އާސެނަލްގައި މަޑުކުރުމާއިމެދު ގޮތެއް ނިންމުމަކީ ކެރިއަރުގެ އެންމެ މުހިއްމު ނިންމުން ކަމަށް އެޓީމުގެ ކެޕްޓަން ޕިއޭ-އެމެރިކް އޮބަމަޔަން ބުނެފިއެވެ.

ގެބޮންއަށް އުފަން އުމުރުން 30 އަހަރުގެ އޮބަމަޔަން ހޯދުމަށް ޗެލްސީ އާއި ބާސެލޯނާއިން އަންނަނީ މަސައްކަތް ކުރަމުންނެވެ.

އޮބަމަޔަން މި ވަގުތު އާސެނަލްގެ އެއްބަސްވުމުގައި ހުރީ 2021 ވަނަ އަހަރުގެ ހޫނު މޫސުމުގެ ނިޔަލަށެވެ. އާސެނަލުން އޮބަމަޔަންއަށް އައު އެއްބަސްވުމެއް ދޭން މިހާތަނަށް ކުރި މަސައްކަތް ކާމިޔާބެއްނުވިއެވެ. އެހެންކަމުން މި ސީޒަނަށްފަހު އޮބަމަޔަން ވިއްކާލަން އާސެނަލުން މިހާރު މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ.

ދާދި ފަހުން އޮބަމަޔަން ބުނީ، އާސެނަލްގައި މަޑުކުރުމާއިމެދު އަދި ވަކިގޮތެއް ނުނިންމާ ކަމަށެވެ. އަދި އެ ނިންމުން ވެގެންދާނީ އޭނާގެ ކެރިއަރުގެ އެންމެ މުހިންމު ނިންމުމަށް ކަމަށް ބުންޏެވެ. މީގެ ކުރިން ގެބެނީސް ފުޓްބޯލް ފެޑެރޭޝަނުގެ ރައީސް ޕިއޭ އެލައިން މޯންގުއެންގިއު ވަނީ އާސެނަލްގައި އޮބަމަޔަން ފެއިލްވަމުންދާތީ ކްލަބު ބަދަލުކުރަން ގޮވާލައްވާފައެވެ.

އޮބަމަޔަން ހޯދަން ޗެލްސީ އާއި ބާސާއިންވެސް މަސައްކަތް ކުރަމުން އަންނައިރު، މިފަހަރުގެ ފިނި މޫސުމުގެ ޓްރާންސްފާ ބާޒާރުގައި އޮބަމަޔަން ހޯދަން ބާސާއިން ކުރި މަސައްކަތް ވަނީ ނާކާމިޔާބުވެފައެވެ. އެކަމަކު އޮބަމަޔަންއަށް ބާސާއިން އަދިވެސް ޝައުގުވެރިވާ ކަމަށާއި، މި ސީޒަން ނިމުމުން އޮބާމަޔަން ހޯދަން 50 މިލިއަން ޔޫރޯގެ ބިޑެއް ކުރަން ބާސާ އޮތީ ތައްޔާރަށް ކަމަށް ރިޕޯޓުތައް ބުނެއެވެ.

މީގެ ދެ އަހަރު ކުރިން ބޮރޫޝިއާ ޑޯޓްމުންޑް ދޫކޮށް 63 މިލިއަން ޔޫރޯއަށް އާސެނަލަށް ސޮއިކުރި އޮބަމަޔަން ވަނީ މިހާތަނަށް އެޓީމަށް ކުޅެދިން 96 މެޗުގައި 61 ލަނޑު ޖަހާފައެވެ.