ލުތުފީއަށް ގާނޫނީ ވަކީލެއް އައްޔަން ކުރަން 10 ދުވަސް ދީފި
14 ޖޫން 2020 | އާދީއްތަ 08:30ގާނޫނީ ވަކީލެއް އައްޔަން ކުރަން 10 ދުވަސް
ހ. ހާޖަރާގެ ޢަބްދުﷲ ލުޠުފީ- އޭނާ ރާއްޖެ ގެނައި ދުވަހު އެއާޕޯޓް ތެރެއިން ނަގާފައިވާ ފޮޓޯއެއް
ފަހުގެ ތާރީޚެއްގައި ރާއްޖެއަށް ދިން ޢުދުވާނީ ހަމަލާގެ މޭސްތިރިޔާ ހ. ހާޖަރާގެ ޢަބްދުﷲ ލުޠުފީ ފިލި މައްސަލައިގައި އޭނާގެ މައްޗަށް އުފުލާފައިވާ ދައުވާއާ ގުޅިގެން އޭނާއަށް ގާނޫނީ ވަކީލަކާއެކު އެމައްސަލާގައި ކުރިއަށް ދިއުމުގެ ފުރުސަތު ދީފި އެވެ.
ވީޑިއޯ ކޮންފަރެންސް މެދުވެރިކޮށް، ކްރިމިނަލް ކޯޓުގައި ކުރިއަށް ގެންދިޔަ ފުލުފީ ފިލި މައްސަލައިގެ ޝަރީއަތުގެ އަޑުއެހުމުގައި އޭނާ އަށް ގާނޫނީ ވަކީލެއް އައްޔަން ކުރުމަށް 10 ދުވަހުގެ ފުރުސަތެއް މިމައްސަލަ ބައްލަވާ ގާޒީ އަލީ ރަޝީދު ހުސައިން ވަނީ ދެއްވާފަ އެވެ. އަދި ލުތުފީއަށް ގާނޫނީ ވަކީލެއް ހަމަޖެއްސުމަށްޓަކައި މޯލްޑިވްސް ކަރެކްޝަނަލް ސަރވިސް ކުރަންޖެހޭ ކަންކަން ކޮށްދެއްވުމަށް އަންގަވާނެ ކަމަށްވެސް ގާޒީ ވިދާޅުވި އެވެ.
މިމައްސަލަ ތާވަލް ކޮށްފައިވަނީ، އާދިއްތަ ދުވަހުގެ 11:00 އަށެވެ. އަދި ޝަރީއަތުގެ އަޑުއެހުން ކުރިއަށް ގެންގޮސްފައިވަނީ، ކ. މާފުށީ ޖަލުގައި ހުރި ލުތުފީ މާލެ ގެނައުމުގެ ބަދަލުގައި، މާފުށި މެޖިސްޓްރޭޓް ކޯޓަށް ހާޒިރުކޮށް، ކްރިމިނަލް ކޯޓުގެ ގާޒީ މާލޭގައި ހުންނަ ކްރިމިނަލް ކޯޓުގައި އިންވައި، އަދި ޕްރޮސެކިއުޓަރ ޖެނެރަލްގެ އޮފީހުގެ ގާނޫނީ ވަކީލު ވެސް ކޯޓަށް ވަޑައިގަތުގެ ބަދަލުގައި، ގޭގައި ހުންނަވައިގެން ވީޑިއޯ ކޮންފަރެންސް މެދުވެރިކޮށެވެ.
ކްރިމިނަލް ކޯޓު ހިންގެވުމާއި ހަވާލުވެހުންނެވި، ގާޒީ އަލީ ރަޝީދު ހުސައިން ވަނީ، އާދިއްތަ ދުވަހުގެ އަޑުއެހުމުން ފެށުމުގެ ގޮތުން، ވީޑިއޯ ކޮންފަރެންސްކޮށް ޝަރީއަތް ކުރިއަށް ގެންދަން ލުތުފީ ދެކޮޅު ހަދަންތޯ ލުތުފީ ކުރެން ސުވާލު ކުރައްވާފަ އެވެ. ޖަވާބުގައި އޭނާ ބުނީ ވީޑިއޯ ކޮންފަރެންސްކޮށް ޝަރީއަތް ކުރިއަށް ގެންދިއުމަށް އޭނާގެ އެއްވެސް މައްސަލައެއް ނެތް ކަމަށެވެ.
