ދިވެހި ރައްޔިތުންގެ ޕާޓީ (ޑީއާރްޕީ) އިން އެމްޓީސީސީއަށް ދައްކަންޖެހޭ މިލިއަނަކަށްވުރެ ގިނަ ރުފިޔާ ދައްކަން ކޮށްފައިވާ ހުކުމް، އިސްތިއުނާފް ކުރުމުގެ ފުރުސަތު ދެވެން ނެތްކަމަށް ސުޕްރީމް ކޯޓުން ނިންމައިފި އެވެ.
ޑީއާރުޕީން އެމްޓީސީސީން ހޯދާފައިވާ ޚިދުމަތްތަކުގެ އަގުގެ ގޮތުގައި ދަންކަންޖެހޭ 1،111،438.96 (އެއްމިލިއަން އެއްލައްކަ އެގާރަހާސް ހަތަރު ސަތޭކަ ތިރީސްއަށް ރުފިޔާ ނުވަދިހަ ހަލާރި) ދައްކަން ސިވިލް ކޯޓުން ކޮށްފައިވާ ހުކުމަށް ހައިކޯޓުން ވަނީ ތާއީދުކޮށްފަ އެވެ.
ސުޕްރީމް ކޯޓުން ބުނެފައިވަނީ، ހައިކޯޓުގެ ހުކުމެއް އިސްތިއުނާފް ކުރެވޭނެ ކަމަށް ދިވެހިރާއްޖޭގެ ކޯޓުތަކުގެ ގާނޫނުގެ 16 ވަނަ މާއްދާ އާއި ސުޕްރީމް ކޯޓުގެ ގަވާއިދުގެ 42 ވަނަ މާއްދާގައި ބުނާފަދަ ސަބަބެއް، ޑީއާރުޕީގެ ފަރާތުން ސުޕްރީމް ކޯޓަށް ހުށަހަޅާފައިނުވާކަމަށެވެ. އެހެންކަމުން މިމައްސަލަ ސުޕްރީމް ކޯޓުގައި އިސްތިއުނާފްކުރުމުގެ ހުއްދަ ދެވެން ނެތް ކަމަށް ސުޕްރީމް ކޯޓުގެ ނިންމުމުގައިވެއެވެ.
އެގޮތުން ސުޕްރީމް ކޯޓުން ބޭއްވި އިބްތިދާއީ އަޑުއެހުމަށްފަހު ބުދަ ދުވަހު ނިންމާފައިވާ ނިންމުމުގައި ވަނީ، ޑީއާރުޕީން އެމްޓީސީސީއަށް ފައިސާ ދެއްކުމަށް ކޮށްފައިވާ ހުކުމް ބާތިލް ކުރުމަށް އެދި ހުށައަޅާފައިވާ ނުކުތާތަކަށް ބަލާއިރު އިސްތިއުނާފު ކުރަން ފުރުސަތު ދޭން ޖެހޭ ފަދަ ނުކުތާތަކެއް ހުށައަޅާފައިނުވާކަމަށެވެ. އަދި މިމައްސަލައިގައި ޤާނޫނީ ބަހުސެއްއޮތްކަން އިސްތިއުނާފުކުރާ ފަރާތަށް ދެއްކިފައި ނުވާތީ، މި މައްސަލަ ސުޕްރީމް ކޯޓުގައި އިސްތިއުނާފުކުރުމުގެ ހުއްދަ ދޭން ނުފެންނަ ކަމަށެވެ.
މިނިންމުން ނިންމާފައިވަނީ މިމައްސަލަ ބެލި ސުޕްރީމް ކޯޓުގެ ފަނޑިޔާރުންގެ ބެންޗުގެ އިއްތިފާގުންނެވެ.
މިމައްސަލައަކީ އިސްތިއުނާފްކުރުުގެ ހުއްދައަށް އެދި ޑީއާރުޕީން ހުށަހެޅި މައްސަލަ އެކެވެ. މިމައްސަލަ ސުޕްރީމް ކޯޓަށް ހުށަހަޅާފައިވަނީ 12 ފެބްރުއަރީ 2018 ގައެވެ.
