ފަތުރުވެރިންނަށް އަލުން މަރުހަބާ ކިޔުމަށް ދައްކާލި ވީޑިއޯ 1.2 މިލިއަން މީހުން ބެލި

ފަތުރުވެރިންނަށް އަލުން މަރުހަބާ ކިޔުމަށް މޯލްޑިވްސް މާރކެޓިންގް އެންޑް ޕަބްލިކް ރިލޭޝަންސް ކޯޕޮރޭޝަން އެމްއެމްޕީއާރުސީން ފޭސްބުކް ލައިވް ކުރި ވީޑިއޯ 1.2 މިލިއަން މީހުން ބެލި ކަމަށް އެ ކޯޕަރޭޝަނުން ބުނެފިއެވެ.

"މޯލްޑިވްސް: ދަ ސަން ވިލް ޝައިން އަގެއިން" ގެ ނަމުގައި ބޭއްވި މި ކެންޕެއިން ވަނީ ސޯޝަލް މީޑިއާ އަދި އެހެނިހެން މީޑިއާ މެދުވެރިކޮށް 1.2 މިލިއަން މީހުންނަށް ފޯރުކޮށްދެވިފައި ކަމަށް އެމްއެމްޕީއާރުސީން ބުނެއެވެ. އަދި މި ލައިވް އިވެންޓްގައި ވަނީ 85،000 މީހުން ބައިވެރިވެފައެވެ. ދިވެހިރާއްޖެއަކީ ކުރިއަށް އޮތް ތަނުގައި ފަތުރުވެރިން ޒިޔާރަތްކުރަން އެންމެ ހިތްގައިމު މަންޒިލްގެ ގޮތުގައި އިޝްތިހާރުކުރުމަށްޓަކަ އެމްއެމްޕީއާރުސީން އަންނަނީ މިފަދަ އެތައް ހަރަކާތްތަކެއް ޑިޖިޓަލް އަދި އޮންލައިން ޕްލެޓްފޯމު ތަކުގައި ކުރިއަށް ގެންދަމުންނެވެ.

4 ގަޑިއިރުގެ މި އިވެންޓުގައި ދިވެހިރާއްޖޭގެ ފަތުވެރިކަމުގެ ސިނާޢަތުގެ ފަރާތުން ވަނީ އުންމީދުން ފުރިގެންވާ މެސެޖުތަކާއި ފަތުރުވެރިންނަށް އަލުން މަރުހަބާ ކިޔުމަށް ވަމުން އަންނަ ތައްޔާރީތައް ދުނިޔެއަށް ދައްކާލާފައެވެ.

މި އިވެންޓް ފައްޓަވައި ދެއްވުމުގެ ގޮތުން ވާހަކަ ދައްކަވަމުން އެމްއެމްޕީއާރުސީގެ މެނޭޖިންގް ޑިރެކްޓަރ، ތައްޔިބު މުޙައްމަދު ވިދާޅުވެފައި ވަނީ ދުނިޔޭގެ އެކި ކަންކޮޅު ތަކުގެ ދަތުރު ފަތުރުކުރުން ހުއްޓުމަކަށް އައުމުން ދިވެހިރާއްޖޭގެ ބޯޑަރު ބަންދުކުރަން ޖެހުނު ނަމަވެސް އަޅުގަނޑުމެން މިތިބީ ފަތުރުވެރިންނަށް އަލުން ދިވެހި ރާއްޖޭ ހުޅުވާލުމަށް ކެތްމަދުވެފައި ކަމަށެވެ. އަދި ހަމަ އެއާއެކު ފަތުރުވެރިކަމުގެ ދާއިރާއިން ދެއްވަމުން ގެންދަވާ ފުރިހަމަ އެއްބާރުލުމަށް ހިތުގެ އެންމެ ފުންމިނުން ޝުކުރު އަދާކުރެއްވިއެވެ.

އިވެންޓުގައި ވާހަކަ ދައްކަވަމުން ޓުއަރިޒަމް މިނިސްޓަރ އަލީ ވަހީދު ވިދާޅުވީ ދިވެހިރާއްޖެއަކީ ހުރިހާ ގިންތިއެއްގެ ބަޔަކަށް ވެސް އޮތް އެންމެ ހިތްގައިމު، އެންމެ އަމާން ޖަޒީރާ މަންޒިލް ކަމަށެވެ. އަދި ދިވެހިރާއްޖޭގެ ފަތުރުވެރިކަން އަލުން ފަށާއިރު، ހުރިހާ އެންމެންނަށް ވެސް މަރުހަބާ ކިޔަން ތައްޔާރަށް ތިބި ކަމަށެވެ.

ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކާއި ދުނިޔޭގެ އެކި ކަންކޮޅުތަކުގައި ތިބި ރާއްޖެއަށް ހެޔޮއެދޭ ފަރާތްތަކުގެ ތެރެއިން 200އަށް ވުރެން ގިނަ ފަރާތަކުން ވަނީ މި އިވެންޓުގައި ބައިވެރިވެފައެވެ. އެގޮތުން ދިވެހިރާއްޖެއަށް ހެޔޮއެދޭ ފަރާތްތަކުން، ރާއްޖެއަށް އޮތް ލޯބި ދައްކުވައިދިނުމުގެ ގޮތުން އުންމީދުން ފުރިގެންވާ މެސެޖުތައް ހިއްސާކޮށްފައިވެއެވެ.

އޭގެ އިތުރުން ދިވެހިރާއްޖެ އަލުން ފަތުރުވެރިންނަށް މަރުހަބާ ކިޔުމަށް ވަމުން އަންނަ ތައްޔާރީތައް، ސިނާޢަތުގައި ހަރަކާތްތެރިވާ ފަރާތްތަކުން ވަނީ މުޅި ދުނިޔެއަށް ދައްކާލާފައެވެ. އަދި މި ބައިވެރިންގެ އިތުރުން ދުނިޔޭގެ އެކި ކަންކޮޅު ތަކުން ޓުއަރ އޮޕަރޭޓަރުންނާއި އިންފްލުއެންސަރުންނާއި މަޝްހޫރު މީހުންވެސް ވަނީ ހެޔޮ އެދުންތަށް ހިއްސާކޮށްފައެވެ. މީގެ ތެރޭގައި ޖަރުމަނު ޓޭބަލް ޓެނިސް ކުޅުންތެރިޔާ ޓިމޯ ބޯލް، ޗައިނާގެ ޓޭބަލް ޓެނިސް ކުޅުންތެރިޔާ ޖިއަންގް ޖިޢާލިއަންގް އަދި ސްޕެނިޝް ފުޓުބޯޅަ ކުލަބު، ސެލްޓަވީގޯގެ ކުޅުންތެރިންވެސް ހިމެނެއެވެ.

އިވެންޓުގެ ތީމް ލަވައާއި ދިވެހި ފަންނާނުންގެ ހުށަހެޅުންތަކުން ވަނީ ދިވެހިރާއްޖޭގެ ގުދުރަތީ ރީތިކަމުގެ ވާހަކަ ބެލުންތެރިންނަށް ކިޔައިދީފައެވެ. އަދި ދިވެހި އުފެއްދުންތައް އުފައްދާ ބައެއް ވިޔަފާރިވެރިންނާއި އެހެނިހެން ފަންނާނުން ވެސް ވަނީ އެމީހުންގެ ހުނަރާއި ޝުޢޫރުތައް ހިއްސާކޮށްފައެވެ.

ބެލުންތެރިންގެ ޝައުގުވެރިކަން ދެމެހެއްޓުމުގެ ގޮތުން ރާއްޖެއަށް ޒިޔާރަތް ކޮށްލުމުގެ ފުރުސަތު ދިނުމުގެ ގޮތުން އިވެންޓުގެ ތެރޭގައި ވަނީ ކުއިޒްއެއް ކުރިއަށް ގެންގޮސްފައެވެ. މި ކުއިޒްގައި ގާތްގަނޑަކަށް 10،000 މީހުން ވަނީ ބައިވެރިވެފައެވެ. އެގޮތުން ރިސޯޓުތަކާއި ގެސްޓްހައުސް ހިމެނޭ ގޮތަށް 30 ފަރާތަކުން ވަނީ ގުރުއަތުން ހޮވުނު ފަރާތްތަކަށް ދިވެހިރާއްޖޭގައި ޗުއްޓީ ހޭދަކުރުމުގެ ފުރުސަތު ދީފައެވެ. 4 ގަޑިއިރަށް ދެމިގެން ދިޔަ މި އިވެންޓް އެކި ޤައުމުން ބަލާފައިވާއިރު، އިވެންޓްގައި ނެގި ޕޯލްއިން ދައްކާގޮތުގައި %49 މީހުން މިހާރުވެސް ދަނީ ދިވެހިރާއްޖެއަށް ދަތުރު ރާވަމުންނެވެ. އަދި %95 މީހުން ދެކޭގޮތުގައި ދިވެހިރާއްޖެއަކީ އެންމެ ރައްކާތެރި ފަތުރުވެރިކަމުގެ މަންޒިލެވެ.