އާދިއްތަ ދުވަހުގެ އަޑުއެހުން ނިންމާލައްވާފައިވަނީ، ދެން އޮންނަ އަޑުއެހުމުގައި ލުތުފީގެ މައްޗަށް ކުރާ ދައުވާއަށް ޖަވާބުދާރީވާން ޖެހޭނެކަން އިއުލާން ކުރެއްވުމަށް ފަހުގަ އެވެ.
ރާއްޖެއަށް ދިން ޢުދުވާނީ ހަމަލާގެ މޭސްތިރިޔާ ލުތުފީ، 25 އަހަރުގެ ޖަލު ޙުކުމެއް ތަންފީޒު ކުރަމުން ދަނިކޮށް، ބޭސްފަރުވާއަށް ރާއްޖެއިން ބޭރަށް ދިޔަގޮތަށް ފިލި މައްސަލާގައި އޭނާގެ މައްޗަށް އުފުލާފައިވަނީ "މީހުން ބަންދުކުރާ މަރުކަޒަކުން ފިލުމުގެ ކުށުގެ ދައުވާ" އެވެ. މި ދައުވާ ލުތުފީގެ މައްޗަށް އުފުލާފައިވަނީ މިއަހަރުގެ މާރޗު މަހުގެ 2 ވަނަ ދުވަހުއެވެ.
1988 ވަނަ އަހަރުގެ ނޮވެންބަރު މަހުގެ ތިން ވަނަ ދުވަހު ލުޠުފީ އިސްވެ ހުރެ ބޭރުގެ ކުލީ ސިފައިން ރާއްޖެ ގެނެސްގެން ދިން ރަހުމް ކުޑަ ޢުދުވާނީ ޙަމަލާގައި 19 ދިވެއްސަކު ޝަހީދު ކޮށްލިއެވެ.
އެ ޙަމަލާއާ ގުޅިގެން ލުޠުފީ މަރަން ޙުކުމްކުރި އެވެ. ނަމަވެސް އޭރުގެ ސަރުކާރުން އޭނާގެ އަދަބު ލުއިކޮށްދީ އުމުރު ދުވަހުގެ ޖަލު ޙުކުމަކަށް ބަދަލުކުރިއެވެ. ލުޠުފީ ފިލައިގެން ދިޔައީ، ރައީސް ނަޝީދުގެ ސަރުކާރުގައި ބޭސް ފަރުވާއަށް ޤައުމުން ބޭރަށް ފޮނުވާލުމުންނެވެ. އޭގެފަހުން ވެރިކަމަށް އަރާވަޑައިގެންނެވި މުޙައްމަދު ވަހީދު ހަސަންމަނިކާއު، ކުރީގެ ރައީސް ޢަބްދުﷲ ޔާމީނުގެ ވެރިކަމުގައި ވެސް ލުޠުފީ ހޯދާ ރާއްޖެ ގެނެވިފައެއް ނުވެއެވެ.
އޭނާ ރާއްޖެ ގެނައީ ލަންކާގައި ދިން ޓެރަރިސްޓް ޙަމަލާތަކުގައި، މުޅި ލަންކާ، އެޤައުމުގެ ސިފައިން ބަލާފަސްކުރުމުގެ ތެރެއިން، އޭނާ އަމިއްލައަށް ލަންކާގައި ހުންނަ ރާއްޖެ އެމްބަސީއާ ޙަވާލުވުމުން ނެވެ. އަދި އޭނާ ވަނީ ފުލުހުންގެ ބެލުމުގެ ދަށުން ރާއްޖެ ގެނެސް، ޙުކުމުގެ ބާކީ ބައި ތަންފީޒުކުރުމަށް މާފުށީ ޖަލަށް ފޮނުވާފައެވެ.
