ޑރ. މޫސާ ކޮވިޑަށް ޕޮޒިޓިވް ނުވޭ، ސައްހަ ނޫން މައުލޫމާތު ނުފަތުރާ: މަބްރޫކް
ސޯޝަލް މީޑިއާގައި ތެދު ނޫން މައުލޫމާތު ނުފެތުރުމަށް ޑރ. މޫސަ ވަނީ ވިދާޅުވެފައި
ކޮވިޑް ބަލިމީހުންނަށް ފަރުވާދޭ ޑޮކްޓަރުންގެ ޓީމްގައި ހިމެނިވަޑައިގަންނަވާ ޑރ. މޫސާ ހުސައިން؛ އޭނާ ކޮވިޑަށް ޕޮޒިޓިވްވި ވާހަކަ ވަނީ ދޮގުކުރައްވާފައި
ކޮވިޑް-19 ޖެހޭ މީހުންނަށް ފަރުވާދޭ ޓީމުގައި އިސްކޮށް ޙަ ރަކާތްތެރިވެވަޑައިގަންނަވާ އައިޖީއެމްއެޗްގެ ޕުލްމޮނަލަޖިސްޓް ޑރ. މޫސާ ހުސައިން ބައްޔަށް ޕޮޒިޓިވް ނުވާ ކަމަށް ވިދާޅުވެ، ޞައްޙަ ނޫން މަޢުލޫމާތު ނުފެތުރުމަށް ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގެ ތަރުޖަމާނު މަބްރޫކް އަޒީޒު ގޮވާލައިފި އެވެ.
މަބްރޫކް މިހެން ވިދާޅުވީ ޑރ. މޫސަ ކޮވިޑް-19ށް ޕޮޒިޓިވްކަމަށް ބުނެ ސޯޝަލް މީޑިއާގައި ފެތުރެމުންދާ ޚަބަރުތަކާއި ގުޅިގެންނެވެ. ސޯޝަލް މީޑިއާގައި ދައުރުވަމުންދާ ޕޯސްޓުގައި ބުނެފައި ވަނީ ޑރ. މޫސައަށް ކޮވިޑް ޖެހުނުކަން އެނގުނީ އެ ބަލި ޖެހިފައި ރަނގަޅުވި ފަހުން، ހެދި އެންޓި ބޮޑީސް ޓެސްޓަކުން ކަމަށެވެ.
މި ވާހަކަތަކާއި ގުޅިގެން ނޫސްވެރިންގެ ބައްދަލުވުމުގައި މަބްރޫކް ވިދާޅުވީ އެއީ ކަނޑައެޅިގެން ދޮގު ވާހަކަތަކެއް ކަމަށް ޑރ. މޫސާ ވިދާޅުވެފައިވާ ކަމަށެވެ. އަދި މިކަމުގެ ސަބަބުން ޑރ. މޫސަގެ ޢާއިލާއާއި ގާތް ރަހުމަތްތެރިންނާއި ޑރ. މޫސައަށް ދެއްކި ބަލީ މީހުންގެ ހިތުގައި ބިރުވެރިކަން އުފެދިފައިވާތީ އެކަމުގެ ކަނބޮޑުވުން ޑރ މޫސަ ފާޅުކުރެއްވިކަމަށް ވެސް މަބްރޫކް ވިދާޅުވި އެވެ.
ސޯޝަލް މީޑިއާގައި ދައުރުވަމުންދާ ޕޯސްޓާއި ގުޅިގެން ޑރ. މޫސަ އެފްބީގައި ކުރެއްވި ޕޯސްޓެއްގައި ވިދާޅުވީ އޭނާގެ ޙާލު ރަނގަޅުކަމަށާއި، ކޮވިޑަށް ޓެސްޓް ކުރުމަށް އެއްވެސް ސާމްޕަލެއް ނަގާފައި ނުވާ ކަމަށެވެ. އަދި އެފަދަ ވާހަކަތަކެއް ފަތުރަމުންދާ މީހަކު އެ ޕޯސްޓްތައް ވަގުތުން ނެގުމަށާއި، މިފަދަ ދޮގު މަޢުލޫމާތުތައް ސޯޝަލް މީޑިއާގައި ނުފެތުރުމަށް ޑރ. މޫސަ ވަނީ އިލްތިމާސް ކުރައްވާފަ އެވެ.
