައިފި އެވެ.
މާލެ ސިޓީ ކައުންސިލްގެ މޭޔަރު ޝިފާ މުހައްމަދު "ރާއްޖެއެމްވީ"އަށް ވިދާޅުވީ، އަންނަ ޖުލައި މަހު 1 ވަނަ ދުވަހުން ފެށިގެން ކުރިއެކޭ ވެސް އެއްގޮތަށް މަސްމާރުކޭޓްގެ އެތެރެއަށްވަދެ، މަސްގަތުމާއި މަސް ކަނޑައިދިނުމުގެ ހިދްމަތް ދިނުމަށް ހުޅުވާލާނެ ކަމަށެވެ. ނަމަވެސް މާރުކޭޓް އަލުން ހުޅުވާލާއިރު، އިޖުތިމާއީ ގައުދުރުކަން ބެހެއްޓުމުގެ ގޮތުން ފްލޯގައި ނިޝާންތައް ކުރަހާފައިވާނެ ކަމަށާއި އަދި މާރުކޭޓުގައި އުޅޭއިރު ރަނގަޅަށް މާސްކް އަޅައިގެން ހުރިހާ ފަރާތްތަކުންވެސް ސަމާލުކަން ދޭންޖެހޭނެ ކަމަށެވެ. އަދި އާންމު ސިއްހަތު ރައްކާތެރި ކުރުމުގެ ގޮތުން އަޅަންޖެހޭ ރައްކާތެރިކަމުގެ ފިޔަވަޅުތަކަށް ހުރިހާ ދިވެހި ރައްޔިތުންވެސް ސަމާލުކަން ދިނުމަށް ވެސް މާލެ ސިޓީ މޭޔަރު ޝިފާ އެދިލެއްވި އެވެ.
މަސްމާރުކޭޓްގައި އިޖުތިމާއީ ގައިދުރުކަން ގާއިމުކޮށް، އުސޫލްތަކެއް ހަދައި އަލުން ހުޅުވާލާއިރު، މިހާރުވެސް މަސްމާރުކޭޓުން މަސްގަތުމުގެ ހިދްމަތް ލިބެއެވެ. ނަމަވެސް މިހިދްމަތްތައް މިހާރު ލިބެމުންދަނީ، ވަރަށް ބޮޑަށް ކޮންޓްރޯލްކޮށްގެން ނެވެ.
ޝިފާ ވިދާޅުވީ މަސްކާރުކޭޓް އަލުން ހުޅުވާލާއިރުވެސް މަސްގަތުމާއި ކެނޑުމުގެ ހިދްމަތް ލިބޭނީ ހެނދުނު 06:00 އިންފެށިގެން ހަވީރު 18:00 އަށް ކަމަށެވެ. އަދި ހަވީރު 18:00 ގެ ފަހުން މާރުކޭޓް ސާފުކުރުމުގެ މަސައްކަތް ކުރެވެމުންދާނެ ކަމަށްވެސް ޝިފާ ވިދާޅުވި އެވެ.
މަސް މާރުކޭޓްގައި މަސް ވިއްކަމުންދާއިރު، އެ ސަރަހައްދުގައި އަޅާފައި އޮންނަ ދޯނި ފަހަރުން މަސް ވިއްކާ އަދި ކަނޑަމުންދާތީ، އާންމު ރައްޔިތުންގެ ޝަކުވާ ވަރަށް ގިނައިން ލިބެމުންދާ ކަމަށް ވެސް މާލެ ސިޓީ މޭޔަރު ޝިފާ ވިދާޅުވި އެވެ. ޝިފާ ވިދާޅުވީ، މަސް މާރުކޭޓްގައި މަސްވިއްކަން ބޭނުންވާ ކޮންމެ މަސްވެރިޔަކަށް އެފުރުސަތު އެބައޮތް ކަމަށާއި އަދި މަސް މާރުކޭޓްގައި މަސް ވިއްކަމުގެ ހުއްދައަށް އެދޭ ފަރާތްތަކަށް އެފާސް ދޫކުރަމުންވެސް ދާ ކަމަށެވެ.
އެސަރަހައްދުގައި އަޅަފައި އޮންނަ ދޯނި ފަހަރުތަކުގައި އުޅޭ މީހުން ފާހާނާކޮށް، ހަދަމުންދަނީ އެ ސަރަހައްދަށް ކަމަށްވާތީ، ދޯނިތަކުން މަސް ވިއްކައި ކަނޑުމަކީ، އާންމު ސިއްހަތަށް ރައްކާތެރި ކަމެއްކަމަށް ނުފެންނަ ކަމެއްކަމަށްވެސް ޝިފާ ވިދާޅުވި އެވެ. އަދި އެކަމުގެ ޝަކުވާ ވަރަށް ގިނައިން ލިބެމުންދާތީ، ހުރިހާ ފަރާތްތަކުންވެސް ކަނޑައަޅާފައިވާ އުސޫލްތަކުގެ ތެރެއިން ރައްޔިތުންނަށް ހިދްމަތް ފޯރުކޮށްދިނުމަށް ޝިފާ ވަނީ އެދިލައްވާފަ އެވެ.
ޝިފާ ވިދާޅުވީ މަސްމާރުކޭޓް ސަރަހައްދު ސާފުތާހިރުކޮށް ބެހެއްޓުމަކީ، މަސްމާރުކޭޓަށް ދާ ފަރާތްތަކުގެ ރައްކާތެރިކަމާއި، އަދި މަހުގެ ތާޒާކަން މަތީ ބެހެއްޓުމަށާއި އާންމު ސިއްހަތު ރައްކާތެރިކަމުގެ ގޮތުން ކޮންމެހެން ކުރަންޖެހޭ ކަމެއްކަމަށެވެ. އެހެންކަމުން ހިދްމަތް ދޭންތިބޭ ފަރާތްތަކުންނާއި ހިދްމަތް ހޯދާ ފަރާތްތަކުން އެކަންކަމަށް ވަރަށް ބޮޑަށް ސަމާލުކަން ދިނުމަށް މާލެ ސިޓީ މޭޔަރު ޝިފާ އެދިލެއްވި އެވެ.
