ލޮކްޑައުންގެ ސަބަބުން 11 ގައުމެއްގެ 3 މިލިއަން މީހުން މަރުން ސަލާމަތްވި

ކޮވިޑް-19 ފެތުރުން ކޮންޓްރޯލްކުރުމުގެ ގޮތުން ހަރުދަނާ ގޮތެއްގައި އެޅި ލޮކްޑައުންގެ ފިޔަވަޅުތަކުގެ ސަބަބުން ޔޫރަޕްގެ ގައުމުތަކުގެ ތެރެއިން 11 ގައުމަކުން 3 މިލިއަން މީހުން ވައިރަސް ޖެހިގެން މަރުން ސަލާމަތް ކުރެވިފައިވާ ކަމަށް ދިރާސާއަކުން ދައްކައިފި އެވެ.

ލަންޑަންގެ އިމްޕީރިއަލް ކޮލެޖުން ހެދި ދިރާސާއަކުން ދެއްކި ގޮތުގައި ގޭގައި ތިބުމަށް އެންގި އެންގުންތަކަށް ތަބާވުމުގެ ސަބަބުން ވައިރަސް ފެތުރުން ވަރަށް ބޮޑަށް ކޮންޓްރޯލް ކުރެވިފައިވާ ކަމަށެވެ. އެމީހުން ހެދި ދިރާސާއިން އަންދާޒާކުރާ ގޮތުގައި ޖަރމަނީ، ފްރާންސް، އިޓަލީ، އިނގިރޭސިވިލާތް، ސްޕެއިން، ބެލްޖިއަމް، އޮސްޓްރިއާ، ޑެންމަރކް، ނޯރވޭ، ސްވިޑިން އަދި ސްވިޒެލެންޑުން 3.1 މިލިއަން މީހުން މަރުން ވަނީ ސަލާމަތްކުރެވިފަ އެވެ.

ދިރާސާއިން ދައްކާގޮތުގައި ވައިރަސް ފެތުރުން ހުއްޓުވުމަށް އެޅި މިފިޔަވަޅުގެ ސަބަބުން އެކެއްގެ ފަރާތުން މީހުންނަށް ވައިރަސް ޖެހޭ މިންވަރު 82 އިންސައްތަ އަށް ވަނީ ދަށްކުރެވިފަ އެވެ. ދިރާސާގައި ވާގޮތުން ގައުމެއްގައި ލިބެންހުންނަ ވަސީލަތްތައް ބޭނުންކޮށްގެން ވައިރަސް ކޮންޓްރޯލްކުރުމަށް އަޅާފައިވާ ފިޔަވަޅުތަކާއި ލޮކްޑައުން ވަނީ ވައިރަސް ފެތުރުން ވަރަށް ބޮޑަށް ކޮންޓްރޯލްކޮށްފަ އެވެ. އަދި ކުރިޔަށް އޮތްތަނުގައިވެސް ވައިރަސް ކޮންޓްރޯލް ކުރުމަށް މިފަދަ ފިޔަވަޅުތައް އަޅަންޖެހޭ ކަމަށް ދިރާސާގައި ބުނެފައިވެ އެވެ.

ޔޫރަޕިއަން ސެންޓަރ އޮފް ޑިޒީސް ކޮންޓްރޯލްގެ ޑޭޓާ ތައް ބޭނުންކޮށްގެން ހެދި މިދިރާސާއިން ދައްކާގޮތުގައި މެއި މަހުގެ 4 ވަނަ ދުވަހާ ހަމައަށް އައިއިރު ރަނގަޅަށް ލޮކްޑައުން ތަންފީޒުކުރި ގައުމުތަކާއި ދޫކޮށްލާފައިވާ ގައުމުތަކުގެ ޑޭޓާތައް ވަނީ ބަލާފަ އެވެ.

ދިރާސާއިން ދައްކާގޮތުގައި އެއްވެސް ފިޔަވަޅެއް އަޅާފައިނުވާނަމަ 12 މިލިއަނާއި 15 މިލިއަނާ ދެމެދުގެ އަދަދަކަށް މެއި މަސް އަންނަންވާއިރަށް އެ 11 ގައުމުން މީހުންނަށް ވައިރަސް ޖެހޭނެ އެވެ.

ދިރާސާއިން ދައްކާގޮތުގައި ގިނަ މީހުން އެއްވެގެން ބާއްވާ އިވެންޓްތަކާއި ސްކޫލްތައް ބަންދުކުރުމުގެ ސަބަބުން ވައިރަސް ފެތުރުން ހުއްޓުވުމަށް ވަނީ ވަރަށް ބޮޑު ކާމިޔާބީއެއް ލިބިފަ އެވެ. ނަމަވެސް މިއިން ކޮންމެ ފިޔަވަޅެއްގެ ސަބަބުން ވައިރަސް ފެތުރުން ކޮންޓްރޯލްކުރެވުނު މިންވަރެއް ވަކިވަކިން ހޯދިފައެއްނުވެ އެވެ. އެހެންނަމަވެސް ލޮކްޑައުން އާއެކު އެޅި ހުރިހާ ފިޔަވަޅުތަކާއެކު ވައިރަސް ފެތުރުން ކޮންޓްރޯލްކުރެވުނު ކަމަށް ދިރާސާއިން ދައްކައެވެ. އެގޮތުން ވައިރަސް ފެތުރޭ މިންވަރު 81 އިންސައްތަ އަށް ދަށްކުރެވިފައިވާ ކަމަށް ދިރާސާއިން ދައްކަ އެވެ.