އިނގިރޭސި ޕްރިމިއާ ލީގުގައި އެވަޓަނުން ލިވަޕޫލާ ދެކޮޅަށް ކުޅެން އޮތް މެޗު، އެވަޓަންގެ ގުޑިސަން ޕާކުގައި ކުޅުމުގެ ހުއްދަ ދީފި އެވެ.

ސަޕޯޓަރުން ނުވައްދާ މެޗުތައް ކުޅޭ ގޮތަށް މި މަހުގެ 17 ވަނަ ދުވަހު ޕްރިމިއާ ލީގު އަލުން ފަށަން ނިންމި ނަމަވެސް، ދަނޑު ބޭރުގައި ސަޕޯޓަރުން އެއްވެ، އިޖުތިމާއީ ގައިދުރުކަމުގެ އުސޫލުތަކާ ޚިލާފުވާ ގިނަ ކަންތައްތަކެއް ހިނގައިފާނެ ކަމަށް ފެންނާތީ އިނގިރޭސިވިލާތުގެ ފުލުހުން ވަނީ ފަސް މެޗެއް "ނިއުޓްރަލް" ދަނޑެއްގައި ކުޅެން ލަފާދީފަ އެވެ.

އެ ފަސް މެޗަކީ އެވަޓަން އާއި ލިވަޕޫލް ކުޅޭ މެޗާއި، މެންޗެސްޓަރ ސިޓީ އާއި ލިވަޕޫލް ކުޅޭ މެޗާއި، މެންޗެސްޓަރ ސިޓީ އާއި ނިއުކާސަލް ކުޅޭ މެޗާއި، މެންޗެސްޓަރ ޔުނައިޓެޑާއި ޝެފީލްޑް ޔުނައިޓެޑް ކުޅޭ މެޗުގެ އިތުރުން ނިއުކާސަލް އާއި ލިވަޕޫލް ބައްދަލުކުރާ މެޗު ކަމަށް ރިޕޯޓުތައް ބުނެއެވެ.

އެހެންކަމުން ލިވަޕޫލްގެ ޑާބީ މެޗު، ސަލާމަތީ ސަބަބުތަކަށްޓަކައި އެހެން ދަނޑަކަށް ބަދަލުކުރަން ވާހަކަ ދެކެވުނު ނަމަވެސް، ބުދަ ދުވަހު ލިވަޕޫލްގެ ސޭފްޓީ އެޑްވައިޒަރީ ގްރޫޕުންނާއި ފުލުހުން އަދި ޕްރިމިއާ ލީގުން ބޭއްވި މަޝްވަރާތަކަށް ފަހު ނިންމީ އެވަޓަން ދަނޑުގައި އެ މެޗު ކުޅޭ ގޮތަށެވެ.

މީގެ ކުރިން ލިވަޕޫލްގެ ދަނޑުގައިވެސް މެޗުތައް ކުޅެން އެ ސިޓީގެ މޭޔަރު ޖޯ އެންޑަސަން ދެކޮޅު ހެދި ނަމަވެސް، ފަހުން ވަނީ ލީގުގެ ބާކީ ހުރި މެޗުތައް ލިވަޕޫލްގެ ދަނޑުގައި ކުޅުނަސް މައްސަލައެއް ނެތް ކަމަށް ވިދާޅުވެފައެވެ.

މާޗު މަހު މެދުތެރޭގައި މެދުކަނޑާލި ޕްރިމިއާ ލީގުގެ އެއްވަނައިގައި ލިވަޕޫލް މިވަގުތު އޮތީ ދެވަނައިގައި އޮތް މެންޗެސްޓާ ސިޓީ އަށް ވުރެން 25 ޕޮއިންޓު އިތުރަށް ހޯދައިގެންނެވެ. ލިވަޕޫލަށް ލީގު ކަށަވަރުކުރަން ބޭނުންވަނީ ހަ ޕޮއިންޓެވެ. އެކަމަކު މި މަހު 17 ވަނަ ދުވަހު އަލުން ލީގު ފަށާ މެޗުގައި މެންޗެސްޓާ ސިޓީ އަތުން އާސެނަލް މޮޅުވެއްޖެނަމަ، 21 ވަނަ ދުވަހު އެވަޓަން ބަލިކޮށް ލިވަޕޫލަށް 30 އަހަރަށް ފަހު ފުރަތަމަ ފަހަރަށް ލީގުގެ ޗެމްޕިއަންކަން ޔަގީންކުރެވޭނެއެވެ.