މާޅޮސް އަދި މަނަދޫ ބަނދަރުގެ މަސައްކަތަށް ބިޑް ހުށަހެޅުމުގެ މުއްދަތަށް ބަދަލުތަކެއް
ބީލަމަށް ފައިސާ ބަލައިގަންނާނީ 6 ޖުލައި
ނ. މަނަދޫ؛ މިރަށުގެ ބަނދަރުގެ މަސައްކަތް ކުރުމަށް ހުޅުވާލި ފުރުސަތުގެ މުއްދަތު ވަނީ އިތުރުކޮށްފައި
ޑިޒައިން، ސާވޭ އެންޑް ކޮންސްޓްރަކްޝަން އުސޫލުން އއ. މާޅޮސް އަދި ނ. މަނަދޫ ބަނދަރުގެ މަސައްކަތް ކުރުމަށް ހުޅުވާލި ރަޖިސްޓްރޭޝަން އަދި ބިޑް ހުށަހެޅުމުގެ ތާރީހަށް ބަދަލުތަކެއް ގެނެސްފިއެވެ.
ފިނޭންސް މިނިސްޓްރީން ބުނީ ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން، ސިއްޙީ ކުއްލިނުރައްކަލުގެ ޙާލަތު އިއުލާނު ކުރުމާއި، ގުޅިގެން، މި ދެ ބަނދަރުގެ ރަޖިސްޓްރޭޝަން މުއްދަތާއި، ބިޑް ހުށަހެޅުމުގެ ތާރީޚަށް ބަދަލު ގެނެސް ބީލަމުގައި ބައިވެރުވުމުގެ ފުރުސަތު ޖުލައި މަހުގެ 6 ވަނަ ދުވަހަށް އިތުރުކޮށްފައިވާކަމަށެވެ.
ފިނޭންސް މިނިސްޓްރީން ބުނީ މި ބީލަމުގައި ބައިވެރި ވެވޭނީ މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރގެ "ޢިމާރާތްކުރުމުގެ ޢަމަލީ މަސައްކަތްކުރާ ފަރާތްތަކުގެ ޤަވާއިދު" ގައިވާ ގޮތުގެމަތީން ރަޖިސްޓަރީ ވެފައިވާ ފަރާތްތަކަށް ކަމަށެވެ. އަދި މި މަސައްކަތަށް ޝަރުޠުހަމަވާ ފަރާތެއް ހޯދުމުގެ ކަންތައް ކުރިޔަށް ގެންދެވޭނީ އިންޓަރނޭޝަނަލް ކޮމްޕެޓިޓިވް ބިޑިންގ (އައިސީބީ) އުޞޫލުގެ މަތިން ކަމަށާއި، މިކަމަށް ކުރިމަތިލާ ފަރާތްތަކުގައި ހުންނަންޖެހޭ ޝަރުޠުތަކާއި އިވެލުއޭޓްކުރެވޭ ކްރައިޓީރިއާ ބީލަން ފޮތުގައި ބަޔާންކުރެވިފައިވާނެ ކަމަށެވެ.
ބީލަމުގައި ބައިވެރިވުމަށް 1500 ދިވެހި ރުފިޔާ ނުވަތަ 100 ޑޮލަރުގެ ރިފަންޑަބަލް ރަޖިސްޓްރޭޝަން ފީއެއް ދައްކަން ޖެހޭނެ ކަމަށާއި، ފައިސާ ބަލައިގަންނާނީ 6 ޖުލައި 2020 އަށް، މިމިނިސްޓްރީގެ އޮންލައިން ޕޭމަންޓް ޕޯޓަލް ބަނޑޭރި ޕޭ މެދުވެރިކޮށް ކަމަށެވެ.
މިނިސްޓްރީން ބުނީ ބީލަން ހުޅުވުން އޮންނާނީ ޖުލައި 7 ވަނަ ދުވަހުގެ ހެނދުނު 11:00 ގައި މިނިސްޓްރީގެ ނެޝަނަލް ޓެންޑަރ ޖަލްސާކުރާ މާލަމުގައި ކަމަށެވެ.
