ކޮވިޑް-19 އާ ގުޅިގެން ސަރުކާރުން ކުރަމުންދާ ކަންކަމާ ގުޅޭގޮތުން މަޖިލީހުން މިއަދު ރައީސަށް ލަފާއަރުވަނީ
މިރިޕޯޓްގެ ޚުލާސާ އެއް ރައީސަށް ހޯމަ ދުވަހުގެ މެންދުރު 12:00 އެރުވުމަށް ވަނީ ހަމަޖެހިފައި
ރައީސް ނަޝީދާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ކޮވިޑް-19 އާ ގުޅިގެން ސަރުކާރުން އަޅަމުންދިޔަ ފިޔަވަޅުތަކުގެ ސަބަބުން ރައްޔިތުންނަށް ކުރަމުންދިޔަ އަސަރުތައް ރައްޔިތުންގެ މަޖިލީހުގެ ކޮމިޓީތަކުން ދިރާސާކުރުމަށް ފަހު އެކަންކަމާއި ގުޅޭގޮތުން މަޖިލީހުން ދެކޭގޮތުގެ ލަފާ ހޯމަ ދުވަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހަށް އަރުވާނެ ކަމަށް މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ އެކި ކޮމިޓީތަކުން ވަނީ ކަމާގުޅުން ހުރި އެކި ކަންކަމާއި ގުޅިގެން ރައްޔިތުންނަށް ކުރާނެ އަސަރުތައް ދެނެގަތުމަށް ކަމާބެހޭ ފަރާތްތައް ކޮމިޓީއަށް ހާޟިރުކޮށްގެން ވަނީ ދިރާސާކޮށްފަ އެވެ. އަދި އެކަންކަމުގެ ރިޕޯޓުތައް މަޖިލީހަށް ހުށަހަޅާ އިޞްލާޙުތައް ގެނެސް ވަނީ މަޖިލީހުގެ ތަޅުމުން މިހާރު ފާސްކޮށްފަ އެވެ.
ހޯމަ ދުވަހުގެ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ މިހާރު ހުރިހާ ރިޕޯޓެއް ނިމިފައިވާ ކަމަށެވެ. އެހެންކަމުން މިރިޕޯޓުގެ ޚުލާސާއެއް ރައީސަށް ހޯމަ ދުވަހުގެ މެންދުރު 12:00 އެރުވުމަށް މިހާރު ހަމަޖެހިފައިވާ ކަމަށް ރައީސް ނަޝީދު ވިދާޅުވި އެވެ.
އަދި މިކަމާއި ގުޅިގެން ރައްޔިތުންގެ މަޖިލީހުގެ ނިންމުން ޤަބޫލުކުރައްވާނެ ކަމަށް ރައީސް ވިދާޅުވެފައިވާ ކަމަށް ރައީސް ނަޝީދު ވިދާޅުވި އެވެ.
މީގެކުރިން ބޭއްވި ރައްޔިތުންގެ މަޖިލީހުގެ ޖަލްސާ އެއްގައި ވާހަކަ ދައްކަވަމުން ރައީސް ނަޝީދު ވިދާޅުވީ މިކަންކަން މަޖިލީހުގެ 14 ކޮމިޓީއަކުން ދިރާސާކޮށްފައިވާ ކަމަށެވެ. މިހުރިހާ ރިޕޯޓެއްގައި 1500 ޞަފުޙާ ހިމެނޭކަމަށާއި، ހުރިހާ ރިޕޯޓެއްގައި 300ށް ވުރެ ގިނަ ހޯދުންތައް އެބަހުރި ކަމަށެވެ.
ކޮވިޑް-19 އާއި ގުޅިގެން ލިބިދާނެ ގެއްލުންތައް ކުޑަކުރުމަށްޓަކައި ސަރުކާރުން ވަނީ އެކި ޕްލޭންތައް ތަޢާރަފުކޮށް އެކި އެހީތެރިކަން ފޯރުކޮށްދޭން ފަށާފަ އެވެ.
