ޖޫން އަދި ޖުލައި މަހުވެސް ކުލި ލުއިކޮށްދޭނެ ކަމަށް އެޗްޑީސީން ބުނެފި
1 ޖޫން 2020 | ހޯމަ 08:57ކުލީގެ 30 އިންސައްތައަށްވާ ފައިސާ ދެއްކުން ވަނީ ފަސްކޮށްދީފައި
ހައުސިންގ ޑިވެލޮޕްމަންޓް ކޯޕަރޭޝަން - ކޮވިޑް-19އާ ގުޅިގެން ރައްޔިތުންނަށް ލުއިތަކެއް ދީފައިވޭ
ކޮވިޑް-19 އާއި ގުޅިގެން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ދޭން ނިންމާފައިވާ ކުލީގެ ލުއިކަން ޖޫން އަދި ޖުލައި މަހުވެސް ލިބޭނެ ކަމަށް އެކޯޕްރޭޝަނުން ބުނެފިއެވެ.
އެޗްޑީސީން ބުނީ ރާއްޖޭގައި މިވަގުތު ފެތުރެމުންދާ ކޮވިޑް-19އާ ގުޅިގެން، ސަރުކާރުގެ އިކޮނޮމިކް ރިކަވަރީ ޕްލޭންގެ ދަށުން ފަރުދުންނާއި، ވިޔަފާރިތަކަށް ކުރިމަތިވެފައިވާ ދަތިތަކަށް ހައްލެއް ހޯދައިދިނުމުގެ ގޮތުން އެކޯޕްރޭޝަނުން ދޫކޮށްފައިވާ ފުލެޓު، ގޯތި، ރޯހައުސް އަދި ކޯމާޝަލް ޔުނިޓް ތަކާއި ސިނާއީ ބިންތަކަށް އޭޕްރިލް އަދި މޭ މަހު ދައްކަންޖެހޭ ކުލީގެ 30 އިންސައްތައަށްވާ ފައިސާ ދެއްކުން ފަސްކޮށްދިނުމަށް ނިންމާފައިވާ ނިންމުން ޖޫން އަދި ޖުލައި މަހަށް އިތުރު ކޮށްފައިވާ ކަމަށެވެ.
އެޗްޑީސީން ބުނީ އޭޕްރިލް، މޭ، ޖޫން އަދި ޖުލައި މަހުގެ ކުއްޔަށްވާ ފައިސާގެ 30 އިންސައްތަ ދެއްކުން ފަސްކުރަން ބޭނުންވާ މީހުން އެކަމަށް އެދި 31 ޖުލައި 2020 ގެ ނިޔަލަށް، މިކޯޕަރޭޝަނުގެ "މައި ހުޅުމާލެ" ވެބްޕޯޓަލްގައިވާ އޮންލައިން އެޕްލިކޭޝަން ފޯމު ހުށައެޅޭނެ ކަމަށެވެ.
އެގޮތުން މި 4 މަހުގެ ކުއްޔަށްވާ ފައިސާގެ 30 އިންސައްތަ ދެއްކުން ފަސްކޮށްދީފައިވަނީ 31 މާރޗް 2020 އާ ހަމަޔަށް އެއްބަސްވުމުގެ ދަށުން ގަވާއިދުން ފައިސާ ދައްކާފައިވާ މީހުންނަށް ކަމަށެވެ. އަދި ކޮންމެ މަހަކު ދައްކަންޖެހޭ އިންސްޓޯލްމަންޓް ކުއްޔަށްވާ ފައިސާގެ 70 އިންސައްތަ މިކޯޕަރޭޝަނަށް ދައްކާ ހަލާސް ކުރުމުގެ ފުރުސަތު 15 އޯގަސްޓް 2020 އާއި ހަމަޔަށް ދެވޭނެ ކަމަށް އެޗްޑީސީން ބުނެއެވެ.
