ފްރެންޗު ލީގު ކެންސަލް ކުރީ މާ އަވަހަށް: ޑި މާރިއާ

ކޮރޯނާވައިރަސްއާ ގުޅިގެން ފްރެންޗު ލީގު ކެންސަލް ކުރީ މާ އަވަހަށް ކަމަށް ޕީއެސްޖީގެ ތަރި އެންހެލް ޑި މާރިއާ ބުނެފިއެވެ.

ސެޕްޓެމްބަރު މަހުގެ ކުރިން މީހުން އެއްވެ އުޅެ ކުރިއަށް ގެންދާ އެއްވެސް ހަރަކާތެއް ނުބޭއްވޭނެ ކަމަށް ފްރާންސް ސަރުކާރުން ނިންމުމާއެކު ފްރެންޗު ލީގު ކެންސަލް ކުރީ އޭޕްރީލް މަހުގެ 30 ވަނަ ދުވަހުއެވެ.

ފްރެންޗު ލީގު ކެންސަލް ކޮށް، ޕީއެސްޖީ އަށް ވަނީ ޗެމްޕިއަންކަން ދީފައެވެ. ފްރެންޗު ލީގަކީ ޔޫރަޕުގެ ގަދަ ފަސް ލީގުގެ ތެރެއިން ކެންސަލް ކުރި ހަމައެކަނި ލީގެވެ. މީގެ ކުރިން ޖަރުމަން ލީގުގެ ކުޅުން ފަށާފައި ވާއިރު، މި މަހުގެ ތެރޭގައި އިނގިރޭސި ޕްރިމިއާ ލީގާއި ސްޕެނިޝް ލީގުގެ އިތުރުން އިޓާލިއަން ލީގު އަލުން ފެށުމަށް ވަނީ ތާވަލުކޮށްފައެވެ.

ދާދި ފަހުން ދިން އިންޓަވިއުއެއްގައި ޕީއެސްޖީއަށް ކުޅެމުން އަންނަ އާޖެންޓީނާގެ ތަރި ޑި މާރިއާ ބުނީ ފްރެންޗު ލީގު ކެންސަލް ކުރަން އެ ގައުމުގެ ފުޓްބޯޅަ ފެޑެރޭޝަނުން ނިންމީ މާ އަވަހަށް ކަމަށެވެ. އެގޮތުން އެހެން ލީގުތަކެކޭ އެއްގޮތަށް ފްރާންސްގައި ވެސް ފުޓްބޯޅަ ލީގު ކުރިއަށް ގެންދެވޭނެ ކަމަށް ޑި މާރިއާ ބުންޏެވެ. އެކަމަކު ޑި މާރިއާ ބުނީ ލީގު މިހާރު ކެންސަލް ކޮށްފައި އޮތުމާއެކު، އެ ނިންމުން ގަބޫލުކުރަން ޖެހޭނެ ކަމަށެވެ.

ޑި މާރިއާގެ އިތުރުން މީގެ ކުރިން 2014ން 2017ށް ފްރާންސްގެ ކުޅިވަރާ ބެހޭ ވަޒީރުކަން ފުރުއްވި ޕެޓްރިކް ކެނާ ވެސް ވަނީ ފްރެންޗު ލީގު ކެންސަލް ކުރީ މާ އަވަހަށް ކަމަށް ވިދާޅުވެފައެވެ.

ފްރެންޗު ލީގު ކެންސަލް ކުރީ އަންނަ ސީޒަނުގެ ޔޫރަޕް މުބާރާތްތަކަށް ކޮލިފައިވާ ޓީމުތައް ކަނަޑައެޅުމަށް ފަހު އެވެ. އެގޮތުން ފްރެންޗު ލީގުން ޔުއެފާ ޗެމްޕިއަންސް ލީގަށް ކޮލިފައިވީ އެއްވަނައިގައި އޮތް ޕީއެސްޖީ އާއި ދެވަނައިގައި އޮތް މާސޭ އަދި ތިންވަނައިގައި ރެނެސް އެވެ. އަދި ޔުއެފާ ޔޫރޮޕާ ލީގަށް ކޮލިފައިވީ ހަތަރުވަނައިގައި އޮތް ލިލް އާއި ފަސްވަނައިގައި އޮތް ރެއިމްސް އަދި ހަވަނައިގައި އޮތް ނީސް އެވެ. އެހެންކަމުން މިއީ 1997 ވަނަ އަހަރަށް ފަހު ޔޫރަޕުގެ މުބާރާތަކުން ތާވަލުގެ ހަތްވަނައިގައި އޮތް ލިޔޯނަށް ފުރުސަތު ގެއްލުނު ފުރަތަމަ ފަހަރެވެ.

މީގެ އިތުރުން ލީގު ކެންސަލް ކުރުމާއެކު ތާވަލުގެ ފުލުގައި އޮތް ދެ ޓީމު ކަމަށްވާ އަމިއެންސް އާއި ޓުލޫސް ވަނީ ދެވަނަ ޑިވިޝަނަށް ރެލިގޭޓް ވެފައެވެ.

އެއާއެކު ލިޔޯން، އަމިއެންސް އަދި ޓުލޫސް އިން ކޯޓަށް މައްސަލަ ހުށަހެޅި ނަމަވެސް، ކޯޓުން އެ މައްސަލަ ބަލައިގަނެފައެއް ނުވެއެވެ. އެހެންކަމުން ލިޔޯނުގެ ރައީސް ޖިއަން-މިކޭލް އައުލަސް ވަނީ ފްރާންސް ސަރުކާރުގެ އެންގުމަށް ލީގު ކެންސަލްކޮށްފައި ވާތީ އަލުން ލީގު ފަށަން ސަރުކާރުން އިސްނެގުމަށް އެދިފައެވެ.