މެންޗެސްޓާ ޔުނައިޓެޑްގެ ލެޖެންޑު ޓޯނީ ޑަން މަރުވެއްޖެއެވެ.

އަޔަލެންޑަށް އުފަން ޑިފެންޑަރު މަރުވިއިރު، އޭނާގެ އުމުރުކީ 78 އަހަރެވެ.

1960 ވަނަ އަހަރު 5،000 ޕައުންޑަށް ޔުނައިޓެޑަށް ބަދަލުވި ޑަން ވަނީ ޔުނައިޓެޑުގައި 13 އަހަރު ހޭދަކޮށްފައެވެ. އޭނާ އެންމެ ފުރަތަމަ ޔުނައިޓެޑަށް ކުޅެދިން މެޗަކީ 1960 ވަނަ އަހަރުގެ އޮކްޓޯބަރު މަހުގެ 15 ވަނަ ދުވަހު ބާންލީއާ ދެކޮޅަށް ޔުނައިޓެޑް ކުޅުނު މެޗެވެ. ޔުނައިޓެޑަށް 530ށް ވުރެ ގިނަ މެޗު ކުޅެދީފައިވާ ޑަން އަކީ ޔުނައިޓެޑްގެ ތާރީޚުގައި އެ ކްލަބަށް އަށްވަނައަށް އެންމެ ގިނަ މެޗު ކުޅެދިން ކުޅުންތެރިޔާއެވެ.

ޑަން އެންމެ ބޮޑަށް ވިދާލީ އޭނާގެ ޒުވާން އުމުރުގައި ޔުނައިޓެޑާއެކު ޔޫރަޕިއަން ކަޕް ކާމިޔާބުކުރުމުންނެވެ. އެގޮތުން 1968 ވަނަ އަހަރުގެ ޔޫރަޕިއަން ކަޕް ޔުނައިޓެޑުން ހޯދިއިރު، ޑަން ވަނީ އެމުބާރާތުގެ ހުރިހާ މެޗެއް ކުޅެފަ އެވެ. މިއީ އިނގިރޭސި ކްލަބަކުން ޔޫރަޕިއަން ކާމިޔާބުކުރި ފުރަތަމަ ފަހަރެވެ.

މީގެ އިތުރުން ޑަން ވަނީ ޔުނައިޓެޑާއެކު ދެ ފަހަރެއްގެ މަތިން އިނގިރޭސި ފުޓްބޯލް ލީގު ކާމިޔާބުކުރުމުގެ އިތުރަށް އެފްއޭ ކަޕް އެއް ފަހަރު ކާމިޔާބުކޮށްފައެވެ.

އަޔަލެންޑުގެ ގައުމީ ޓީމަށް 33 މެޗު ކުޅެފައިވާ ޑަން 13 އަހަރަށް ފަހު ޔުނައިޓެޑް ދޫކޮށްލީ 1973 ގައެވެ. ޔުނައިޓެޑް ދޫކޮށް އިނގިރޭސި ދެވަނަ ޑިވިޝަނުގައި ވާދަކުރަމުން އައި ބޮލްޓޮން ވަންޑަރާސްއަށް އޭނާ ކުޅުންއިރު، އެ ކްލަބާއެކު ވަނީ ދެވަނަ ޑިވިޝަނުގެ ޗެމްޕިއަންކަންވެސް ހޯދާފައެވެ.