ދަތުރުކުރަމުންދިޔަ މަތިންދާބޯޓު ވެއްޓި އިޓަލީގެ ދެ ފެތުންތެރިއަކު މަރުވެއްޖެ އެވެ.
މި ހާދިސާގައި މަރުވެފައިވަނީ އުމުރުން 22 އަހަރުގެ ފަބިއޯ ލޮމްބީނީ އާއި އުމުރުން 23 އަހަރުގެ ޖޮއެލޭ ރޮއްސެއްޓީ އެވެ. މި ދެ ފެތުންތެރިން މަރުވިކަން އީޓާލިއަން ސްވިމިންގ ފެޑެރޭޝަން (ފިން) އިން ވަނީ ކަށަވަރުކޮށްދީފަ އެވެ.
ރިޕޯޓުތައް ބުނާ ގޮތުން ފަބިއޯ ލޮމްބީނީ އާއި ޖޮއެލޭ ރޮއްސެއްޓީ ދަތުރުކުރަމުންދިޔަ މަތިންދާބޯޓު ނައްޓާލިތާ މާގިނައިރުތަކެއް ނުވެ ވަނީ ވެއްޓިފަ އެވެ. އަދި ވެއްޓުނު ގޮތަށް އެ ބޯޓު ގޮވި މަންޒަރު ފެނުން ކަމަށް އިޓަލީގެ މީޑިއާތަކުން ވަނީ ރިޕޯޓުކޮށްފަ އެވެ.
ފަބިއޯ ލޮމްބީނީ އާއި ޖޮއެލޭ ރޮއްސެއްޓީ ދަތުރުކުރަމުންދިޔަ މަތިންދާބޯޓަކީ "ކްރޭޒީ ފްލައި ފްލައިޓް ސްކޫލް" ގެ މަތިންދާބޯޓެއް ކަމަށް ރިޕޯޓުތައް ބުނެއެވެ. އަދި އެ ހާދިސާ ހިނގިއިރު، ބޯޓު ދުއްވަން އިނީ ޖޮއެލޭ ރޮއްސެއްޓީ ކަމަށްވެސް ރިޕޯޓުތައް ބުނެއެވެ.
އީޓާލިއަން ސްވިމިންގ ފެޑެރޭޝަން (ފިން) އިން ނެރުނު ބަޔާނެއްގައި ބުނީ ޒުވާން ދެ ފެތުންތެރިއަކު މަރުވި ޚަބަރަކީ ލިބުނު ބޮޑު ސިހުމެއް ކަމަށެވެ. އަދި އެ އިދާރާއިން ވަނީ އެ ދެ ފެތުންތެރިންގެ އާއިލާއަށް ތައުޒިޔާ ފޮނުވާފަ އެވެ.
މި ހާދިސާގައި މަރުވި ފަބިއޯ ލޮމްބީނީ އަންނަނީ އިޓާލިއަން ނެޝަނަލް ސްވިމިންގ ކޮމްޕްލެކްސްގައި ތިން ދުވަހުގެ ތަމްރީނު ކޭމްޕެއްގައި ބައިވެރިވަމުންނެވެ. މީގެ ކުރިން އޭނާ ވަނީ އިޓާލިއަން ސްވިމިންގ ޗެމްޕިއަންޝިޕްގެ 200 މީޓަރު ފްރީސްޓައިލް ބައިން ރިހި މެޑަލް ހޯދާފަ އެވެ. އަދި މި ހާދިސާގައި މަރުވީ ޖޮއެލޭ ރޮއްސެއްޓީ ވެސް ވަނީ ޔޫތް ލެވެލްގައި ގިނަ ކަމިޔާބީތަކެއް ހޯދާފަ އެވެ.
