ވީޑިއޯ ކޮންފަރެންސްކޮށް ޝަރީއަތް ކުރިއަށް ގެންދެވޭނެގޮތް ޖިނާއީ އިޖުރާއަތުގެ ގާނޫނު ތަފްސީލް ކުރުން!
22 ޖޫން 2020 | ހޯމަ 07:51އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް ޝަރީއަތް ކުރިއަށް ގެންދުމާގުޅޭ މުހިއްމު ކަންކަން މިބިލްގައި ހިމެނޭ
ދިވެހިރާއްޖޭގެ ސުޕްރީމް ކޯޓުން އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް ޝަރީއަތެއް ކުރިއަށް ގެންދަނީ
އޯޑިއޯ އަދި ވީޑިއޯ ކޮންފަރެންސް މެދުވެރިކޮށް، ޝަރީއަތް ކުރިއަށް ގެންދެވޭނެގޮތް ތަފްސީލްކޮށްދިނުމުގެ ގޮތުން، ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލް ރައްޔިތުންގެ މަޖިލީހުގެ ޖުޑީޝަރީ ކޮމެޓީން ނިންމައިފި އެވެ.
ޖުޑިޝަރީ ކޮމެޓީގެ ރިޕޯޓްގައި ޖިނާއީ އިޖުރާއަތުގެ ގާނޫނަށް އިސްލާހުގެ ގެނައުމުގެ މި ބިލާ ގުޅިގެން ކޮމެޓީން ވެސް ވަނީ ކަމާހެބޭ ފަރާތްތަކުގެ މަޝްވަރާއާއެކު އިސްލާހުތަކެއް ހުށަހަޅުއްވާފަ އެވެ. އެގޮތުން ޖިނާއި އިޖުރާއަތުގެ ގާނޫނުގެ 19 ވަނަ މާއްދާއަށް، ބައެއް އިތުރުކޮށް، އޯޑިއޯ އަދި ވީޑިއޯ ކޮންފަރެންސް މެދުވެރިކޮށް އެއް މާލަމަށްވުރެ ގިނަ މާލަން ގުޅުވާލައިގެން ބޭއްވޭ ކޮންމެ އަޑުއެހުމަކީވެސް، ފަނޑިޔާރެއްގެ ކުރިމަތީގައި ބޭއްވޭ ޝަރީއަތުގެ މަޖިލީހެއްގެ ގޮތުގައި ވަނީ ކަނޑައަޅާފަ އެވެ.
މީގެއިތުރުން، މުހިއްމު ބައެއް އިސްލާހުތަކަށް ބަލާއިރު، ފަނޑިޔާރު ކަނޑައަޅާ ހާއްސަ ހާލަތްތަކުގައި، އަދުލް އިންސާފްގެ ހަމަތައް ނުގެއްލޭނެ ގޮތުގެމަތިން، އަޑުއެހުންތަކާއި ޝަރީއަތްތައް ހިންގާ ކޯޓުގެ މާލަމާއި، މައްސަލައިގައި ހިމެނޭ އެހެނިހެން ފަރާތްތައް ތިބޭ މާލަންތައް، އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް ގުޅުވާލައިގެން، އަޑުއެހުންތަކާއި ޝަރީއަތްތައް ކުރިއަށް ގެންދިއުމުގެ އިހުތިޔާރު ފަނޑިޔާރަށް ލިބިގެން ވެއެވެ. މިގޮތުން ހާއްސަ ހާލަތެއްކަމަށް ފަނޑިޔާރަށް ކަނޑައެޅިދާނެ ކަމަށްވެސް ބުނެފައި ވެއެވެ.
އެގޮތުން، އެއީ ގާނޫނުއަސާސީން ނުވަތަ ގާނޫނަކުން ބާރު ލިބިގެން އިއުލާންކޮށްފައިވާ ކުއްލި ނުރައްކަލުގެ ހާލަތެއް ނުވަތަ ކާރިސާގެ ހާލަތެއްގެ ސަބަބުން ޝަރީއަތުގެ މަޖިިލީހަށް ހާޒިރުވުމުގައި ރައްކާތެރިކަމެއް ނެތުން ކަމަށް ބުނެފައިވެއެވެ. އަދި ޖޯގުރަފީ ގޮތުން ރަށްތަކާއި ސަރަހައްދުތައް އެތުރިފައިވާ ގޮތުގެ ސަބަބުން ދަތުރުފަތުރު ކުރުމަށް، މޫސުމީ ގޮތުންނާއި ޚަރަދުގެ ގޮތުންނާއި ނުވަތަ ޖިނާއީ އަދުލްގެ ނިޒާމު ހިންގުމުގެ އިންތިޒާމުތައް އެރަށެއްގައި ނުވަތަ އެ ސަރަހައްދެއްގައި ގާއިމުކުރެވިފައިވާ ގޮތްތަކަށް އެވަގުތަކު އޮތް ހުރަސްތަކާއި ގޮންޖެހުންތަކަށް ރިއާޔަތްކުރުމާއެކު، އަދި ހުށަހެޅިފައިވާ މައްސަލައެއް ނިންމުމަށް ލަސްވުން މެދުވެރިވެ، އަދުލް އިންސާފު ގާއިމުކުރުމަށް ބުރޫއަރާފާނެ ހާލަތެއް އޮތުން ހިމެނެވެ.
މީގެއިތުރުންވެސް ގިނަ އިސްލާހުތަކެއް ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ކޮމެޓީ ރިޕޯޓްގައި ވެއެވެ.
މި ރިޕޯޓް ހޯމަ ދުވަހުގެ ރައްޔިތުންގެ މަޖިލީހަށް ހުށަހެޅުމާއި ފާސްކުރުމަށް އެޖެންޑާ ކޮށްފައި ވެއެވެ.
