އެކައުންޓިންގ ދާއިރާގައި ހުރި ފުރުސަތުތަކަށް އަލިއަޅުވާލުމަށް ޚާއްސަ ވެބިނާއެއް ބާއްވަނީ
މި ވެބިނާގައި އެކައުންޓިންގ ދާއިރާގައި ގިނަ އަހަރުތަކަކަށް ޚިދުމަތް ކުރައްވާފައިވާ އަދި ދާއިރާގައި އިސްކޮށް ހަރަކާތްތެރިވެލައްވާ ބޭކަނބަލުން ބައިވެރިވާނެ
އަންހެން ބޭކަނބަލުންގެ ތަޖުރިބާގެ އަލީގައި އެކައުންޓިންގ ދާއިރާގައި މަސައްކަތް ކުރާ ފަރާތްތަކާއި ދަރިވަރުންނަށް ހާއްސަކޮށްގެން ބާއްވާ ވެބިނާ އޮންނާނީ ބުރާސްފަތި ދުވަހު
ދިވެހިރާއްޖޭގައި އެކައުންޓިންގ ދާއިރާގައި މަސައްކަތް ކުރާ ފުންނާބު އުސް އަންހެން ބޭކަނބަލުންގެ ތަޖުރިބާގެ އަލީގައި މި ދާއިރާގައި މަސައްކަތް ކުރާ ފަރާތްތަކާއި ދަރިވަރުންނަށް ހާއްސަކޮށްގެން މި ޕްރޮފެޝަންއާބެހޭ މައުލޫމާތު ދިނުމަށް ޚާއްސަ ވެބިނާއެއް ބޭއްވުމަށް އޮޑިޓަރ ޖެނެރަލްގެ އޮފީހުން ނިންމައިފިއެވެ.
އޮޑިޓަރ ޖެނެރަލްގެ އޮފީހުގެ އިންސްޓްޓިއުޓް އޮފް އޮޑިޓް އެންޑް އެޝޫރެންސްއިން އިންތިޒާމް ކޮށްގެން ބާއްވާ މި ވެބިނާގައި އެކައުންޓިންގ ދާއިރާގައި ގިނަ އަހަރުތަކަކަށް ޚިދުމަތް ކުރައްވާފައިވާ އަދި ދާއިރާގައި އިސްކޮށް ހަރަކާތްތެރިވެލައްވާ ބޭކަނބަލުން ބައިވެރިވެވަޑައިގަންނަވާނެއެވެ.
މި ވެބިނާގައި އެ ބޭކަނބަލުންގެ ތަޖުރިބާ އާއި މަސައްކަތުގެ މާޙައުލުގައި ކުރިމަތިވި ގޮންޖެހުންތައް ހިއްސާ ކުރެވިގެން ދާނެއެވެ. އަދި އެކައުންޓިންގ ދާއިރާގައި މަސައްކަތް ކުރާ ފަރާތްތަކާއި އަލަށް ދާއިރާއަށް ވަނުމަށް ޝައުގުވެރިވާ ފަރާތްކަތަށް ހުރި ފުރުސަތުތަކަށް އަލި އަޅުވާލެވިގެން ދާނެއެވެ.
ބުރާސްފަތި ދުވަހުގެ ރޭ 8:30ން 10:00ށް ބާއްވާ މި ވެބިނާގައި ސަރުކާރުގެ މިނިސްޓްރީތަކާއި އޮޑިޓް ފާމްތަކުގެ އިތުރުން ކުންފުނިތަކުގެ އެކައުންޓިންގ ދާއިރާގެ މަތީ މަޤާމްތަކުގައި ތިއްބެވި ތަޖުރިބާކާރު އަންހެން ބޭކަނބަލުން ބައިވެރިވެވަޑައިގަންނަވާނެއެވެ.
އޮޑިޓަރ ޖެނެރަލްގެ އޮފީހުން ބުނިގޮތުގައި މިއީ އެ އޮފީހުން ކޮވިޑް-19 ގެ ސަބަބުން ވިޔަފާރިތަކާއި، އެކައުންޓެންޓުންނާއި އޮޑިޓަރުން އަދި މުޖުތަމަޢަށް ދިމާވެފައިވާ ގޮންޖެހުންތަކުން އަރައިގަތުމަށް ކުރެވޭނެ މަސައްކަތްތައް ދެނެގަތުމުގެ މަޤްޞަދުގައި ކުރިއަށް ގެންދިޔަ ސީރީޒްގެ އެންމެ ފަހު ވެބިނާއެވެ. މީގެ ކުރިން މި ސީރީޒްގެ 8 ވެބިނާއެއް ވަނީ ބާއްވާފައެވެ.
