އަނިޔާގެ ސަބަބުން ފެޑޭރާއަށް މި އަހަރު ދެން ނުކުޅެވޭނެ

ކަނާތު ކަކުލަށް ލިބުނު އަނިޔާއިން ފަރުވާ ހޯދަމުން އަންނަ މަޝްހޫރު ޓެނިސް ކުޅުންތެރިޔާ ސްވިޒަލެންޑުގެ ރޮޖާ ފެޑެރާއަށް މިއަހަރު ނުކުޅެވޭނެކަން ޔަގީންވެއްޖެއެވެ.

މި ވަގުތު ދުނިޔޭގެ ހަތަރަވަނައަށް އެންމެ މޮޅު ޓެނިސް ކުޅުންތެރިޔާގެ މަގާމުގައި ހުރި ފެޑެރާގެ ކަނާތު ކަކުލަށް އަނިޔާވެފައިވާއިރު، އިތުރު އޮޕަރޭޝަނެއް ކުރަން ޖެހިފައިވާކަން ފެޑެރާ ވަނީ ހާމަކޮށްފައެވެ. ފެޑެރާއަށް އަނިޔާވީ މި އަހަރުގެ ޖެނުއަރީ މަހު އޮސްޓްރޭލިއަން އޯޕަން ޓެނިސް މުބާރާތުގެ ސެމީފައިނަލް މެޗުގައި ނޮވަކް ޖޮކޮވިޗް އަތުން ބަލިވި މެޗުގައެވެ. އޭގެ ފަހުން ފެޑެރާ އަންނަނީ ލިބުނު އަނިޔާއަށް ފަރުވާ ހޯދަމުންނެވެ.

ފެޑެރާ ކުރި ޓްވީޓެއްގައި ބުނީ، ކަކުލަށް ލިބުނު އަނިޔާއިން އަދި އެއްކޮށް ރަނގަޅުނުވާ ކަމަށާއި، އަނިޔާއިން ރަނގަޅުވެ އެއްކޮށް ފިޓުވާން ވަގުތު ނަގާނެ ކަމަށެވެ. އެހެންކަމުން އަނިޔާގެ ސަބަބުން މިއަހަރު ދެން ނުކުޅެވޭނެ ކަމަށާއި، އެކަމަކު އަންނަ އަހަރަށް ފުރިހަމައަށް ތައްޔާރުވާނެ ކަމަށް ފެޑެރާ ވަނީ ބުނެފައެވެ.

ކޮރޯނާވައިރަސް (ކޮވިޑް-19) އާ ގުޅިގެން ޓެނިސް މުބާރާތްތައް މެދުކަނޑާލާފައިވާއިރު، އޮގަސްޓް މަހަށް ޔޫއެސް އޯޕަން ޓެނިސް މުބާރާތް ވަނީ ތާވަލުކޮށްފައެވެ. އަދި މިދިޔަ މެއި މަހު ބޭއްވުމަށް ހަމަޖެހިފައި އޮތް ފްރެންޗު އޯޕަން ޓެނިސް މުބާރާތް މިހާރު ވަނީ އަންނަ ސެޕްޓެމްބަރު މަހަށް ތާވަލުކޮށްފައެވެ. މި ދެ މުބާރާތުގައި ވެސް އަނިޔާގެ ސަބަބުން ފެޑެރާއަށް ނުކުޅެވޭނެއެވެ.

ފެޑެރާއަށް މި އަހަރު ނުކުޅެވޭނެކަން ޔަގީންވިއިރު، އުމުރުން 38 އަހަރުގެ ފެޑެރާ ވަނީ ފޯބްސް މަޖައްލާއިން ހޮވާ ދުނިޔޭގެ އެންމެ އާމްދަނީ ބޮޑު ފިރިހެން ކުޅިވަރު ކުޅުންތެރިންގެ ލިސްޓުގެ އެއްވަނަ ހޯދާފައެވެ. އޭނާ މި ލިސްޓުގެ އެއްވަނަ ހޯދީ ފާއިތުވި އަހަރެއްހާ ދުވަހު 106.3 މިލިއަން ޑޮލަރުގެ އާމްދަނީއެއް ހޯދައިގެންނެވެ.