އެފްއޭއެމް ހައުސް ތަޅާލައި، ތަން ހުސްކުރަނީ

ރާއްޖޭގެ ފުޓްބޯޅައިގެ މައި އިދާރާ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ހުސްކޮށް, އެތަން ތަޅާލަން ނިންމައިފިއެވެ.

މިދިޔަ މާޗު މަހުގެ ދެވަނަ ދުވަހު އެފްއޭއެމް ހައުސްގައި އޮތް ރަސްމިއްޔާތެއްގައި ވަނީ އެ އިދާރާގެ މައި އޮފީސް 20 ބުރިއަށް އެޅުމަށް ސައުތު ކޮރެޔާގެ ސްކައި ވިންޑް ކުންފުންޔާއެކު އެއްބަސްވުމެއްގައި ސޮއި ކޮށްފިއެވެ. މިހާތަނަށް ކުޅިވަރު އެސޯސިއޭޝަނަކުން އެޅުމަށް ނިންމާފައިވާ އެންމެ ބިޔަ އިމާރާތުގެ މަސައްކަތް ކުރުމަށް ސްކައި ވިންޑް ގްލޯބަލް އާއެކު އެފްއޭއެމުން އެއްބަސްވެފައިވާއިރު، މި އިމާރާތް ވެގެންދާނީ ފުޓްބޯޅައަށް އެތައް މިލިޔަން ރުފިޔާއެއް ލިބިގެންދާނެ އިމާރާތަކަށެވެ.

ރާއްޖެޓީވީގެ ކުޅިވަރު ފައިލް ޕްރޮގްރާމްގައި ވާހަކަ ދައްކަވަމުން އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ އެފްއޭއެމްއަށް ރަނގަޅު ފެންވަރުގެ އިމާރާތެއް ލިބެންޖެހޭ ކަމަށާއި އަލަށް އިމާރާތް ކުރާ 20 ބުރީގެ އިމާރާތް ވެގެންދާނީ މުޅި ފުޓްބޯޅައަށް ބޮޑު ބަދަލެއް ގެންނާނެ އިމާރާތަކަށް ކަމަށެވެ.

ދަތުރު ފަތުރުގެ ހުއްދަ ލިބުމާއެކު އައު އިމާރާތުގެ މަސައްކަތް ކުރުމަށް ކޮރެއާގެ ކުންފުނިން ރާއްޖެ އަންނާނެ ކަމަށާއި، މިހާރު ބޭނުން ކުރަމުންދާ އިމާރާތް ކުރިއަށް އޮތް މަސް ދުވަހުގެ ތެރޭގައި ހުސްކޮށް، އަންނަ ޖުލައި މަހުގެ ތެރޭގައި މިހާރުގެ އިމާރާތް ތަޅާލަން ފަށާނެ ކަމަށް ބައްސާމް ވިދާޅުވިއެވެ.

20 ބުރީގެ އާ އިމާރާތް ދެ އަހަރުގެ ތެރޭގައި ނިމޭނެ ކަމަށް ލަފާކޮށްފައިވާއިރު، އައު އިމާރާތުގައި އެންމެ ޒަމާނީ ފެންވަރުގެ ޖިމްގެ ޚިދުމަތާއި މެޑިކަލް ވަސީލަތުގެ އިތުރުން ގައުމީ ޓީމުތައް ކޭމްޕް ކުރެވޭނެ ރަނގަޅު ފެންވަރުގެ ވަސީލަތްތައް ގާއިމު ކުރުމަށް ނިންމާފައިވާއިރު، އިމާރާތުގެ ގިނަ ބުރިތައް ބޭނުން ކުރާނީ އެފްއޭއެމަށް ފައިސާ ލިބޭނެ ގޮތަށް ކަމަށް ބައްސާމް ވިދާޅުވިއެވެ.

2004 ވަނަ އަހަރު އެފްއޭއެމްގެ މިހާރުގެ އިމާރާތް ހުޅުވިއިރު، އެ އިމާރާތް ބިނާކޮށްފައި ވަނީ 7،000 (ހަތް ހާސް) އަކަފޫޓުގެ ބިމެއްގައެވެ. އެފްއޭއެމަށް އައު އިމާރާތެއް ލިބިގެންދާ 20 ބުރީގެ އިމާރާތާއި، ހިއްކި ބިމުގައި އަޅާ 17،000 (ސަތާރަ ހާސް) އަކަފޫޓުގެ ހަތަރު ބުރީގެ އިމާރާތާއެކު، އެފްއޭއެމްއަށް އަހަރަކު 90 މިލިޔަން ރުފިޔާއަށް ވުރެން ގިނަ ފައިސާ ވަންނާނެ ކަމަށް ބައްސާމް ވިދާޅުވިއެވެ.

ހިއްކި ބިމުގައި އަޅާ އިމާރާތް ދެ ހަފުތާގެ ތެރޭގައި ފެށޭނެ ކަމަށް ކޮންޓްރެކްޓަރު ޔަގީންކަންދީފައިވާ ކަމަށާއި، ހަތަރު ބުރީގެ އިމާރާތުން ކްލަބުތަކަށް ފައިސާ ލިބޭނެ ގޮތަށް ތަންތަން ދެވިގެންދާނެ ކަމަށް އެފްއޭއެމުން ބުނެއެވެ. މީގެ ކުރިން އެފްއޭއެމުން ވަނީ ހިއްކި ބިމުގައި އެޅޭ ހަތަރު ބުރީގެ އިންޑޯ ފުޓްސަލް އިމާރާތުގެ އެއް ފަންގިފިލާގައި އިންޓަނޭޝަނަލް ފުޓްސަލް މުބާރާތެއް ބޭއްވޭނެ ވަރަށް ތަރައްގީ ކުރެވޭނެކަން ހާމަކޮށްފައެވެ.