އިންކަމް ސަޕޯޓް އެލަވަންސްގެ ގޮތުގައި 3.2 މިލިއަން ރުފިޔާ ދޫކޮށްފި
27 ޖޫން 2020 | ހޮނިހިރު 08:20އިކޮނަމިކް ރެސްޕޮންސް ޚަރަދުގެ ގޮތުގައި 303.2 މިލިއަން ރުފިޔާ ވަނީ ޚަރަދުކޮށްފައި
ރިސޯޓު މުވައްޒަފުންނަށް މުސާރަ ނުދޭ މައްސަލައިގައި ވަކަރުފަޅި އައިލެންޑް ރިސޯޓުގެ މުވައްޒަފުން ކުރި މުޒާހަރާގެ ތެރެއިން
ކޮވިޑް-19 އާ ގުޅިގެން އާމްދަނީއަށް އަސަރުކުރި ފަރާތްތަކަށް އިންކަމް ސަޕޯޓް އެލަވަންސްގެ ގޮތުގައި 3.2 މިލިއަން ރުފިޔާ ދޫކޮށްފައިވާ ކަމަށް ފިނޭންސް މިނިސްޓްރީން ހާމަކޮށްފިއެވެ.
ފިނޭންސް މިނިސްޓްރީން އާންމުކޮށްފައިވާ ތަފާސް ހިސާބުތައް ދައްކާގޮތުން ޖޫން މަހުގެ 18 އާ ހަމައަށް އިކޮނަމިކް ރެސްޕޮންސް ޚަރަދުގެ ގޮތުގައި 303.2 މިލިއަން ރުފިޔާ ވަނީ ޚަރަދުކޮށްފައެވެ. މީގެ ތެރެއިން ޖޫން 18 އާ ހަމައަށް އިންކަމް ސަޕޯޓް އެލަވަންސްގެ ގޮތުގައި ދޫކޮށްފައިވަނީ 3.2 މިލިއަން ރުފިޔާއެވެ. އަދި ކޮވިޑް-19 ރިކަވަރީ ލޯނު ސްކީމުގެ ދަށުން 300 މިލިއަން ރުފިޔާ ވަނީ އެކި ފަރާތްތަކަށް ދޫކޮށްފައެވެ.
އިންކަމް ސަޕޯޓް އެލަވަންސް ދިނުމަށް ހަމަޖެހިފައި ވަނީ މިއަހަރުގެ މާޗު މަހުގެ އެއްވަނަ ދުވަހުގެ ފަހުން ވަޒީފާއިން ވަކިކޮށް ނުވަތަ ސަސްޕެންޑް ކޮށްފައިވާ ފަރާތްތަކަށާއި، މުސާރަ ނުލިބޭ ގޮތަށް ޗުއްޓީ (ނޯޕޭ ލީވް) ށް ފޮނުވާފައިވާ ފަރާތްތަކާއި، މުސާރައިގެ ގޮތުގައި ލިބޭ އަދަދުން ބައެއް އުނިކޮށްފައިވާ ފަރާތްތަކަށެވެ.
ފިނޭންސް މިނިސްޓްރީން އާންމުކޮށްފައިވާ ތަފާސް ހިސާބުތައް ދައްކާގޮތުން އިންކަމް ސަޕޯޓް އެލަވަންސް ވަނީ 816 ފަރާތަކަށް ދޫކޮށްފައެވެ. އިންކަމް ސަޕޯޓް އެލަވަންސް ދޫކުރަން ފަށާފައިވަނީ މެއި މަހުގެ 20 ވަނަ ދުވަހުން ފެށިގެންނެވެ.
މީގެ އިތުރުން ރިކަވަރީ ލޯން ސްކީމުގެ ދަށުން މިހާތަނަށް 1،117 ވިތަފާރިއަކަށް ވަނީ ލޯނު ދޫކޮށްފައެވެ. އެގޮތުން ބޭންކް އޮފް މޯލްޑިވްސް މެދުވެރިކޮށް 306 މިލިއަން ރުފިޔާ 244 ފަރާތަކަށް ދޫކޮށްފައިވާއިރު، 879 ފަރާތަކަށް އެސްޑީއެފްސީން ވަނީ 98.9 މިލިއަން ރުފިޔާ ދޫކޮށްފައެވެ.
ކޮވިޑް-19ށް މިހާތަނަށް 963.6 މިލިއަން ރުފިޔާ ވަނީ ޚަރަދުކޮށްފައެވެ. މިއީ ހަފުތާ 7 ނުވަތަ ޖޫން 11 އާ ހަމައަށް ކޮށްފައިވާ ޚަރަދަށްވުރެ 2.2 އިންސައްތަ އިތުރު އަދަދެކެވެ. ޖޫން 11 ވަނަ ދުވަހާ ހަމައަށް ޚަރަދުކޮށްފައިވަނީ 943.1 މިލިއަން ރުފިޔާއެވެ. މީގެ ތެރެއިން ގިނަ ޚަރަދު ހިނގާފައިވަނީ ބޭނުންވާ ސާމާނު ގަތުމަށެވެ. އެގޮތުން ކޮވިޑް-19 އާ ގުޅިގެން ބެނުންވާ ސާމާނު ގަތުމަށް 508.7 މިލިއަން ރުފިޔާ ވަނީ ޚަރަދުކޮށްފައެވެ. އަދި އެކިއެކި ތަންތަނަށް ދައްކަން ޖެހުނު ފައިސާގެ އަދަދު 436.8 މިލިއަން ރުފިޔާއަށް އަރައެވެ.
