ފަތުރުވެރިންގެ އަތުން އިތުރު ފީއެއް އަދި ޓެކްސްއެއް ނުނެގުމަށް ފާސްކޮށްފި
ކޮމެޓީ ރިޕޯޓްގައި ކޮވިޑް ޓެސްޓްގެ ގޮތުގައި 8 ޑޮލަރު ކޮންމެ ފަތުރުވެރިއެއް، ހޭދަކުރާ ކޮންމެ ރެއަކަށް ނެގުމަށް ނިންމާފައިވޭ
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
މިހާރު ނަގަމުންދާ ޓެކްސްތަކާއި ފީތައް ފިޔަވައި، އިތުރު ޓެކްސްއެއް އަދި އިތުރު ފީއެއް ފަތުރުވެރިންގެ އަތުން ނުނެގުމަށް ރައްޔިތުންގެ މަޖިލީހުން ފާސްކޮށްފި އެވެ.
ބުދަ ދުވަހު ބޭއްވި ރައްޔިތުންގެ މަޖިލީގެ ޖަލްސާގައި މިގޮތަށް ނިންމީ، އިގްތިޞާދީ ކޮމެޓީން ދިރާސާކުރި، މޯލްޑިވްސް ސޭފް ޓޫރިޒަމް ގައިޑްލައިން (އެމްއެސްޓީޖީ)ގެ ފުރަތަމަ ދެލިކޮޕީ އާގުޅޭ ކޮމެޓީގެ ރިޕޯޓަށް އިސްލާހު ހުށަހަޅައި، އެ އިސްލާހާއެކު ކޮމެޓީ ރިޕޯޓަށް ވޯޓަށް އަހައިގެންނެވެ.
ކޮމެޓީ ރިޕޯޓަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ހުށަހެޅުއްވި އެ އިސްލާހުގައި ވިދާޅުވެފައިވަނީ، ކޮމެޓީ ރިޕޯޓުގައިވާ، ދިވެހިރާއްޖެއަށް ޒިޔާރަތްކުރާ ކޮންމެ ފަތުރުވެރިއެއްގެ އަތުން ބޮލަކަށް ކޮންމެ ބެޑް ނައިޓްއަކަށް ޓޫރިޒަމް ކޮވިޑް ޓެކްސްގެ ގޮތުގައި، ކަމާގުޅޭ ޤާނޫނުގެ ދަށުން، 8 އެމެރިކާ ޑޮލަރު ނެގުމަށް ސަރުކާރަށް ހުށަހެޅުމަށް އޮތްއޮތުން އުނިކުރުމަށެވެ. އަދި ކޮވިޑް-19 ރޯގާގެ ކުރިން ފަތުރުވެރިން އައުމަށާއި ފްލައިޓްތައް ޖެއްސުންފަދަ ކަންކަމަށް ނަގަމުންއައި ފީއެއް އަދި ޓެކްސްއެއްގެ އިތުރުން، އެއްވެސް ފީއެއް ނުވަތަ ޓެކްސްއެއް ނުނެގުމަށެވެ. އަދި ކަރަންޓީން ނުވެ ފަތުރުވެރިންނަށް ދިވެހިރާއްޖެއަށް ޒިޔާރާތްކުރެވޭނެ އިންތިޒާމެއް ސަރުކާރުން ހަމަޖެއްސުމަށެވެ.
އަސްލަމްގެ އެހުށަހެޅުން މަޖިލީހުން ފާސްކުރީ 55 މެމްބަރުންގެ އިއްތިފާގުން ނެވެ. އަދި އަސްލަމްގެ އެ އިސްލާހާއެކު ކޮމެޓީ ރިޕޯޓް މަޖިލީހުން ފާސްކޮށްފައިވަނީ 59 މެމްބަރުންގެ އިއްތިފާގުން ނެވެ.
