ރާއްޖޭގެ ކޮވިޑުގެ ހާލަތު: މިއަދު ރިޕޯޓްކުރެވުނީ ޕޮޒިޓިވް 10 ކޭސް، ބަލިން ފަސޭހަވީ 24 މީހަކު
13 ޖޫން 2020 | ހޮނިހިރު 17:23ޕޮޒިޓިވްވި މީހުންގެ ތެރޭގައި 1 ދިވެއްސަކު ހިމެނޭ
ކޮވިޑަށް ސާމްޕަލް ނެގުމުގެ މަސައްކަތް ކުރަމުންދަނީ؛ މިހާތަނަށް 2013 މީހަކު ވަނީ ޕޮޒިޓިވްވެފައި
ފާއިތުވި 24 ގަޑިއިރުގެ ތެރޭގައި ރާއްޖެއިން ކޮވިޑް-19ށް ޕޮޒިޓިވްވެފައިވަނީ 10 މީހެއް ކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރުން ހާމަކޮށްފިއެވެ.
ޕޮޒިޓިވްވި މީހުންގެ ތެރޭގައި ހިމެނެނީ ދިވެއްސަކާއި، ބަންގްލަދޭޝްއަށް ނިސްބަތްވާ 7 މީހެއްގެ އިތުރުން ނޭޕާލުގެ 2 މީހެކެވެ. އެއާއިއެކު ރާއްޖެއިން ކޮވިޑް-19 ޖެހުނު މީހުންގެ އަދަދު ވަނީ 2013ށް އަރާފައެވެ.
މީގެއިތުރުން، އިތުރު 24 މީހަކު ބަލިން ފަސޭހަވުމާއިއެކު ބަލިން ރަނގަޅުވި ޖުމްލަ މީހުންގެ އަދަދު ވަނީ 1217ށް އަރާފައެވެ. އެޗްޕީއޭގެ ތަފާސް ހިސާބުތައް ދައްކާގޮތުން ރާއްޖެއިން ކޮވިޑް-19ށް ފަރުވާ ހޯދަމުންދަނީ ޖުމްލަ 786 މީހުންނެވެ.
އިތުރު 10 މީހަކު ކޮވިޑަށް ޕޮޒިޓިވްވިއިރު، ލޮކްޑައުންއަށް ލުއި ދިނުމުގެ ދެވަނަ ފިޔަވަހި ފެށުމަށް ސަރުކާރުން އަންނަނީ ތައްޔާރުވަމުންނެވެ. އެގޮތުން ޖޫން މަހުގެ 15ވަނަ ދުވަހުން ފެށިގެން ދެވަނަ ފިޔަވަހި ފަށައިގަންނާނެކަމަށް ސަރުކާރުން ހާމަކުރެއެވެ. ދެވަނަ ފިޔަވަހީގައި ކަނޑައެޅިފައިވާ ވަގުތުތަކުގައި، ހުއްދަ ނެގުމަކާއި ނުލާ ބޭރަށް ނިކުތުމުގެ ހުއްދަ ހުރިހާ ފަރާތްތަކަށް ލިބިގެންދާނެއެވެ.
