ކުޅުން ހުއްޓާލާކަށް ނޫޅެން: ކިއަލީނީ

މި ސީޒަނަށް ފަހު ކުޅުން ހުއްޓާލަން ނޫޅޭ ކަމަށް ޔުވެންޓަސްގެ ކެޕްޓަން ޖިއޯޖިއޯ ކިއަލީނީ ބުނެފިއެވެ.

ޔުވެންޓަސް އާއި އިޓަލީ ގައުމީ ޓީމުގެ ކެޕްޓަން އަދި އިތުބާރު ޑިފެންޑަރު ވަނީ މިދިޔަ އަހަރުގެ އޮގަސްޓް މަހުގެ ފަހުކޮޅު ފަރިތަކުރުންތަކުގެ ތެރެއިން ކަކުލަށް ލިބުނު ސީރިއަސް އަނިޔާއަކުން ރަނގަޅުވުމަށް އޮޕަރޭޝަނެއް ކޮށްފައެވެ. އެ އަނިޔާއާ ގުޅިގެން ހަ މަސް ދުވަހު ކުޅުމާ ދުރުގައި ކިއަލީނީ ހުންނަށް ޖެހުނުއިރު، އޭނާގެ ކުޅުމުގެ ތެރެއަށް އައީ މިއަހަރުގެ ފެބްރުއަރީ މަހުގެ ތެރޭގައެވެ.

އުމުރުން 35 އަހަރުގެ ކިއެލީނީ ބުނީ މީގެ 10 އަހަރު ކުރިން އެ އަނިޔާ އޭނާއަށް ކުރިމަތިވިނަމަ، އެކަމާ މާބޮޑަށް ކަންބޮޑުވާން ޖެހުނީސް ކަމަށެވެ. އޭނާ ބުނީ އުމުރުން 35 އަހަރުވިއރު ލިބުނު ތަޖުރިބާތަކަށް ވިސްނާއިރު އެ އަނިޔާއިން އަރައިގަތުމަށް ފަސޭހަ ވެގެންދިޔަ ކަމަށާއި، މި ސީޒަނަށްފަހު ކުޅުން ހުއްޓާލަން ނުވިސްނާ ކަމަށެވެ. އަދި ކުރިން މި އަހަރު ބާއްވާ ގޮތަށް އޮތް ޔޫރޯ ފުޓްބޯޅަ މުބާރާތް އަންނަ އަހަރަށް ފަސްކުރުމުން، އެ މުބާރާތުގައިވެސް ކުޅެން ގަސްތުކުރާ ކަމަށްވެސް ކިއަލީނީ ވަނީ ބުނެފައެވެ.

ލިވޯނޯއިން މީގެ 20 އަހަރު ކުރިން ކެރިއަރު ފަށައި ރޯމާ އާއި ފިއޮރެންޓީނާއަށްވެސް ކުޅުނު ކިއެލީނީ އަކީ 2005ން ފެށިގެން ޔުވެންޓަސްގެ މުހިއްމު ކުޅުންތެރިޔެކެވެ. އަދި ފަބިއޯ ކަނަވާރޯ ކުޅުން ހުއްޓާލި ހިސާބުން ފެށިގެން، އޭނާއަކީ އިޓަލީގެ އެންމެ އިތުބާރު ޑިފެންޑަރެވެ. ޔުވަންޓަސްއަށް މިހާތަނަށް 509 މެޗު ކުޅެދީފައިވާ ކިއެލީނީ ވަނީ ގައުމީ ޓީމަށް 2004ން ފެށިގެން 103 މެޗު ކުޅެދީފައެވެ.