ފުރަތަމަ މެޗަށް މެސީ އާއި ސުއަރޭޒް ފިޓްވެއްޖެ

ސްޕެނިޝް ލީގު އަލުން ފަށާއިރު، ބާސެލޯނާ އިން ކުޅޭ ފުރަތަމަ މެޗަށް އެ ޓީމުގެ ކެޕްޓަން ލިއޮނަލް މެސީ އާއި ލުއިސް ސުއަރޭޒް ފިޓްވެއްޖެއެވެ.

ކޮރޯނާވައިރަސް (ކޮވިޑް-19) އާ ގުޅިގެން މެދުކަނދާލި ސްޕެނިޝް ލީގުގެ ކުޅުން އަލުން ފަށާފައިވާއިރު، ބާސާއިން ފުރަތަމަ މެޗެއް ކުޅޭނީ ހޮނިހިރު ދުވަހުގެރޭއެވެ. މި މެޗުގައި ބާސާ ނުކުންނާނީ މަޔޯކާއާ ދެކޮޅަށެވެ.

މީގެ ކުރިން ބާސާއިން ކުރިއަށް ގެންދިޔަ ފަރިތަކުރުންތަކުގައި އުމުރުން 32 އަހަރުގެ މެސީގެ ފައިގެ ފަލަމަސްގަނޑަށް އަނިޔާވުމުން، ބާސާ ކުޅޭ ފުރަތަމަ މެޗަށް އޭނާ ފިޓްވެދާނެ ކަމާމެދު ސުވާލު އުފެދުނެވެ. މީގެ ކުރިން ބާސާއިން ނެރުނު ބަޔާނެއްގައި ބުނީ މެސީގެ ފައިގެ ފަލަމަސްގަނޑަށް އަނިޔާ ވެފައިވާ ކަމަށާއި، އިތުރަށް ރިސްކު ކުޑަ ކުރުމަށް ޓީމާ ވަކިން ހާއްސަ ކަސްރަތުތަކެއް ކުރަމުން ގެންދާ ކަމަށެވެ. އެކަމަކު އޭގެ ފަހުން މެސީ ވަނީ ބާސާގެ ކުޅުންތެރިންނާއެކު ތަމްރީނު ކޮށްފައެވެ.

އުމުރުން 33 އަހަރުގެ ސުއަރޭޒްގެ ކަކުލަށް ލިބިފައިވާ އަނިޔާގެ ސަބަބުން މީގެ ކުރިން އޮޕަރޭޝަނެއް ކޮށްފައިވާއިރު، މިހާރު އޭނާ ވަނީ އެއްކޮށް ފިޓްވެފައެވެ. ސުއަރޭޒް އެންމެ ފަހުން ބާސެލޯނާއަށް ކުޅެދިން މެޗަކީ ޖެނުއަރީ މަހު ސްޕެނިޝް ސުޕަ ކަޕް ސެމީ ފައިނަލުގައި އެތުލެޓިކޯ މެޑްރިޑާއި ދެކޮޅަށް ކުޅުނު މެޗެވެ. އެމެޗުން ބާސެލޯނާ ބަލިވީ 3-2 ގެ ނަތީޖާއަކުންނެވެ. ޖެނުއަރީ މަހު ސުއަރޭޒްއަށް އަނިޔާވިއިރު، މިދިޔަ މެއި މަހުގެ އަށްވަނަ ދުވަހުން ފެށިގެން ސުއަރޭޒް އަންނަނީ ބާސާގެ ފަރިތަކުރުންތަކުގައި ބައިވެރިވަމުންނެވެ.

މަޔޯކާއާ ދެކޮޅަށް ކުޅޭ މެޗުގައި ސުއަރޭޒް ކުޅޭނެ ކަމަށް ރިޕޯޓުތައް ބުނިއިރު، މިއީ ޖެނުއަރީ މަހު ބާސާގެ ކޯޗުކަމާ ހަވާލުވި ކިކޭ ސެޓިއެންއަށް ސުއަރޭޒް ބޭނުން ކުރަން ލިބޭނެ ފުރަތަމަ މެޗެވެ.

މަޔޯކާ މެޗުގެ ކުރިން ސެޓިއެން ބުނީ މެސީ ހުރީ ކުޅެން ތައްޔާރުވެފައި ކަމަށާއި އޭނާގެ ހާލަތު ބަރާބަރު ކަމަށެވެ. އަދި ފުރަތަމަ އެގާރައިގައި ސުއަރޭޒް ހިމެނިދާނެ ކަމަށާއި އެކަމަކު ފުރިހަމަ 90 މިނެޓު ނުކުޅެވިދާނެ ކަމަށް ވެސް ވަނީ ބުނެފައެވެ.

ގާތްގަނޑަކަށް ތިން މަހަށް ފަހު އަލުން ސްޕެނިޝް ލީގު ފަށާފައިވާއިރު، ބާސެލޯނާ ތާވަލުގެ އެއްވަނައިގައި އޮތީ 27 މެޗުން 58 ޕޮއިންޓު ހޯދައިގެންނެވެ. ތާވަލުގެ ދެވަނައިގައި އޮތީ 27 މެޗުން 56 ޕޮއިންޓު ހޯދާފައިވާ ރެއާލް މެޑްރިޑެވެ. އަދި ތިން ވަނައިގައި 28 މެޗުން 50 ޕޮއިންޓާއެކު އޮތީ، ބުރާސްފަތި ދުވަހުގެރޭ ރެއާލް ބެޓިސް އަތުން 2-0 އިން މޮޅުވި ސެވިއްޔާ އެވެ.

މެދުކެނޑުމަށްފަހު ސްޕެނިޝް ލީގުގައި ބާސާއިން ކުޅޭ ފުރަތަމަ މެޗުގައު މަޔޯކާއާ ދެކޮޅަށް ނުކުންނާނީ ހޮނިހިރު ދުވަހުގެރޭ ރާއްޖެ ގަޑިން މެންދަމު 1 ޖަހާއިރެވެ.