ކޮރޯނާވައިރަސް (ކޮވިޑް-19) އާ ގުޅިގެން ތިން މަސް ދުވަހަށް މެދުކެނޑިފައިވާ ކުޅިވަރުގެ ހަރަކާތްތައް ފެށުމަށް ލުއިތަކެއް ދިނުމާއި ގުޅިގެން، ފުރަތަމަ ފަރިތަކުންތައް ފެށި ޓީމަށް ގައުމީ ކްރިކެޓް ޓީމު ވެއްޖެއެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއި ކުޅިވަރާ ބެހޭ ވުޒާރާ އަދި ސްޕޯޓްސް ކޮމިޝަނުގެ އިރުޝާދާއެކު ގައުމީ ކްރިކެޓް ޓީމުގެ ފަރިތަކުންތައް ހޮނިހިރު ދުވަހުގެ ހަވީރު ފެށިއިރު، ފުރަތަމަ ދެ ހަފުތާއަށް ކުރިޔަށްދާނީ ފިޒްކަލް ޓްރޭނިންގ ކަމަށް ކްރިކެޓް ބޯޑް އޮފް މޯލްޑިވްސްއިން ބުނެއެވެ.

ސްޓޭޑިއަމްގެ އައުޓްޑޯ ނެޓްގައި ކުރިޔަށްދިޔަ ފަރިތަކުންތަކާއި ބެހޭ ގޮތުން ވާހަކަ ދައްކަމުން ކްރިކެޓް ބޯޑުގެ ރައީސް މުޙައްމަދު އަފްލާހް ވިދާޅުވީ ގިނަ ދުވަސްތަކަކަށް ފަހު ގައުމީ ޓީމުގެ ކުޅުންތެރިންގެ ފަރިތަކުންތައް ފެށިގެންދިޔުމަކީ ލިބުނު ވަރަށް ބޮޑު ހިތްހަމަޖެހުމެއް ކަމަށެވެ.

ލޮކްޑައުން ފެށުނީއްސުރެން މަސައްކަތް ކުރީ ސަރުކާރުގެ ކަމާ ބެހޭ ފަރާތްތަކުގެ އިރުޝާދާއެކު ކަމަށާއި، ކްރިކެޓް ޓީމުގެ ފަރިތަކުންތައް ފެށިގެން މިދިޔައީ މުޅި ކްރިކެޓް ބޯޑުގެ ބޮޑު ހިއްސާ އަކާއެކު ކަމަށާއި، އޭގެ ތެރޭގައިވެސް ކޯޗާސް ޓީމުގެ މަސައްކަތް ވަރަށް ބޮޑަށް ފާހަގަކުރާ ކަމަށް އަފްލާހް ވިދާޅުވިއެވެ.

ކްރިކެޓް ބޯޑު އޮތީ ހުރިހާ ކަމަކަށްވެސް އެންމެ ފުރިހަމައަށް ތައްޔާރުވެގެން ކަމަށާއި، މިހާރު އެކުލަވާލާފައިވާ އެސްއޯޕީ އާއެކު މުބާރާތްތައް ފެށުމަށް އެޗްޕީއޭ އާއި ވުޒާރާއިން ހުއްދަދިނުމާއެކު، މުބާރާތްތައް ފެށުމަށްވެސް އޮތީ ތައްޔާރަށް ކަމަށް ކްރިކެޓް ބޯޑުން ބުނެއެވެ.

30 ކުޅުންތެރިންގެ ސްކޮޑަކާއެކު ގައުމީ ކްރިކެޓް ޓީމުގެ ފަރިތަކުންތައް ފެށިގެންދިޔައިރު، ފުރަތަމަ ހަފުތާގައި ކުރިޔަށްދާނީ އެއްވެސް ސާމާނެއް ނެތި، ފަސް ކުޅުންތެރިންގެ ގްރޫޕްތަކަށް ފިޒްކަލް ޓްރޭނިންގ ކަމަށް ގައުމީ ޓީމުގެ ސީނިއާ ކޯޗު ނީޝާމް ނާސިރު ބުންޏެވެ. ބޯޅަ ނެތި ކުޅުންތެރިންގެ ފަރިތަކުންތައް ކުރިޔަށް ގެންދިޔުމަކީ އެހާ ފަސޭހަ ކަމެއް ނޫން ކަމަށާއި، އެހެން ނަމަވެސް އަވަސް މުބާރާތެއް ނެތުމުން މި ވަގުތަށް އެއީ މައްސަލައެއް ނޫން ކަމަށް ކޯޗު ފާހަގަކުރިއެވެ. ލޮކްޑައުން ތެރޭގައިވެސް ގިނަ ކުޅުންތެރިން ގޭގައި ފިޒްކަލް ޓްރޭނިންގ ކުރިޔަށްގެންދިޔައިރު، ބައެއް ކުޅުންތެރިންގެ ކިބައިން ވަރުބަލިކަން ފެނިފައިވަނީ އަނިޔާގައި އުޅުމުން ކަމަށް ކޯޗު ބުންޏެވެ.

