އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ން އިތުރުން ދެ މީހަކު ނޮވެލް ކޮރޯނާވައިރަސް (ކޮވިޑް-19)ށް ޕޮޒިޓިވް ވެއްޖެ އެވެ.

އީއެފްއެލްއިން އަންނަނީ ދެވަނަ ޑިވިޝަނާއި ތިންވަނަ ޑިވިޝަނުގެ އިތުރުން ހަތަރު ވަނަ ޑިވިޝަނުގައި ވާދަކުރާ ކްލަބުތަކުގެ ހުރިހާ ކުޅުންތެރިންނާއި، އޮފިޝަލުން ކޮވިޑް-19ށް ޓެސްޓު ކުރަމުންނެވެ.

އެގޮތުން އެންމެ ފަހުން ކުރިއަށް ގެންދިޔަ ފަސްވަނަ ބުރުގެ ޓެސްޓުތަކުގައި އީއެފްއެލް ޗެމްޕިއަންޝިޕްގައި ވާދަކުރަމުން އަންނަ 24 ކްލަބުގެ ކުޅުންތެރިންނާއި އޮފިޝަލުން ޓެސްޓުކުރިއިރު، އިތުރު ދެ މީހަކު ވަނީ ކޮވިޑް-19ށް ޕޮޒިޓިވް ވެފައެވެ. މި ދެ މީހުން ނިސްބަތް ވަނީ ދެ ކްލަބަކަށްކަން އީއެފްއެލްއިން ވަނީ ހާމަކޮށްފަ އެވެ.

އީއެފްއެލް ޗެމްޕިއަންޝިޕުން މިހާތަނަށް 26 މީހަކު ކޮވިޑް-19ށް ޕޮޒިޓިވްވީ އިރު، 5،000 ށްވުރެ ގިނަ ޓެސްޓު ވަނީ ކޮށްފަ އެވެ.

އެންމެ ފަހުން ކުރިއަށް ގެންދިޔަ ޓެސްޓު ތަކުން އިނގިރޭސި ތިންވަނަ ޑިވިޝަން (ލީގު ވަން) އިން ޕޮޒިޓިވް ކޭސް އެއް ފެނިފައެއް ނުވެއެވެ. އެކަމަކު ހަތަރުވަނަ ޑިވިޝަން (ލީގު ޓޫ) އިން ވަނީ އެކަކު ކޮވިޑް-19ށް ޕޮޒިޓިވް ވެފައެވެ.

ކޮވިޑް-19 އާ ގުޅިގެން މާރޗު މަހު އިންގްލެންޑުގައި ފުޓުބޯޅަ މުބާރާތްތައް ހުއްޓާލިއިރު، މި މަހުން ފެށިގެން ފުޓުބޯޅަ މުބާރާތްތައް އަލުން ފެށުމުގެ ހުއްދަ އިނގިރޭސިވިލާތުގެ ސަރުކާރުން ވަނީ ދީފައެވެ. އީއެފްއެލް ޗެމްޕިއަންޝިޕް މިމަހުގެ 20 ވަނަ ދުވަހު އަލުން ފަށަން މަސައްކަތް ކުރަމުން އައި ނަމަވެސް، ދެވަނަ ޑިވިޝަން އަލުން ފަށާނެ ތާރީޚެއް އަދި 'ފައިނަލް' ކޮށްފައެއް ނުވެއެވެ.