އެޗްޑީސީން ބުނީ ފައިސާ ދެއްކުން ފަސްކުރުމަށް ހަމަޖެހިފައިވާ 4 (ހަތަރެއް) މަހުގެ އިންސްޓޯލްމަންޓް ކުއްޔަށްވާ ފައިސާގެ 30 އިންސައްތަ އެކޯޕަރޭޝަނަށް އަނބުރާ ދައްކަން 12 މަސްދުވަހަށްވުރެ ދިގުނޫން މުއްދަތެއް (ކަސްޓަމަރު އެދޭ ގޮތުގެ މަތިން) ދިނުމަށް ހަމަޖެހިފައިވާ ކަމަށެވެ. އަދި މިފައިސާ އަނބުރާ ދައްކަން ފަށަން ޖެހޭނީ ނޮވެންބަރު މަހު ކަމަށެވެ.
އެޗްޑީސީން ބުނީ ފައިސާ ދެއްކުން ފަސްކުރެވޭ މުއްދަތު ނިމިގެން ހިނގާ ފުރަތަމަ 3 މަސް ދުވަހު ކަސްޓަމަރު ދައްކަންޖެހޭނީ ކުރިންވެސް ދައްކަމުން ދިޔަ އިންސްޓޯލްމަންޓް ކުލީ ކަމަށެވެ.
މީގެ އިތުރުން އެޗްޑީސީން ބުނީ އެއްބަސްވުމުގެ ދަށުން ފައިސާ ދައްކާ ފަރާތްތަކުގެ ތެރެއިން އެކިއެކި ސަބަބުތަކާހުރެ ގަވާއިދުން ފައިސާ ނުދެއްކިވާ ފަރާތްތަކުން އެކަމަށް އެދި ހުށަހެޅުމުން މިކޯޕަރޭޝަނުން އަމަލުކުރަމުންދާ ޑޭޓް ކަލެކްޝަން ޕޮލިސީ އާއި އެއްގޮތްވާ ގޮތުގެ މަތީން ފައިސާ ދެއްކުމަށް ލުއިތަކެއް ދޭނެ ކަމަށެވެ. އަދި ކުރިއަށް އޮތްތަނުގައި ވެސް ކޮވިޑް-19 ގެ ހާލަތަށް ރިޔާއަތްކޮށް އިތުރު ލުއިތަކެއް ފޯރުކޮށް ދިނުމުގެ އިންތިޒާމްތައް ހަމަޖައްސައިދޭނެ ކަމަށެވެ.
އެޗްޑީސީން ބުނީ ކޮވިޑް-19އާއި ގުޅިގެން އެކޯޕަރޭޝަނުން ދިނުމަށް ހަމަޖެހިފައިވާ 4 މަސްދުވަހުގެ ކުލީގެ 30 އިންސައްތަ ފަސް ކުރުމަށް ބޭނުންވާ ފަރާތްތަކުން "މައި ހުޅުމާލެ" ވެބްޕޯޓަލް ގައިވާ ކޮވިޑް-19 އާއި ގުޅިގެން ފައިސާ ދެއްކުން ފަސްކުރުމަށް ހުށައަޅާ އޮންލައިން އެޕްލިކޭޝަން ފޯމު ފުރިހަމަކުރުމަށް ފަހު، 31 ޖުލައި 2020 ގެ ކުރިން ފޮނުވުމަށް އެދޭ ކަމަށެވެ. އަދި އޭޕްރިލް، މޭ މަހުގެ އިންސްޓޯލްމަންޓް ކުލި ފަސްކުރުމަށް މިހާތަނަށް ފޯމު ހުށައަޅާފައިވާ ފަރާތްތަކުން އިތުރު ފޯމެއްހުށަހަޅަން ނުޖެހޭނެ ކަމަށެވެ.
މިކަމާ ގުޅިގެން އިތުރު މައުލޫމާތު ސާފު ކުރައްވަން މިކޯޕަރޭޝަނުގެ ވައިބަރ ނަންބަރު 7290448އަށް މެސެޖް ކުރެއްވުން ނުވަތަ covidsupport@hdc.com.mv އަށް އީމެއިލް ކުރުމަށް އެޗްޑީސީން ވަނީ އެދިފައެވެ.
