އެސްޓީއޯގެ ހުއްދަނެތި ކުންފުނީގެ ލޯގޯ ޖަހައިގެން މާސްކު ވިއްކާ މައްސަލަ ފެންމަތި ވެއްޖެ

ކޮވިޑް-19 އާ ގުޅިގެން ބައެއް ފަރާތްތަކުން ވިޔަފާރީގެ ބޭނުމަށް ވިއްކަމުންދާ ފޮތި މާސްކުގެ ތެރޭގައި އެސްޓީއޯގެ ވިޔަފާރި ލޯގޯ ޖަހާފައިވާ މާސްކު ތައްޔާރުކޮށް ވިއްކަމުން ދާކަން ފާހަގަ ކުރެވިފައިވާ ކަމަށް އެސްޓީއޯއިން ހާމަކޮށްފި އެވެ.

އެކަން ހާމަކޮށް އެކުންފުނިން ނެރެފައިވާ ބަޔާނެއްގައި ބުނެފައި ވަނީ މިކަން ކުރަމުން ދަނީ ކުންފުނީގެ ހުއްދަނެތި ކަމަށެވެ. އެހެންކަމުން އެސްޓީއޯގެ ލޯގޯ ޖެހި މާސްކް ތައްޔާރުކޮށް ވިއްކުން ހުއްޓާލުމަށް އެކަން ކުރަމުންދާ ފަރާތްތަކަށް އެކުންފުނިން އިލްތިމާސްކުރާ ކަމަށް މި ބަޔާނުގައި ބުނެފައި ވެއެވެ.

ކޮވިޑް-19އާ ގުޅިގެން މާސްކުގެ ޑިމާންޑު ވަނީ ވަރަށް ބޮޑަށް އުފުލިފަ އެވެ. ގިނަ ޢަދަދެއްގެ މާސްކު ރާއްޖެ އެތެރެކޮށްފައި ވާއިރު ގިނަ ޢަދަދެއްގެ މީހުން އަންނަނީ މާސްކު ފަހައިގެން ވިއްކަމުންނެވެ.

ކޮވިޑް-19 އާއެކު މާލޭގައި އަޅާފައިވާ 'ލޮކްޑައުން'ގެ ފިޔަވަޅުތަކަށް ލުއިތައް ދޭން ފަށާފައި ވާއިރު ގެއިން ބޭރަށް ނިކުންނަނަމަ މާސްކު އެޅުމަށް އެޗްޕީއޭއިން ވަނީ އިލްތިމާސްކޮށްފަ އެވެ.