ކޮވިޑް-19 ޖެހިގެން ފްރާންސްގައި މަރުވި މީހުންގެ އަދަދު 29،000ށްވުރެ މައްޗަށް

ކޮވިޑް-19 ޖެހިގެން ފްރާންސްގައި މަރުވި މީހުންގެ އަދަދު 29،000ށްވުރެ މައްޗަށް އަރައިފި އެވެ.

އެޤައުމުގެ އިސް މަސްއޫލުވެރިންނާއި ޙަވަލާދީ ބައިނަލްއަޤުވާމީ މީޑިއާތަކުން ރިޕޯޓުކުރާ ގޮތުގައި އެޤައުމުގައި މަރުވީ މީހުންގެ އަދަދު ވަނީ 29،021ށް އަރާފަ އެވެ. މިއީ އެޤައުމުގައި ވައިރަސް ޖެހުނު މީހުންގެ ނިޞްބަތައް ބަލާއިރު، %0.3 އެވެ. ފްރާންސުން އާންމުކޮށްފައިވާ ޑޭޓާތަކަށް ބަލާއިރު، މަރުވީ މީހުންގެ ނިޞްބަތް އިތުރުވެގެން ދިޔައީ ކޮވިޑް-19ށް ފަރުވާ ހޯދަމުން ދިޔަ ގިނަ އަދަދެއްގެ މީހުން ފާއިތުވެ ދިޔަ ހަފުތާގައި މަރުވުމާއި ގުޅިގެންނެވެ. މިދިޔަ ހަފުތާގައި އެޤައުމުގައި މަރުވާ މީހުންގެ ނިޞްބަތް ހުރީ %0.2ގަ އެވެ.

ފްރާންސްގެ ހެލްތު މިނިސްޓްރީން ބުނާގޮތުގައި އާދައިގެ މަތިން ކޮންމެ ދުވަހަކުވެސް ހާމަކުރަމުން ދަނީ ހޮސްޕިޓަލްތަކު މަރުވާ މީހުންގެ އަދަދެވެ. އަދި އެހެނިހެން ތަންތާނގައި މަރުވާ މީހުންގެ އަދަދުމީގެ ފަހުން ހާމަކުރަމުން ދާނީ ހަފުތާއަކު އެއްފަހަރު ކަމަށް ބުނެފައި ވެއެވެ.

ފްރާންސްގައި މަރުވާ މީހުންގެ ނިޞްބަތް އިތުރުވީ ނަމަވެސް އަލަށް ވައިރަސްއަށް ޕޮޒިޓިވްވާ މީހުންގެ ނިޞްބަތް މަދުކަން ފާހަގަކޮށްފައި ވެއެވެ. ކުރިން %0.5 ގައި ވައިރަސް ޖެހޭ މީހުންގެ އަދަދު ހުރި އިރު މިހާރު ވަނީ އެ އަދަދު %0.2ށް ތިިރިވެފަ އެވެ. އެޤައުމުގައި ކޮވިޑް-19 ޖެހުނު މީހުންގެ ޖުމުލަ ޢަދަދަކީ، 151,677 ( އެއްލައްކަ ފަންސާސް އެއްހާސް ހަސަތޭކަ ހަތްދިހަ ހަތެއް) މީހުންނެވެ.

ފްރާންސްގައި 53,201 މީހަކަށް މިހާރުވެސް ފަރުވާ ދެމުންދާއިރު، އޭގެ ތެރެއިން 1,210 މީހުންގެ ޙާލަތު ވަރަށް ސީރިއަސް ކަމަށް ޚަބަރު ލިބެއެވެ. އަދި ފަރުވާ ދީގެން 69,455 (ފަސްދޮޅަސް ނުވަހާސް ހަތަރު ސަތޭކަ ފަންސާސް ފަހެއް) މީހުން ވަނީ ރަނގަޅު ކުރެވިފަ އެވެ.