ފިއްލަދޫ އިޖުތިމާޢީ މަރުކަޒުގެ މަސައްކަތް ނިންމާލައިފި
އެ މަރުކަޒަށް ބޭނުންވާ ސާމާނު ހޯދުމުގައި ވުޒާރާގެ ފަރާތުން ފުރިހަމަ އެއްބާރުލުން ލިބޭނެ
ހއ. ފިއްލަދޫގައި ގާއިމުކުރި އިޖުތިމާޢީ މަރުކަޒު
ކުޅިވަރާ ބެހޭ ވުޒާރާގެ ފަރާތުން ހއ. ފިއްލަދޫގައި ގާއިމުކުރި އިޖުތިމާޢީ މަރުކަޒުގެ މަސައްކަތް ނިންމާލައިފިއެވެ.
މިކަން އިއުލާން ކުރައްވަމުން ކުޅިވަރާ ބެހޭ ވަޒީރު އަޙްމަދު މަޙްލޫފް ބުދަ ދުވަހު ކުރެއްވި ޓްވީޓެއްގައި ވިދާޅުވީ ފިއްލަދޫގެ ޒުވާނުން ބޭނުންވާ ގޮތަށް އެރަށުގެ އިޖުތިމާޢީ މަރުކަޒުގެ މަސައްކަތް ނިންމާލާފައިވާ ކަމަށެވެ. ހަމައެހެންމެ އެ މަރުކަޒަށް ބޭނުންވާ ސާމާނު ހޯދުމުގައި ވުޒާރާގެ ފަރާތުން ފުރިހަމަ އެއްބާރުލުން ލިބޭނެ ކަމުގެ ޔަގީންކަން މަޙްލޫފް ވަނީ ދެއްވާފައެވެ.
މި މަސައްކަތް ކުރިއަށް ގެންދިޔުމުގައި ފިއްލަދޫ ކައުންސިލާއި އެރަށް ހިމެނޭ ކެލާ ދާއިރާގެ މެންބަރު އިބްރާހީމް ޝަރީފް ވެދެއްވި އެހީތެރިކަމަށް މަޙްލޫފް ވަނީ ޝުކުރު އަދާކުރައްވާފައެވެ.
ކުޅިވަރާ ބެހޭ ވުޒާރާގެ ފަރާތުން އަންނަނީ ޒުވާނުން މުނިފޫހިފިލުވައި ކުޅިވަރު ކުޅެ ހުނަރު އިތުރުކުރުމަށް މަގުފަހި ކުރުމުގެ ގޮތުން ރާއްޖޭގެ އެކި ކަންކޮޅުތަކުގައި އިޖުތިމާޢީ މަރުކަޒުތައް ގާއިމުކުރުމުގެ މަސައްކަތް ކުރަމުންނެވެ. މިއީ ދެ ޖިންސްގެ ޒުވާނުން ވެސް ހަމަހަމަކަމާއެކު ބޭނުންކުރުމުގެ ފުރުސަތު އޮންނަ ގޮތަށް ގާއިމުކުރެވެމުންދާ މަރުކަޒުތަކެއް ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.
