ލޮކްޑައުންގައި އެންމެ މީހަކު 28 ފަހަރު ޖޫރިމަނާ ކުރި: ޕޮލިސް

މާލޭގައި އިއުލާންކޮށްފައިވާ ލޮކްޑައުންގައި މަގުމައްޗަށް ނުކުތުން މަނާކޮށްފައިވާ މުއްދަތުގައި އެންގުމާއި ހިލާފުވި މީހަކު 28 ފަހަރު ޖޫރިމަނާ ކުރެވުނު ކަމަށް ފުލުހުން ހާމަކޮށްފިއެވެ.

ރާއްޖެ ޓީވީގެ ފަލަ ސުރުހީ ޕްރޮގްރާމުގައި ލޮކްޑައުންގައި ފުލުހުންގެ ދައުރު އަދި ދިމާވި ގޮންޖެހުންތަކާއި ގުޅޭގޮތުން މައުލޫމާތު ދެއްވަމުން ސްޕްރިންޓެންޑެންޓް އޮފް ޕޮލިސް ހުސައިން ސަމީރު ވިދާޅުވީ ލޮކްޑައުންގެ ތެރޭގައި އެންމެ މީހަކު 28 ފަހަރު ޖޫރިމަނާ ކުރެވުނު ކަމަށެވެ.

މަގުމައްޗަށް ނުކުތުން މަނާކުރި އިރު، ޖުމްލަ 9361 މީހަކު ޖޫރިމަނާ ކުރިއެވެ. މީގެ ތެރެއިން 8378 މީހަކު ޖޫރިމަނާކުރީ މާލެއިންނެވެ. އަދި ހުޅުމާލެއިން 833 މީހަކު ޖޫރިމަނާ ކުރި އިރު ވިލިމާލެއިން 150 މީހަކު ވަނީ ޖޫރިމަނާ ކޮށްފައެވެ. ލޮކްޑައުންގެ އަމުރާ ހިލާފުވާ ފަރާތްތައް ޖޫރިމަނާ ކޮށްފައިވަނީ 1000 ރުފިޔާއިންނެވެ.

އެހެންކަމުން 28 ފަހަރު ޖޫރިމަނާ ކުރި މީހާ އެކަނި 28،000 ރުފިޔާ ދައްކަން ޖެހެއެވެ. ޖުމްލަ ޖޫރިމަނާ ކޮށްގެން ނުވަ މިލިއަން ތިންލައްކަ ފަސްދޮޅަށް އެއްހާސް ރުފިޔާ ދައުލަތަށް ލިބެން ޖެހެއެވެ.

ސަމީރު ވިދާޅުވީ ލޮކްޑައުންގެ އަމުރާ ހިލާފުވެގެން ހައްޔަރު ކުރި ހުރިހާ އެންމެއްގެ މައްޗަށް ދައުވާ ކުރަން ފޮނުވޭނެ ކަމަށެވެ. ލޮކްޑައުންގެ އަމުރާ ހިލާފުވުމުގެ ސަބަބުން 626 މީހަކު ހައްޔަރު ކޮށްފައިވެއެވެ. މީގެ ތެރެއިން މާލެއިން 576 މީހަކު ހައްޔަރު ކުރެވުނު އިރު، ހުޅުމާލެއިން 47 މީހަކު އަދި ވިލިމާލެއިން 3 މީހަކު ވަނީ ހައްޔަރުކޮށްފައެވެ.