ވަޒީފާ އަދާކުރާ ފަރާތްތަކަށް ދޭ، އެންމެ ކުޑަ އުޖޫރަ ނުވަތަ މިނިމަމް ވޭޖްގެ ގޮތުގައި ތިން ބޭންޑެއް ކަނޑައަޅާފައިވާ، ވަޒީފާއާބެހޭ ޤާނޫނަށް އިޞްލާޙު ގެނައުމުގެ ބިލަށް ރައްޔިތުންގެ މަޖިލީހުގައި ބަހުޘް ކުރުމުގެ މަރުޙަލާ ފަށައިފި އެވެ.
ހޯމަ ދުވަހުގެ ޖަލްސާގައި، އިބްތިދާޢީ ބަހުޘް ކުރުމަށް އެޖެންޑާގެ ދަށުން، ސަރުކާރުގެ ފަރާތުން، ކެނދިކުޅުދޫ ދާއިރާގެ މެންބަރު އަޙްމަދު ޢީސާ ހުށަހަޅުއްވާފައިވާ، ވަޒީފާއާ ބެހޭ ޤާނޫނަށް އިޞްލާޙު ގެނައުމުގެ ބިލު މަޖިލީހަށް ހުށަހަޅުއްވައި ދެއްވީ، ހުޅުދޫ ދާއިރާގެ މެންބަރު އިލްޔާސް ލަބީބެވެ. ބިލު ހުށަހަޅުއްވަމުން އިލްޔާސް ލަބީބު ވިދާޅުވީ، ސަރުކާރުގެ ފަރާތުން މި ބިލު ހުށަހެޅުމުގެ ބޭނުމަކީ، ރާއްޖޭގައި މަސައްކަތްކުރާ ފަރާތްތަކަށް އެންމެ ކުޑަމިނުން ދޭންޖެހޭ އުޖޫރަ ކަނޑައެޅުމާއި ވަޒީފާއާ ބެހޭ ޤާނޫނުގައި ބަޔާންކުރާ ކަންތައްތައް އިތުރަށް ތަފުޞީލު ކުރުމަށާއި މި ޤާނޫނުގައި ބަޔާންކުރާ ވަޒީފާއާ ގުޅޭ އެނޫންވެސް ކަންކަން އިތުރަށް ހަރުދަނާ ކުރުމަށްޓަކައި ގެންނަން ޖެހޭ އިޞްލާޙުތައް ގެނައުމަށް ހުށަހަޅާފައިވާ ބިލެއް ކަމަށެވެ.
މި ބިލުގައި މައިގަނޑު ގޮތެއްގައި ފާހަގަކޮށްފައި ވަނީ، ވަޒީފާ ދޭ ފަރާތާއި ވަޒީފާ އަދާކުރާ ފަރާތާ ދެމެދު އެއްބަސްވުމެއް ނެތި، ބަޒީފާ ދިނުމާއި އަދި ބޭނުންވެއްޖެ ހިނދެއްގައި ވަޒީފާއިން މީހުން ވަކިކުރުން ފަދަ ކަންކަން ހަރުދަނާކޮށް، ވަޒީފާ ދޭ ފަރާތާއި، ވަޒީފާ އަދާ ކުރާ ފަރާތުގެ ޙައްޤުތައް ޙިމާޔަތް ކުރުންފަދަ ކަންކަމެވެ. އެގޮތުން ވަޒީފާ ދޭ ފަރާތާއި ވަޒީފާ އަދާކުރާ ފަރާތާ ދެމެދު އެއްބަސްވުމެއް ނެތި، ވަޒީފާ ދޭ ފަރާތުން ޢަމަލުކުރާނަމަ، ޖޫރިމަނާ ކުރުން ހިމެނެއެވެ. އަދި ވަޒީފާއަށް މީހުން ނަގާއިރު، 'ޕްރޮބޭޝަން ޕީރިއަޑް'ގެ ގޮތުގައި މިހާރު ޤާނޫނުގައި އޮންނަނީ 3 މަސްދުވަސް ކަމަށާއި، ނަމަވެސް ގެނެވޭ އިޞްލާޙުގައި 6 މަސް ދުވަހަށްވުރެ ދިގު ނުވާގޮތަށް 'ޕްރޮބޭޝަން ޕީރިއަޑް' ހަމަޖެއްސުމަށް ވެސް އިޞްލާޙުގައި ވެއެވެ.
މި ބިލުގެ އެންމެ މުހިންމު ކަމެއްގެ ގޮތުގައި، ކަނޑައަޅާފައި ވަނީ، ވަޒީފާ އަދާ ކުރާ ފަރާތްތަކަށް ދޭ، އެންމެކުޑަ އުޖޫރަ ކަނޑައަޅާފައި ވެއެވެ. އެގޮތުން، އެންމެ މަތީ ކެޓަގަރީއަށް 8.000ރ އާއި 8،500ރގެ ދެމެދުގެ ޢަދަދެއް، ދެން އޮތް ކެޓަގަރީއަށް 6،000ރ އާއި 6،500ރ އާއި ދެމެދުގެ ޢަދަދެއް، އަދި އެންމެ ކުޑަ ކެޓަގަރީއަށް 4،000ރ އާއި 4،500ރ އާއި ދެމެދުގެ ޢަދަދެއް ކަނޑައެޅުމަށް ބިލުގައި ވެއެވެ.
މި ބިލު ދިރާސާ ކުރުމުގެ މަސައްކަތުގެ ދަށުން، ކަމާބެހޭ ފަންނީ ބޭފުޅުންގެ ލަފާފުޅާއި އިރުޝާދު ހޯއްދަވާނެ ކަމަށާއި، އަދި ބިލު ނިމޭއިރު، އިތުރަށް ފުރިހަމަ ވެގެންދާނެ ކަމަށްވެސް އިލްޔާސް ލަބީބު ވިދާޅުވި އެވެ. މި ބިލުގެ އިބްތިދާޢީ ބަހުޘްގައި ވެސް ބައެއް މެންބަރުން ގެންދަވަނީ އިޞްލާޙުތައް ހުށަހަޅުއްވަމުން ނެވެ.
ވަޒީފާއާބެހޭ ޤާނޫނު 2008 ވަނަ އަހަރު ރައްޔިތުންގެ މަޖިލީހުން ފާސްކުރުމުގެ ތެރޭގައި ވެސް އެންމެކުޑަ އުޖޫރައިގެ ވާހަކަ ދެކެވުނެވެ. ނަމަވެސް މިހާ ގިނަ ދުވަސް ވެގެން ދިޔައިރުވެސް، ވަޒީފާ އަދާކުރާ ފަރާތްތަކަށް ދެވޭނެ އެންމެކުޑަ އުޖޫރަ ކަނޑައެޅިފައި ނުވާތީ، ވަޒީފާ އަދާކުރާ ފަރާތްތަކުގެ ބޮޑެތި ކަންބޮޑުވުންތަކެއް ފާޅުކުރަމުން ގޮސްފައި ވެއެވެ. އެންމެބޮޑަށް މިކަމާ ވަކާލާތު ކުރަމުން ދިޔައީ ރިސޯޓުތަކުގައި ވަޒީފާ އަދާކުރަމުންދާ މުވައްޒަފުން ނެވެ.
