\'ލޮކްޑައުން" އާއި ގުޅިގެން އެންމެ އެދެވޭ މިންވަރަށް ކޮމިއުނިޓީ ކޮންސަލްޓޭޝަން ކުރިޔަށް ނުގެންދެވޭ: އީޕީއޭ
ލޮކްޑައުންއާއި ގުޅިގެން ކޮމިއުނިޓީ ކޮންސަލްޓޭޝަން ހިންގުމުގައި ވަރަށްބޮޑު ދަތިތަކެއް ހުރި
ގުޅިފަޅު ހިއްކަން ފެށުމައެކު އެ ސަރަހައްދަށް ކިސަޑު ފެތުރިފައި؛ މި މައްސަލަ މަޖިލީހުގެ އެންވަޔރަމަންޓް ކޮމިޓީން އަންނަނީ ބަލަމުން
މާލެ ޞަރަޙައްދު 'ލޮކްޑައުން' ކޮށްފައި އޮތުމުގެ ސަބަބުން، މީގެ ކުރިން މަޝްރޫޢުތައް ކުރިއަށް ގެންދިޔަ އިރު ކޮމިއުނިޓީ ކޮންސަލްޓޭޝަން ކުރިއަށް ގެންދިޔަ މިންވަރަށް, ގުޅިފަޅުގައި ތަރައްޤީކުރާ ވިޔަފާރި ބަނދަރުގެ މަޝްރޫއުގެ ދަށުން ކުރިއަށްގެންދާ ބިން ހިއްކުމުގެ މަޝްރޫޢުގެ ކޮމިއުނިޓީ ކޮންސަލްޓޭޝަން ކުރިއަށް ނުގެންދެވޭކަމަށް ޤަބޫލުކުރާ ކަމަށް އެންވަޔަރމަންޓް ޕްރޮޓެކްޝަން އެޖެންސީ (އީޕީއޭ) އިން ބުނެފި އެވެ.
ރައްޔިތުންގެ މަޖިލީހުގެ އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީ ބައްދަލުވުމުގައި އުނގޫފާރު ދާއިރާގެ މެންބަރު މުހައްމަދު ވަހީދު ކުރެއްވި ސުވާލަކަށް ޖަވާބުދެއްވަމުން އީޕީއޭގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވީ ކޮމިއުނިޓީ ކޮންސަލްޓޭޝަން ހިންގުމުގައި ވަރަށްބޮޑު ދަތިތަކެއް ހުރުމުން ޕްލޭނިންގ މިނިސްޓްރީން އީޕީއޭގައި އެދުނު ކަމަށެވެ. އެ މައްސަލަ ދިމާވީ 'ލޮކްޑައުން'ގެ ދުވަސްވަރުގައި މީހުން އެއްތަނަކަށް އެއްކޮށްގެން ކޮންސަލްޓޭޝަން ނުބޭއްވޭނެތީ ކަމަށް ނައީމް ވިދާޅުވިއެވެ.
ނައީމް ވިދާޅުވީ މި މަޝްރޫޢުގެ މުހިންމުކަން ފެންނާތީ ކޮމިއުނިޓީ ކޮންސަލްޓޭޝަން ކުރެވުނުގޮތަކަށް އޮންލައިންކޮށް ފޯމު ފުރައިގެން އަދި ޝަކުވާ ހުށަހަޅައިގެން ފުރުޞަތު ހުޅުވާލައިގެން ކުރިއަށް ގެންދިޔަ ކަމަށެވެ.
