ސްޕެނިޝް ލީގުގައި އޮސަސޫނާ އަތުން އެތުލެޓިކޯ މެޑްރިޑް މޮޅުވީ މެޗުގައި އެތުލެޓިކޯގެ ގޯލްކީޕަރު ޔަން އޮބްލަކް ރެކޯޑެއް ހަދައިފިއެވެ.

އޮސަސޫނާގެ ދަނޑުގައި ކުޅުނު މި މެޗު އެތުލެޓިކޯއިން ކާމިޔާބުކުރީ 5-0 ގެ ނަތީޖާއަކުންނެވެ. މި މެޗާއެކު އޮބްލަކް ވަނީ ބައިކޮޅަށް ލަނޑެއް ނުވައްދާ 100 މެޗު ހަމަކޮށް ރެކޯޑް ހަދާފައެވެ.

މި މެޗު ފަށައިގެން އެތުލެޓިކޯއިން އޮސަސޫނާގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައިވާއިރު، މެޗުގެ 27 ވަނަ މިނެޓުގައި އެތުލެޓިކޯއިން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ޕޯޗުގަލްގެ ޒުވާން ފޯވާޑް ޔާއޯ ފެލިކްސްއެވެ.

މި ލަނޑާއެކު އޮސަސޫނާއިން ކުރިއަށް ޖެހި އެތުލެޓިކޯގެ ގޯލަށް ވަނީ ނުރައްކާ ކޮށްފައެވެ. އެގޮތުން ފުރަތަމަ ހާފު ނިމުމުގެ ކުރިން އޮސަސޫނާގެ ރޮބާޓޯ ޓޮރޭސް ވަނީ ނުރައްކާތެރި ހަމަލާއެއް އެތުލެޓިކޯގެ ގޯލާ އަމާޒުކޮށް ފޮނުވާލާފައެވެ.

މެޗުގެ ދެވަނަ ހާފު ފަށައިގެން އެތުލެޓިކޯއިން އެޓީމުގެ އެޓޭކުތައް އިތުރަށް ވަރުގަދަކުރިއިރު، އެޓީމުން ލީޑު ފުޅާކުރީ މެޗުގެ 56 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ފުރަތަމަ ލަނޑުވެސް ކާމިޔާބުކޮށްދިން ފެލިކްސްއެވެ.

އަދި އެތުލެޓިކޯއިން ކާމިޔާބުކުރި ތިންވަނަ ލަނޑު 79 ވަނަ މިނެޓުގައި މާކޯ ލޮރެންޓޭ ކާމިޔާބުކޮށްދިންއިރު، މެޗުގެ 82 ވަނަ މިނެޓުގައި އެތުލެޓިކޯގެ އަލްވާރޯ މޮރާޓާ ވަނީ އިތުރު ލަނޑެއް ޖަހާފައެވެ. މެޗުގައި އެތުލެޓިކޯއިން ކާމިޔާބުކުރި ފަސްވަނަ ލަނޑު މެޗުގެ 88 ވަނަ މިނެޓުގައި އެޓީމަށް ކާމިޔާބުކޮށްދިނީ ޔަނިކް ކަރަސްކޯއެވެ.

މި ނަތީޖާއާއެކު އެތުލެޓިކޯއިން ވަނީ ސްޕެނިޝް ލީގު ތާވަލުގެ ހަތަރުވަނައަށް ޖެހިލާފައެވެ. އެތުލެޓިކޯއަށް ކުޅުނު 29 މެޗުން ލިބިފައިވަނީ 49 ޕޮއިންޓެވެ. ސްޕެނިޝް ލީގުގެ އެއްވަނައިގައި އޮތް ބާސެލޯނާއަށް 29 މެޗުން 64 ޕޮއިންޓު ލިބިފައިވާއިރު، ދެވަނައިގައި އޮތް ރެއާލް މެޑްރިޑް އޮތީ ކުޅުނު 28 މެޗުން ލިބުނު 59 ޕޮއިންޓާއެކުގައެވެ.