ކުރިއަށް އޮތް ޓްރާންސްފާ ބާޒާރުގައި ބާސެލޯނާގެ ބްރެޒިލްގެ މިޑްފީލްޑަރު ފިލިއްޕޭ ކުޓީނިއޯ ބޭނުންވަނީ އޭނާގެ ކުރީގެ ކްލަބު، ލިވަޕޫލަށް ބަދަލުވާން ކަމަށް ރިޕޯޓުތައް ބުނެފިއެވެ.
އުމުރުން 27 އަހަރުގެ ކުޓީނިއޯ ބަޔާން މިއުނިކަށް ކުޅެމުން އަންނަނީ ބާސެލޯނާގެ ލޯނު އެއްބަސްވުމެއްގެ ދަށުންނެވެ. މި ސީޒަން ނިމުމުން ބަޔާންގެ ލޯނު އެއްބަސްވުން ހަމަވާއިރު، ބަޔާނުން ބޭނުންވެއްޖެނަމަ ކުޓީނިއޯ ދާއިމީކޮށް 110 މިލިއަން ޕައުންޑަށް ގަނެވޭ ގޮތަށް އެއްބަސްވުމުގައި ވަނީ ހިމަނާފައެވެ. އެކަމަކު ބަޔާނުން ވަނީ ކުޓީނިއޯ ނުގަންނަން ނިންމާފައެވެ.
ރިޕޯޓުތައް ބުނާ ގޮތުން ލޯނު އެއްބަސްވުން ހަމަވުމުން، އަންނަ ސީޒަނުގައި ކުޓީނިއޯ ބާސާއަށް އަލުން ބަދަލުވާނެއެވެ. އެކަމަކު ބާސާއިން އޭނާ ވިއްކާލާނެ ކަމަށް ބެލެވޭއިރު، އާސެނަލާއި މެންޗެސްޓާ ޔުނައިޓެޑް އަދި ޗެލްސީން އަންނަނީ ކުޓީނިއޯ ގަތުމަށް މަސައްކަތް ކުރަމުންނެވެ.
މީގެ ކުރިން ކުޓީނިއޯގެ އޭޖެންޓް ވަނީ އިނގިރޭސި ޕްރިމިއާ ލީގަށް ބަދަލުވާން ކުޓީނިއޯ ބޭނުންވާ ކަމަށް ބުނެފައެވެ. ރިޕޯޓުތައް ބުނާގޮތުން އަންނަ ސީޒަނުގައި ކުޓީނިއޯ ބޭނުންވަނީ އަލުން ލިވަޕޫލަށް ބަދަލުވާށެވެ. އަދި އެކަމަށްޓަކައި މަސައްކަތް ކުރަން ކުޓީނިއޯ ވަނީ އޭނާގެ އޭޖެންޓްގެ ކިބައިން އެދިފައެވެ.
އެކަމަކު އަލުން ކުޓީނިއޯ ލިވަޕޫލާ ގުޅުމުގެ ފުރުސަތެއް އޮތްތޯ ތަކުރާރުކޮށް ލިވަޕޫލްގެ ކޯޗު ޔާގެން ކްލޮޕާ އެކި އިންޓަވިއުތަކުގައި ނޫސްވެރިން ސުވާލުކުރުމުންވެސް އޭނާ ވަނީ އެ ފުރުސަތު އޮތް ކަމަށް ގަބޫލުނުކުރާ ކަމަށް ބުނެފައެވެ.
ލިވަޕޫލުން ވިދާލި ކުޓީނިއޯ ވަނީ އެ ކްލަބުގައި ހަ ސީޒަން ހޭދަކޮށްފައެވެ. އަދި ވަނީ ލިވަޕޫލަށް ކުޅެދިން 201 މެޗުގައި 54 ލަނޑު ޖަހާފައެވެ. އެކަމަކު 2018 ވަނަ އަހަރުގެ ޖެނުއަރީ މަހު ލިވަޕޫލުން 142 މިލިއަން ޕައުންޑަށް ބާސާއަށް ބަދަލުވި ކުޓީނިއޯއަށް އެ ކްލަބުގައި އެންމެ އެދެވޭ ކުޅުން ދެއްކިފައެއް ނުވެއެވެ. އެގޮތުން ކުޓީނިއޯ ބާސާގައި ކުޅުނު 76 މެޗުގައި ޖެހިފައިވަނީ 21 ލަނޑެވެ. އޭގެ ފަހުން ލޯނު އެއްބަސްވުމެއްގެ ދަށުން ބަޔާނަށް ބަދަލުވިއިރު، އެ ޓީމުގައިވެސް މިހާތަނަށް އެންމެ އެދެވޭ ކުޅުމެއް ދެއްކިފައެއް ނުވެއެވެ.