ކޮމެޓީގެ އެ ރިޕޯޓް މަޖިލީހަށް ހުށަހެޅުމާއެކު، ގިނަ މެމްބަރުން ވަނީ، ރާއްޖޭގެ އިގްތިޞާދު ވަރަށް ބޮޑަށް ހީނަރު ވެފައިވާ މިދަނޑިވަޅުގައި، ފަތުރުވެރިންގެ ރާއްޖެއަށް ޒިޔާރަތްކުރުން ޝައުގުވެރިކަން އިތުރުވާނެ ގޮތަކަށް ކަންކަން ބައްޓަން ކުރުން މުހިއްމުކަމުގެ މައްޗަށް ބަހުސް ކުރައްވާފަ އެވެ. އެގޮތުން ފަތުވެރިންގެ އަތުން ގިނަ ފީތަކެއް މިދަނޑިވަޅުގައި ނެގުމަކީ ފަރުވެރިކަމަށް ނޭދެވޭ އަސަރުކާރުނެ ކަމެއްކަމަށް ވެސް މެމްބަރުން ވިދާޅުވަމުން ގެންދެވި އެވެ.
މަޖިލީހުގެ ރައީސް ވިދާޅުވީ، މި ރިޕޯޓަކީ ވަރަށް މުހިއްމު އަދި މިއަދުން މިއަދަށްވެސް ނިންމަންޖެހޭ ރިޕޯޓެއްކަމަށްވާތީ، މި ރިޕޯޓާމެދު މެމްބަރުންގެ މެދުގައި ހިޔާލު އެއްގޮތްކޮށް، މެމްބަރުންނަށް ފެންނަ ހިޔާލެއް ހުށަހެޅުއްވުމަށެވެ. ކޮމެޓީގެ އެރިޕޯޓާ ގުޅިގެން، އިތުރު އިސްލާހުތަކެއް މަޖިލީހުގެ މެމްބަރުން ހުށަހަޅުއްވަމުން ގެންދަވާތީ، ހުޅުދޫ ދާއިރާގެ މެމްބަރު އިލްޔާސް ލަބީބް ވިދާޅުވީ، މުޅި މަޖިލިސް ކޮމެޓީއަކަށް ގޮސް، މި ރިޕޯޓަށް އިސްލާހު ހުށަހެޅުމަށާއި ބަހުސް ކުރުމަށް ހުށަހަޅުއްވާ ކަމަށެވެ. މަޖިލީހުގައި އެކަމަށް ވޯޓަށް އެހުމުން ވޯޓުގައި ބައިވެރިވެވަޑައިގެންނެވި 62 މެމްބަރުންގެ އިއްތިފާގުން ވަނީ ފާސްކޮށްފަ އެވެ.
އެގައިޑްލައިނާ ގުޅޭގޮތުން ކޮމެޓީ ރިޕޯޓްގައި ބުނެފައިވަނީ، ޓޫރުޒަމް މިނިސްޓްރީން އެކުލަވާލި މޯލްޑިވްސް ސޭފް ޓޫރިޒަމް ގައިޑްލައިން (އެމްއެސްޓީޖީ)ގެ ފުރަތަމަ ދެލިކޮޕީގެ ބަދަލުގައި މިހާރު މަޝްވަރާ ކުރެވެމުންދަނީ ތިންވަނަ ދެލިކޮޕީއާމެދު ކަމަށް ޓޫރިޒަމް މިނިސްޓްރީބް މައުލޫމާތު ދީފައިވާ ކަމަށެވެ. އެގޮތުން، ކޮމެޓީން ފާސްކޮށްފައިވަނީ، އަލުން ފަތުރުވެރިކަން ހުޅުވާލުމަށް އެކުލަވާލާއި ގައިޑްލައިންގައި އިގްތިޞާދީ ކޮމެޓީން ނިންމާފައިވާ ނިންމުންތަކަށް ވެސް ރިއާޔަތް ކުރުމަށްފަހު، އެގައިޑްލައިން އެކުލަވާލުމަށް ސަރުކާރަށް ލަފާ ދިނުމަށެވެ.
އިގްތިޞާދީ ކޮމެޓީއަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އާއި މާފަންނު މެދު ދާއިރާގެ މެމްބަރު ހަސަން ޒަރީރު އަދި ހިންނަވަރު ދާއިރާގެ މެމްބަރު ޖީހާން މަހުމޫދު ހިއްސާ ކުރައްވާފައިވާ ހިޔާލުތައް ޓޫރިޒަމް މިނިސްޓްރީއަށް ހިއްސާކުރުމަށްވެސް އިގްތިޞާދީ ކޮމެޓީގެ ރިޕޯޓްގައި ވެއެވެ.
