ޕާކިސްތާންގެ ކުރީގެ ކުޅަދާނަ އޯލްރައުންޑާ ޝާހިދު އަފްރީދީ ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެ އެވެ.

ހޮނިހިރު ދުވަހު އަފްރީދީ ކުރި ޓްވީޓެއްގައި އޭނާ ވަނީ ކޮވިޑް-19ށް ޕޮޒިޓިވް ވިކަން ހާމަކޮށްފައެވެ. އޭނާ ބުނީ ބުރާސްފަތި ދުވަހުން ފެށިގެން އޭނާ ބަލިވެ އުޅޭ ކަމަށާއި، އެހެންކަމުން ކުރި ޓެސްޓުން ކޮވިޑް-19ށް ޕޮޒިޓިވް ވެފައިވާ ކަމަށެވެ. މި ޓްވީޓުގައި އަފްރީދީ ވަނީ އޭނާއަށް ހެޔޮ ދުޢާ ކޮށްދިނުމަށް އެދިފައެވެ.

ޕާކިސްތާންގެ ކުރީގެ މަޝްހޫރު ކްރިކެޓް ކުޅުންތެރިޔާ އަފްރީދީ ބައިނަލްއަގުވާމީ ކްރިކެޓުން ރިޓަޔާ ކޮށްފައިވަނީ 21 އަހަރަށް ފަހު 2017 ވަނަ އަހަރުގެ ތެރޭގައެވެ. އަދި އުމުރުން މިހާރު 40 އަހަރުގެ އަފްރީދީ ވަނީ 2010 ވަނަ އަހަރު ޓެސްޓް ކްރިކެޓުން ރިޓަޔާ ކޮށްފައެވެ. އަދި 2015 ވަނަ އަހަރު ވަންޑޭ އިންޓަނޭޝަނަލް ކުޅުން ހުއްޓާލުމަށް ފަހު 2016 ވަނަ އަހަރު އޭނާ ވަނީ ޕާކިސްތާންގެ ޓްވެންޓީ20 ޓީމުގެ ކެޕްޓަން ކަމުން ވެސް އިސްތިއުފާ ދީފައެވެ.

އަފްރީދީ އަކީ 2009 ވަނަ އަހަރު އައިސީސީ ވޯލްޑް ޓްވެންޓީ20 މުބާރާތް ކާމިޔާބުކުރި ޕާކިސްތާން ޓީމުގެ މުހިއްމު ކުޅުންތެރިއެކެވެ. އޭނާ ވަނީ އެ މުބާރާތުގައި ތަފާތު މޮޅު ކުޅުމެއް ދައްކާއެވެ.

ޕާކިސްތާން ގައުމީ ޓީމަށް އަފްރީދީ ފުރަތަމަ މެޗެއް ކުޅުނީ 1996 ވަނަ އަހަރު އެވެ. އޭނާ ވަނީ ކެރިއަރުގައި 27 ޓެސްޓް މެޗާއި 398 ވަންޑޭ އިންޓަނޭޝަނަލް މެޗުގެ އިތުރުން 98 ޓްވެންޓީ20 ބައިނަލްއަގުވާމީ މެޗު ކުޅެފައެވެ. އަދި އޭނާ ވަނީ ބައިނަލްއަގުވާމީ ކްރިކެޓްގައި 500ށް ވުރެން ގިނަ ވިކެޓް ނަގާފައެވެ.

ޕާކިސްތާންގެ އަފްރީދީ ކޮވިޑް-19ށް ޕޮޒިޓިވް ވިއިރު، ކޮވިޑް-19 އަންނަނީ އެ ގައުމުގައި ހަލުވިކަމާއެކު ފެތުރެމުންނެވެ. އެގޮތުން މިހާތަނަށް އެ ގައުމުން 132،400 ށްވުރެ ގިނަ މީހުން ކޮވިޑް-19ށް ޕޮޒިޓިވް ވިއިރު، މި ވައިރަސް ޖެހިގެން އެ ގައުމުން 2،551 މީހަކު ވަނީ މަރުވެފައެވެ.