އީއެފްއެލް ޗެމްޕިއަންޝިޕުން އިތުރު ނުވަ މީހަކު ކޮރޯނާވައިރަހަށް ޕޮޒިޓިވް ވެއްޖެ

އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ން އިތުރުން ނުވަ މީހަކު ނޮވެލް ކޮރޯނާވައިރަސް (ކޮވިޑް-19)ށް ޕޮޒިޓިވްވެއްޖެ އެވެ.

އީއެފްއެލް އިން އަންނަނީ ދެވަނަ ޑިވިޝަނާއި ތިންވަނަ ޑިވިޝަނުގައި ވާދަކުރާ ކްލަބުތަކުގެ ހުރިހާ ކުޅުންތެރިންނާއި، އޮފިޝަލުން ކޮވިޑް-19ށް ޓެސްޓު ކުރަމުންނެވެ. އެގޮތުން އެންމެ ފަހުން ކުރިއަށް ގެންދިޔަ ހަތަރުވަނަ ބުރުގެ ޓެސްޓުތަކުން އިތުރު ނުވަ މީހަކު ވަނީ ކޮވިޑް-19ށް ޕޮޒިޓިވް ވެފައެވެ. މި ނުވަ މީހުން ނިސްބަތްވަނީ ހަ ކްލަބަކަށް ކަން އީއެފްއެލް އިން ވަނީ ހާމަކޮށްފަ އެވެ.

ހަތަރު ވަނަ ބުރުން ކޮވިޑް-19ށް ޕޮޒިޓިވްވި މީހުން ނަން އީއެފްއެލުން ހާމަނުކުރި ނަމަވެސް، ޕްރެސްޓަން ނޯތު އެންޑް އެފްސީ އާއި ޝެފީލްޑް ވެންސްޑޭ އިން ވަނީ އެ ކްލަބުތަކުގެ އޮފިޝަލުން ވައިރަހަށް ޕޮޒިޓިވް ވިކަން ހާމަކޮށްފަ އެވެ.

ހަތަރުވަނަ ބުރުން ޕްރެސްޓަން ނޯތު އެންޑް އެފްސީގެ އޮފިޝަލަކު ކޮވިޑް-19ށް ޕޮޒިޓިވް ވިއިރު، ތިންވަނަ ބުރުގައި ހެދި ޓެސްޓު ތަކުން އެ ކްލަބުގެ ފޯވާޑް ޖޭޑެން ސްޓޯކްލީ ވަނީ ކޮވިޑް-19ށް ޕޮޒިޓިވް ވެފައެވެ.

ތިންވަނަ ބުރުގައި ޖުމުލަ 10 މީހަކު އީއެފްއެލް ޗެމްޕިއަންޝިޕުން ކޮވިޑް-19ށް ޕޮޒިޓިވް ވިއިރު، މިޑްލްސްބްރާ އާއި ކާޑިފް ސިޓީން ވަނީ އެ ކްލަބުގެ އޮފިޝަލަކު ވައިރަހަށް ޕޮޒިޓިވް ވިކަން ހާމަކޮށްފަ އެވެ.

އަދި ދެވަނަ ބުރުގެ ޓެސްޓުތަކުން ބްލެކްބާންގެ ޑިފެންޑަރު އެލިއޮޓް ބެނެޓް އާއި ފުލަމްގެ ދެ ކުޅުންތެރިއަކު ވަނީ ކޮވިޑް-19ށް ޕޮޒިޓިވް ވެފައެވެ. މީގެ އިތުރުން ފުރަތަމަ ބުރުން ހަލް ސިޓީގެ ދެ މީހަކު ވެސް ވަނީ ކޮވިޑް-19ށް ޕޮޒިޓިވް ވެފައެވެ.

ކޮވިޑް-19 އާ ގުޅިގެން މަރޗު މަހު އިންގްލެންޑުގައި ފުޓުބޯޅަ މުބާރާތްތައް ހުއްޓާލިއިރު، ޖޫން މަހުން ފެށިގެން ފުޓުބޯޅަ މުބާރާތްތައް އަލުން ފެށުމުގެ ހުއްދަ އިނގިރޭސިވިލާތުގެ ސަރުކާރުން ވަނީ ދީފައެވެ. އެކަމަކު އީއެފްއެލް އިން ދެވަނަ ޑިވިޝަނާއި ތިންވަނަ ޑިވިޝަން އަލުން ފަށާނެ ތާރީޚެއް އަދި ކަނޑައަޅާފައެއް ނުވެއެވެ.