ކޮރޯނާވައިރަސް (ކޮވިޑް-19) އާ ގުޅިގެން އިޓަލީގައި ފުޓްބޯޅަ ހަރަކާތްތައް ހުއްޓުމަކަށް އައިސްފައި އޮތުމަށްފަހު ހުކުރު ދުވަހުގެރޭ އަލުން ފެށިއިރު، އިޓާލިއަން ކަޕްގެ ފައިނަލަށް ޔުވެންޓަސް ދަތުރުކޮށްފިއެވެ.

ކޮވިޑް-19 އާ ގުޅިގެން އިޓަލީގައި ފުޓްބޯޅަ ހަރަކާތްތައް ހުއްޓާލީ މާޗު މަހުގެ ނުވަވަނަ ދުވަހު އެވެ. އިޓާލިއަން ލީގުގެ ކުރިން އިޓާލިއަން ކަޕްގެ ކުޅުން ފެށިއިރު، ފައިނަލަށް މި މުބާރާތް 13 އަހަރު ކާމިޔާބުކޮށްފައިވާ ޔުވެންޓަސް ދަތުރުކުރީ ހުކުރު ދުވަހުގެރޭ ކުޅުނު ސެމީފައިނަލްގެ ދެވަނަ ލެގުގައި އަމިއްލަ ދަނޑުގައި އޭސީ މިލާނާ 0-0 ން އެއްވަރުވެ، އެގްރިގޭޓް ނަތީޖާގައި އަވޭ ލަނޑުން ކުރި ލިބުމުންނެވެ. މީގެ ކުރިން ފެބްރުއަރީ މަހުގެ 14 ވަނަ ދުވަހު މިލާނުގެ ދަނޑުގައި ކުޅުނު ސެމީފައިނަލް ފުރަތަމަ މެޗު ނިމުނީ 1-1 ން ދެޓީމު އެއްވަރުވެގެންނެވެ.

ހުކުރު ދުވަހުގެރޭ ކުޅުނު މެޗު ފަށައިގެން ޔުވެންޓަސްއިން ވަނީ ގިނަ ހަމަލާތަކެއް އޭސީ މިލާނުގެ ގޯލަށް ފޮނުވާލާފައެވެ. ފުރަތަމަ ހާފުގައި ލަނޑު ޖަހަން އެންމެ ހުސް ފުރުސަތެއް ލިބިގެންދިޔައީ ޔުވެންޓަސްގެ ތަރި ކްރިސްޓިއާނޯ ރޮނާލްޑޯ އަށެވެ. އެކަމަކު އޭނާ ފޮނުވާލި ޕެނަލްޓީ އަމާޒުވީ ގޯލުގެ އަރިމަތީ ދަނޑިއަށެވެ.

އޭގެ ފަހުންވެސް ޔުވެންޓަސްއިން ވަނީ މޮޅަށް ކުޅެ ގިނަ ފުރުސަތުތަކެއް ތަނަވަސް ކޮށްފައެވެ. ފުރަތަމަ ހާފުގައި އޭސީ މިލާނަށް އެންމެ ބޮޑު މާޔޫސްކަމެއް ގެނުވީ އެ ޓީމުގެ އެންޓި ރަބިޗަށް ދެއްކި ރަތް ކާޑާއެކުގައެވެ.

މެޗުގެ ދެވަނަ ހާފުގައި ދެޓީމުގެ ފަރާތުންވެސް ފެނިގެންދިޔައީ ހަމަހަމަ ކުޅުމެކެވެ. މި ހާފުގައި ޔުވެންޓަސް ކުޅުންތެރިން ކުރަމުން ގެންދިޔަ ވަރުގަދަ އެޓޭކްތަކުގެ ހުރަހަކަށްވީ އޭސީ މިލާނުގެ ވަރުގަދަ ޑިފެންސެވެ.

މިލާން ކަޓުވާލާ ޔުވެންޓަސް ފައިނަލަށް ދަތުރުކުރިއިރު، އިޓާލިއަން ކަޕްގެ ފައިނަލްގައި ޔުވެންޓަސް ވާދަކުރަންޖެހޭ ޓީމެއް ކަށަވަރުވާނީ ހޮނިހިރު ދުވަހުގެރޭ ނާޕޮލީ އާއި އިންޓަ މިލާން ބައްދަލުކުރާ ސެމީފައިނަލްގެ ދެވަނަ ލެގުގެ މެޗަށް ފަހުގައެވެ. ދެވަނަ ލެގަށް މި ދެޓީމު ނުކުންނައިރު، ނާޕޮލީން ވަނީ ފުރަތަމަ ލެގުގައި ރަށުން ބޭރުގައި 1-0 ގެ ނަތީޖާއަކުން އިންޓަ ބަލިކޮށްފައެވެ.

ކޮވިޑް-19 ށްފަހު އިޓަލީގައި ފުޓްބޯޅަ ހަރަކާތްތައް އަލުން ފެށިއިރު، މީގެ ކުރިން ޔޫރަޕްގެ ގަދަ ފަސް ލީގުގެ ތެރޭގައި ހިމެނޭ ޖަރުމަން ލީގާއި ސްޕެނިޝް ލީގު ވަނީ ފަށާފައެވެ. އިޓާލިއަން ލީގުގެ ކުޅުން އަލުން ފެށުމަށް ތާވަލުކޮށްފައި އޮތީ މި މަހުގެ 20 ވަނަ ދުވަހެވެ.