ތިން މަސް ދުވަހަށް ފަހު ބައްދަލުވުމުން ކުޅުންތެރިން ބުނީ ގިނަ ދުވަސްތަކެއްގައި ގޭގައި ތިބެން ޖެހުމުން ވަރަށް ބޮޑަށް ފޫހިވެފައިވާ ކަމަށާއި، ކުޅުންތެރިންނާއި ބައްދަލުވުމުން ވަރަށް އުފާވާ ކަމަށެވެ. އައުޓްޑޯ ނެޓްގައި ތިބެ ކުޅުންތެރިން ބުނީ ގިނަ ދުވަސްތަކަށް ފަހު ފަރިތަކުންތަކަށް ނިކުތުމުން ވަރަށް ވަރުބަލިކަން އިހުސާސްވި ނަމަވެސް، ފުރަތަމަ ހަފުތާގައި ލުއި ފަރިތަކުންތަކެއް ކުރިޔަށް ގެންދިއުމަށް ނިންމާފައި ވުމުން، މާ ބޮޑު އުނދަގޫތަކެއް ކުރިމަތި ނުވާނެ ކަމަށެވެ.

މިހާރު އެކުލަވާލާފައިވާ ސްކޮޑަކީ ވަރަށް ވާދަވެރި އަދި އެއް ފެންވަރެއްގެ ކުޅުންތެރިން ހިމެނޭ ސްކޮޑަކަށް ވުމުން ކޮންމެ ކުޅުންތެރިއަކު ވެސް ގިނަ މަސައްކަތްތެއް ކުރަން ޖެހޭނެ ކަމަށާއި، ވަގުތު ފަރިތަކުރުންތައް ފެށުމުން ކޮންމެ ކުޅުންތެރިއަކު ވެސް އެއްމެ ފިޓްކޮށްހުރެ، ގައުމީ ޓީމަށް އެރުމުގެ ފުރުސަތު ލިބިގެންދާނެ ކަމަށް ކުޅުންތެރިން ވަނީ ބުނެފައެވެ.

ޖިމް އާއި ފެތުމާއި ދުވުމާއެކު ކުރިއަށްގެންދާ ފިޒިކަލް ފިޓްނަސް ޕްރޮގްރާމު ކުރިއަށްދަނީ ފަސް ކުޅުންތެރިންގެ ގްރޫޕުތަކަށް ބަހާލައިގެން، އެއް ގްރޫޕް ނިމުމުން އަނެއް ގްރޫޕް ފަރިތަކުންތައް ކުރިޔަށްގެންދާ ގޮތަށެވެ. މި ކުޅުންތެރިން ފަރިތަކުންތަކަށް އައުމުން އެ ކުޅުންތެރިންގެ ހުން ހުންނަ ވަރުބަލައި، އެކަން މޮނީޓަރ ކުރަމުންދެއެވެ. ކުޅުންތެރިންގެ ތަމްރީނުތަކަށް ހަ ކޯޗުން ތިބޭއިރު، މިހާރު އެކުލަވާލާފައިވާ 30 ކުޅުންތެރިންގެ ސްކޮޑު މި ތަމްރީނުތަކުގައި ބައިވެރިވާނެ ކަމަށް ކްރިކެޓް ބޯޑުން ބުނެއެވެ.

ތަމްރީނުތައް މާލޭގައި ފެށުމަށް ހަމަޖެހިފައިވާއިރު، ކްރިކެޓްގެ ޑިވޮލަޕްމަންޓް ޕްރޮގްރާމް ފުޅާދާއިރާއެއްގައި ކުރިއަށްގެންދާ ފުވައްމުލަކާއި ލ. ކުނަހަންދޫގައި ވެސް ހޮނިހިރު ތަމްރީނުތައް ފަށާފައިވާ ކަމަށް ކްރިކެޓް ބޯޑުން ބުނެއެވެ.

މި ދެ ރަށުގައިވެސް ތަމްރީނުތައް ކުރިއަށްގެންދަނީ މާލޭގައި ވެސް ކުރިޔަށްގެންދާ އުސޫލުން، އެޗްޕީއޭއިން އެކުލަވާލާފައިވާ ގައިޑްލައިންތަކާ އެއްގޮތަށް ކަމަށް ކްރިކެޓް ބޯޑުން ބުނެއެވެ.

ގައުމީ ކްރިކެޓް ޓީމު އެންމެ ފަހުން ބައިނަލްއަގުވާމީ މުބާރާތެއްގައި ވާދަކޮށްފައިވަނީ މިއަހަރުގެ ފެބްރުއަރީ މަހުގެ ތެރޭގައެވެ. އެއީ އޭޝިއަން ކްރިކެޓް ކައުންސިލުން އިންތިޒާމުކޮށްގެން އޮމާނުގައި ބޭއްވި ވެސްޓާން ރީޖަން ޓީ20 ކްރިކެޓް މުބާރާތުގައެވެ.

ފިރިހެން ގައުމީ ޓީމުގެ އިތުރުން ފުރަތަމަ ފަހަރަށް ރާއްޖޭގެ އަންހެން ކްރިކެޓް ޓީމެއް ވަނީ މިދިޔަ އަހަރު ސައުތު އޭޝިއަން ގޭމްސްގައި ބައިވެރިވެފައެވެ.