އީއެފްއެލް ޗެމްޕިއަންޝިޕުން އިތުރު 10 މީހަކު ކޮރޯނާވައިރަހަށް ޕޮޒިޓިވްވެއްޖެ
31 މެއި 2020 | އާދީއްތަ 16:47ޕްރެސްޓަން ނޯތު އެންޑް އެފްސީގެ ފޯވާޑް ޖޭޑެން ސްޓޯކްލީ ވަނީ ކޮވިޑް-19ށް ޕޮޒިޓިވް ވެފައި
ކޮވިޑް-19ށް ޕޮޒިޓިވްވި ޕްރެސްޓަން ނޯތު އެންޑް އެފްސީގެ ފޯވާޑް ޖޭޑެން ސްޓޯކްލީ
އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ން އިތުރުން 10 މީހަކު ކޮރޯނާވައިރަސް (ކޮވިޑް-19) ށް ޕޮޒިޓިވްވެއްޖެ އެވެ.
އީއެފްއެލް އިން އަންނަނީ ދެވަނަ ޑިވިޝަނާއި ތިންވަނަ ޑިވިޝަނުގައި ވާދަކުރާ ކްލަބުތަކުގެ ހުރިހާ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރަމުންނެވެ. އެގޮތުން މީގެ ކުރިން ދެ ބުރެއްގެ މަތިން ޓެސްޓުތައް ވަނީ ކުރިއަށް ގެންގޮސްފައެވެ.
ތިންވަނަ ބުރުގައި ކުރި ޓެސްޓުތަކުން އީއެފްއެލް ޗެމްޕިއަންޝިޕުން އިތުރު 10 މީހަކު ވަނީ ކޮވިޑް-19ށް ޕޮޒިޓިވް ވެފައެވެ. އެއާއެކު އީއެފްއެލް ޗެމްޕިއަންޝިޕްގައި ވާދަކުރަމުން އަންނަ ޕްރެސްޓަން ނޯތު އެންޑް އެފްސީން ވަނީ އެ ކްލަބުގެ ފޯވާޑް ޖޭޑެން ސްޓޯކްލީ ކޮވިޑް-19ށް ޕޮޒިޓިވް ވިކަން ހާމަކޮށްފައެވެ. އަދި މިޑްލްސްބްރާ އިން މީހަކު ޕޮޒިޓިވް ވިކަން އެ ކްލަބުން ހާމަކުރިއިރު، ކާޑިފް ސިޓީން ވަނީ އެ ކްލަބުގެ އޮފިޝަލަކު ވައިރަހަށް ޕޮޒިޓިވް ވިކަން ހާމަކޮށްފައެވެ.
މީގެކުރިން ކުރިއަށް ގެންދިޔަ ދެވަނަ ބުރުގެ ޓެސްޓުތަކުން ބްލެކްބާންގެ ޑިފެންޑަރު އެލިއޮޓް ބެނެޓް އާއި ފުލަމްގެ ދެ ކުޅުންތެރިއަކު ވަނީ ކޮވިޑް-19ށް ޕޮޒިޓިވް ވެފައެވެ. އަދި ފުރަތަމަ ބުރުން ހަލް ސިޓީގެ ދެ މީހަކު ވެސް ވަނީ ކޮވިޑް-19ށް ޕޮޒިޓިވް ވެފައެވެ.
އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ގެ އިތުރުން ތިންވަނަ ޑިވިޝަން ކަމަށްވާ (އީއެފްއެލް ލީގު ޓޫ) އިން ވަނީ ތިންވަނަ ބުރުގައި 7 މީހަކު ކޮވިޑް-19 ޕޮޒިޓިވް ވެފައެވެ.
ކޮވިޑް-19 އާ ގުޅިގެން މާޗު މަހު އިންގްލެންޑުގައި ފުޓްބޯޅަ މުބާރާތްތައް ހުއްޓާލިއިރު، ޖޫން މަހުން ފެށިގެން ފުޓްބޯޅަ މުބާރާތްތައް އަލުން ފެށުމުގެ ހުއްދަ އިނގިރޭސިވިލާތުގެ ސަރުކާރުން ވަނީ ދީފައެވެ.