މި މަޝްރޫޢުގެ އީއައިއޭ ކޮންސަލްޓެންޓް ޑރ. އަހުމަދު ޝާއިގު ވިދާޅުވީ މި މަޝްރޫއު ފެށުމުގެ ކުރިން ސްޓޭކް ހޯލްޑަރ އެންގޭޖްމަންޓް ޕްލޭނެއް އެކުލަވާލާފައިވާނެ ކަމަށެވެ. އަދި އެ ޕްލޭންގައި މަޝްވަރާކުރަން ޖެހޭ ބޭފުޅުން ހިމަނާފައިވާނެ ކަމަށާއި، އެގޮތުން މަޝްވަރާ ކުރިއަށްގެންދާނެ ގޮތަކާއި ކުރިއަށްގެންދާނެ ޝެޑިއުލްއެއް އެކުލަވާލާފައިވާނެ ކަމަށެވެ. އެގޮތުން މަޝްރޫޢުގެ 58 ސްޓޭކް ހޯލްޑަރުންނާއި ތަފުސީލުކޮށް މަޝްވަރާކުރެވުނު ކަމަށާއި، ބައްދަލުވުންތަކުގައި ގާތްގަޑަކަށް 136 ބޭފުޅުން ސްޓޭކް ހޯލްޑަރުންގެ ތެރެއިން ބައިވެރިވި ކަމަށެވެ.
އަދި ސަރުކާރުގެ 10 އިދާރާއަކާއި، މާލެ ސިޓީ އަދި ކ. އަތޮޅު ކައުންސިލާއި، ޕަބްލިކް ކޮމްޕެނީސްތަކުގެ ތެރެއިން ގްރޭޓަރ މާލެ އިންޑަސްޓްރިއަލް ޒޯން ލިމިޓެޑާއި އެމްޓީސީސީ އަދި މާލެ ޞަރަޙައްދުގައި ހިމެނޭ ހުރިހާ ރިސޯޓެއްގެ އިތުރުން 12 ޝިޕް އޮޕަރޭޓަރުންނާއި 5 ޖަމްޢިއްޔާއަކާއި، 16 މަސް ދޯންޏަކުން މީހުންނާއި މަޝްވަރާ ކުރެވުނު ކަމަށެވެ.
ސަރުކާރުގެ އިދާރާތަކުގެ ތެރޭގައި މަޝްވަރާ ކޮށްފައިވަނީ ޓުއަރިޒަމް މިނިސްޓްރީ، އެންވަޔަރަންމަންޓް މިނިސްޓްރީ، އިކޮނޮމިކް ޑެވެލަޕްމަންޓް، ފިޝަރީޒް މިނިސްޓްރީ، އީޕީއޭ، މެރިން ރިސަރޗް ސެންޓަރ، ކަސްޓަމްސް، ޓްރާންސްޕޯޓް އޮތޯރިޓީ، އެމްއެންޑީއެފް އަދި އެމްޕީއެލްއާ ކަމަށް އީޕީއޭއިން ބުނެއެވެ.
އަދި ފަތުރުވެރިކަމާއި ގުޅުން ހުރި ފަރާތްތަކާއި މިނިސްޓްރީ އަދި ޝިޕިން ކުންފުނިތަކާއި މަސްވެރިންގެ ކަންބޮޑުވުންތައް ހުރި ކަމަށާއި، އީއައޭ ރިޕޯޓުގައި އެކަންކަން ހިމަނާފައިވާނެ ކަމަށެވެ. އަދި މިޓިގޭޝަން މެޝަރސް ހިމަނާފައިވާ އިރު، ޙައްލުކުރެވޭނެ ކަންކަމާއި ޙައްލު ނުކުރެވޭނެ ކަންކަން ހުންނާނެ ކަމަށާއި، ތަފުސީލުކޮށް ހުރިހާކަމެއް ބަޔާންކޮށްފައި ހުންނާނެ ކަމަށް ޑރ. ޝާއިގު ވިދާޅުވި އެވެ. މީގެ އިތުރުން ތަފުސީލު މޮނިޓަރިންގ ޕްރޮގުރާމެއް ހުށަހަޅާފައިވާނެ ކަމަށާއި، އެ ޕްރޮގުރާމުގެ ތެރެއިން ކަމެއް ފާހަގަ ކުރެވިއްޖެއްޔާ މިޓިގޭޝަނަށް ބަދަލުގެންނަން ވެސް ހިމަނާފައިވާނެ ކަމަށް އޭނާ ވިދާޅުވި އެވެ.
